Söz və mətbuat azadlığı problemi dünya jurnalistikasında hələ də aktuallığını saxlamaqdadır və müasir medianın inkişafında, şübhəsiz ki, bu problem ən çox müzakirə olunan mövzulardandır. İnformasiyanın sərbəst və sürətlə yayıldığı indiki zamanda söz və mətbuat azadlığına münasibət bir çox yönləri ilə diqqət çəkir. Bu problemə əksər nəzəriyyəçilərin elmi və konseptual yanaşmaları əslində mövzunun dərin və çoxşaxəli olduğunun göstəricisidir.
Azərbaycanda mətbuat və söz azadlığının mövcud imkanlarından sui-istifadə hallarının qarşısının qətiyyətlə alınması milli təhlükəsizliyin və ictimai həmrəyliyin çox vacib şərtlərindən biridir. Ancaq biz görürük ki, bəzi hallarda bir çox təsisatlar və media quruluşları bu amildən suistifadə edərək, bəzən milli maraqlarımızla uzlaşmayan, hətta ermənilərin mövqeyi ilə üst-üstə düşən mövqe sərgiləyirlər.
Laçın yolunun Xankəndiyə doğru humanitar yük aparan maşınlar üçün ermənilərin planları ilə əvvəlcə bağlanması, sonra da öz planları ilə açılmasından elə özləri ciddi peşmançılıq keçirməyə başlayıblar.
Bununla dünyaya nümayiş etdirmək istəyirdilər ki, Azərbaycanın guya Xankəndidə humanitar fəlakət yaratması ittihamı ilə car çəksinlər.
Lakin biz sübut etdik ki, Laçın yolunu humanitar yüklər üçün bağlayan biz yox, sülhməramlılar və ermənilərin özüdür. Artıq neçə gündür ki, həqiqi faktların təzyiqi altında ermənilər Laçın yolunda humanitar avtomobilləri qəbul etmək zorundadırlar. Necə deyərlər, qurduqları oyun öz əleyhlərinə işlədi.
Ermənilərin mövqeyi ilə üst-üstə düşən paylaşımlar edirlər...
Çox təəssüflər olsun ki, özünü Qərbpərəst adlandıran bəzi şəxslər sırf ermənilərin mövqeyi ilə üst-üstə düşən palıaşımlar edirlər.
Vəfa Nağı adlı Qərbpərəst fəalən paylaşdığı statusa diqqət edək:
“Dekabrın 12-də özlərini “eko aktivist kimi” təqdim edən bir qrup azərbaycanlı mülki şəxs Laçın dəhlizinə daxil olaraq Dağlıq Qarabağı faktiki olaraq mühasirəyə alıblar. Dağlıq Qarabağın Ermənistan və dünya ilə həyati önəmə sahib əlaqəsi kəsildiyi üçün insanlar humanitar böhran yaşanmasından qorxurlar”.
Gəlin görək, Qərbin pulları əsasında fəaliyyət göstərən Meydan.TV adlı sayt nə yazır. Sayt “Arevik” Tibb Mərkəzinin direktoru Karen Melkumyana istinadən bunları deyir:
“Əgər bu məsələ belə davam etsə, uzun müddət ayaqda qala bilməyəcəyik. Payız-qış fəsli kəskin şəkildə yayılan xəstəliklər mövsümidir və xəstəxana dolub-daşır.
“Arevik” Tibb Mərkəzi Dağlıq Qarabağın yeganə uşaq xəstəxanasıdır. Dağlıq Qarabağa verilən qaz artıq 3 gün idi ki, kəsilmişdi. Ermənistandan Dağlıq Qarabağ bölgəsinə qaz daşıyan boru kəmərləri hazırda Azərbaycan hökumətinin nəzarətində olan ərazidən keçir. Bu ərazidən keçmişdə də bölgəyə təzyiq göstərmək məqsədilə istifadə edilib. Bizdə olan dərmanları az-az istifadə edirik ki, əgər hər hansı bir uşaq qəflətən ağır xəstələnərsə, ilk növbədə ona kömək edə bilək”.
Bəzi fəallarımız tutduqları antimilli mövqeyə görə heç utanırlarmı?
Məlum olduğu kimi, Azərbaycan demokratik dəyərlərin bərqərar olduğu müasir hüquqi dövlətdir. Demokratik, hüquqi dövlət, vətəndaş cəmiyyəti quruculuğu, dünya birliyinə fəal inteqrasiya müstəqil Azərbaycanın əsas hədəflərindən biri kimi elan olunub. Ölkə rəhbərliyi tərəfindən məqsədli və planlı şəkildə həyata keçirilən demokratikləşmə prosesi sosial, hüquqi, siyasi, iqtisadi olmaqla cəmiyyət həyatının bütün sferalarını əhatə edir.
Azərbaycan hüquqi dövlətdir və hər bir vətəndaşın dövlət qarşısında müvafiq öhdəlikləri, vəzifələri var.
Ölkəmizdə Konstitusiyada təsbit olunmuş hakimiyyət bölgüsü prinsipinə uyğun dövlət idarəetmə sistemi formalaşıb, icra, qanunvericilik və məhkəmə orqanlarının səmərəli fəaliyyəti təmin edilib. Azərbaycanda müxtəlif yönlü siyasi partiyaların, ictimai təşkilatların, həmçinin, kütləvi informasiya vasitələrinin azad fəaliyyəti üçün yaradılmış şərait müstəqil dövlətimizdə siyasi plüralizmin, fikir azadlığının, demokratiyanın bərqərar olduğunu bariz şəkildə təsdiqləyir.
Amma təəssüflər olsun ki, bəzən ölkəmizdə yaradılmış bu şəraitdən sui-istifadə cəhdləri də müşahidə edilir.
Nə qədər qəribə olsa da, bəzi ermənilər yaranmış vəziyyətlə bağlı həqiqətləri yuxarıda qeyd etdiklərimizdən daha obyektiv çatdırırlar.
“Laçın yolunda baş verənlər barədə uşaqdan tutmuş böyüyə qədər, hamı bu mövzu barəsində fikir yürüdür. Amma artıq bir həftədir Azərbaycan tərəfinin aksiyasına Xankəndidən 3-4 nəfər belə yığılıb bir şüar səsləndirməyib”.
Bu fikirləri tanınmış erməni politoloq Armen Baqdasaryan bildirib.
“Sizcə, niyə belə tendensiyanı izləyirik? Bütün dünya bizdən danışır, amma Qarabağda yaşayan ermənilər susur. Hanı 120 min dediyiniz əhali? Bəsdir yalan danışdınız, orada heç min nəfər qalmayıb. Hamı qaçıb canını qurtarıb. Kimi İrəvana, kimi də erməni diasporu çox olan ölkələrə. “Dqr”də yaşayanlar guya blokadadadırlar. Bəs niyə narazılıqlarını bildirmirlər? Çünki orada olan 100-dən bir az çox insan çölə çıxsa, bütün yalanlar ifşa olacaq, hazırda müxtəlif beynəlxalq platformalarda erməni diaspor nümayəndələrinin “Bakı 120 min erməniyə qarşı humanitar təzyiq göstərir” qışqırıqları puça çıxacaq”, - deyə o qeyd edib.
Görəsən, bu fikirlərlə tanış olan bizim söz azadlığından sui-istifadə edən bəzi fəallarımız tutduqları antimilli mövqeyə görə heç utanırlarmı?
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
