Bir bu çatmırdı. ABŞ və bəzi Qərb ölkələrinin bizim ekoaksiyamızla bağlı tutduqları səhv, qərəzli mövqedən sonra, indi də İran ortaya düşüb. Özü də görün nə təklif edir? Ermənistanla bizim aramızda vasitəçilik yaratmaq istəyir.
Görün, İran XİN rəsmisi Nasir Kənani nə deyib. O qeyd edir ki, İran Laçın yolu ilə bağlı məsələnin Ermənistan və Azərbaycan arasında danışıqlar yolu ilə operativ həllinə ümid edir:
“İran hər zaman Ermənistan və Azərbaycan arasında mübahisələrin sülh yolu ilə həllini vurğulayır. 10 noyabr 2020-ci il tarixli Üçtərəfli atəşkəs bəyannaməsinin şərtlərinin tam yerinə yetirilməsi iki ölkə arasındakı fikir ayrılıqlarına son verə bilər”.
Əslində çox gülməlidir və İranın qeyri-səmimiyyətini ortaya qoyur. Adama deyərlər ki, sən belə sülhsevəndinsə, niyə 30 illik işğal zamanı belə “səmimi” vasitəçilik təklif etmirdin? Yalnız işğalçı Ermənistana nəfəslik verməklə zalıma güc verirdin ki, bizi daha da əzsin. Üç aydan çoxdur İran daxilində etirazlar davam edir. Zaman-zaman İran rejiminə qarşı müxtəlif problemlər fonunda etirazlar olsa da, bu dəfə görünən odur ki, bu etirazları səngitməyə, yatırmağa İran rejimi nail ola bilmir. 65-i uşaq olmaqla 400 nəfərdən çox etirazçının öldürülməsi, qadın, qoca, gənc, uşaq demədən günahsız insanların güllələnməsi, dəyənəklə döyülməsinə rəğmən bu gün yenə İran şəhərlərində etirazlar davam edir. Görünən odur ki, bıçaq sümüyə dayanıb və xalqı daha ölüm də qorxutmur.
Biz İranın daxili işlərinə heç vaxt qarışmamışıq. İran isə 30 ilə yaxın müddət ərzində, hətta İkinci Qarabağ müharibəsindən sonra belə Azərbaycanın daxili işlərinə qarışaraq, Azərbaycanın sərhədlərini qanunsuz keçib, Xankəndi və digər ərazilərimizə humanitar yardım adı altında qanunsuz silahlar və digər əşyalar daşıyır. Əgər doğrudan da İran hakimiyyəti humanist siyasətin tərəfdarıdırsa, humanist siyasət yürüdürsə, İranda baş verən iğtişaşların fonunda Azərbaycan dövləti üçün sərhədləri açsın. Biz oradakı milyonlarla soydaşımızın həyatının təhlükədə olduğu hazırkı dönəmdə onlara humanitar yardım edək. Bunu etmirsə, bu ondan xəbər verir ki, İranın hazırkı hakimiyyəti Avropada bəzi qüvvələr kimi ikili siyasət yürüdür. Üstəlik, özünün etdiyi əməli Azərbaycanın boynuna yıxmağa çalışır. Belə ölkə nə dərəcədə səmimi ola bilər? İran bilsin ki, Azərbaycan tərəfi heç vaxt yol bağlamayıb. Yolu rus sülhməramlıları bağlayıbsa, yaxşı olardı ki, İran bu vasitəçilik missiyasını Ermənistanla Rusiyaya təklif etsin, bizə yox!
Narahat olmasın, heç Ermənistanın dostu olan ölkələr belə İranı onunla vasitəçiliyə buraxmaz. Əslində ən gözəl vasitəçi elə İranın özünə lazımdır ki, daxilindəki iğtişaşları sakitləşdirsin. Bunun üçün ən gözəl yol isə bizə müraciət etməkdir. Yalnız biz İranın daxilində stabillik yarada bilərik. Çünki orada ürəyi bizimlə döyünən 40 milyon soydaşımız yaşayır. Onların hər biri Azərbaycanı öz vətəni bilir. Yaxşı olardı ki, İran qeyri-səmimi vasitəçilik təkliflərini etməkdənsə, Azərbaycanın nüfuzundan yararlanıb öz daxilində nizam-intizam yaratmağa çalışsın.
Məhəmmədəli QƏRİBLİ
