Tehran rejimi soydaşlarımızın sayını azaltmaq, onların azsaylı xalq olduğunu “sübut etmək” üçün əlindən gələni edir. Heç şübhəsiz ki, mollalar ilk olaraq internet resurslarını saxta məlumatlarla doldururlar. Qondarma rəqəmlər təqdim etməklə insanlarda yalan məlumat formalaşdırırlar.
İran adlanan ölkədə 35-40 milyon azərbaycanlı yaşadığı məlum olsa da, mollakratiya rejimi azərbaycanlıların sayını qəsdən az göstərir. Vikipediya məqalələrindən birində “...İran azərbaycanlılarının sayı müxtəlif mənbələrə görə 15–20 milyondur. Bu isə İran əhalisinin 12% — 16%-ni təşkil edir” kimi yanlış məlumat yer alıb.
Cənubi Azərbaycanda yaşayan soydaşlarımızın sayının 15-20 milyon göstərilməsi məqsədlidir və onların sayı qəsdən yarıbayarı azaldılır. Halbuki, söhbət 35-40 milyondan gedir ki, onun da təhrif edilərək 15-20 milyon kimi təqdim edilməsi yolverilməzdir.
“...Burada 40 milyona yaxın Azərbaycan türkü yaşayır”
Saxta məlumata şərh verən AMEA-nın Fəlsəfə və Sosiologiya İnstitutunun aparıcı əməkdaşı, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, ilk dəfə deyil soydaşlarımızın sayı ilə bağlı belə uydurmalar yayılır, molla rejimi bütün imkanlarından istifadə edib Azərbaycan türklərinin sayını az göstərməyə çalışır. O eyni zamanda qeyd etdi ki, Azərbaycanın Güneyi dedikdə yalnız bir neçə şəhər və onun əhalisi götürülür, amma belə deyil: “Burada məsələ belədir ki, 20 milyon əhali deyərkən Təbrizdə, Ərdəbildə, Urmiyada yaşayan soydaşlarımızı nəzərdə tuturlar. Sayı məhdudlaşdırırlar. Amma Güney Azərbaycan yalnız bu şəhərlərdən ibarət deyil. Güney Azərbaycanı bu ərazi ilə məhdudlaşdırmaq doğru deyil. Həmədan, Zəncan, Qaşqay elləri və digər bölgələrdə də Azərbaycan türkləri və digər türk xalqları yaşayır. Bu gün orada yaşayan azərbayanlıların sayını 15-20 milyon civarında təqdim etmək doğru deyil. Çox yerdə türklər yaşayır.
Bizim Bütöv Azərbaycan Ocaqlarının coğrafiyası var ki, bu coğrafiyada bütün türkləri nəzərdə tutur. Problemin kökündə Azərbaycanın Güneyinin məhdud bir ərazidə göstərilməsi durur. Türklərin, azərbaycanlıların yaşadığı ərazi məhdud deyil, bu böyük bir ərazidir. Ümumiyyətlə, daha geniş götürdükdə burada 40 milyona yaxın Azərbaycan türkü yaşayır. Hələ mən Xorasanda, Türkmənsərada, Tehranda, İsfahanda və başqa şəhərlərdə yaşayan türkləri demirəm. Amma bunları da nəzərə almaq lazımdır”.
O qeyd etdi ki, məsələyə hərtərəfli yanaşılmalıdır və bunun ətraflı dəqiqləşdirilməsinə ehtiyac var. F.Ələkbərlinin sözlərinə görə, əhalinin sayı dəqiq siyahıya alınmalıdır ki, ortaya atılan saxtakarlıqlardan xilas olaq. “BAO olaraq bu istiqamətdə dəqiqləşdirmələri çoxdan aparırıq. Hesab edirəm ki, yaxın zamanlarda azərbaycanlıların və digər türklərin yaşadıqları coğrafiya, xəritələr məsələsi də həllini tapacaq və yeni dövlət qurulanda hər şey dəqiq olacaq.
Bilirsiz ki, rejim hər vəchlə bizim soydaşlarımızın sayını az göstərməyə çalışır, amma reallıq göz qabağındadır”-deyə F.Ələkbərli qeyd etdi.
İradə SARIYEVA
