Tehranın Azərbaycana yönəlik yeni xain planı. ABŞ-ın nüfuzlu "Forbes" jurnalında dərc olunan “Ermənistan və Serbiya niyə İran pilotsuz təyyarələrinə can atırlar” başlıqlı məqalədə qeyd edilir ki, İran Ermənistanı dronlarla silahlandırmağa hazırlaşır.
Tehran rəhbərliyinin Ukraynaya hücumda istifadə olunan minlərlə Şahid-136 kamikadze PUA-larını Moskvaya göndərdiyini xatırladan "Forbes" iranlı general-mayor Yəhya Rəhim Səfəvinin fikirlərini də dərc edib. Qeyd edilir ki, müvafiq olaraq, Ermənistan və Serbiya da daxil olmaqla 22 ölkə aktiv şəkildə İrandan pilotsuz təyyarələr almaq istəyir. "Forbes" İranın pilotsuz təyyarələrinin Ermənistana verilməsinin Qafqazda problemləri şaxələndirəcək ciddi nəticələrə gətirib çıxaracağını yazıb.
Araşdırmaçı Samuel Bendett isə "Forbes"ə açıqlamasında Ermənistanın güclənən Türkiyə-Azərbaycan müttəfiqliyini balanslaşdırmağın yollarını axtardığını vurğulayıb. O, Türkiyə PUA-larının Qarabağdakı qələbədə oynadığı rolu da xatırladıb.
“İsrail və Türkiyənin ölkəmizə satdığı PUA-lar daha müasir və funksionaldır”
Məsələyə münasibət bildirən hərbi ekspert Ramil Məmmədlinin fikrincə, İrandan Azərbaycana qarşı nə desən gözləmək olar: “Çünki bu ölkə tarixən Azərbaycanın güclənməsində maraqlı olmayıb. İndi də həmin siyasət davam edir. Xüsusən də Azərbaycan 44 günlük müharibə nəticəsində ərazilərini işğaldan azad edəndən sonra Tehran rejimi ciddi şəkildə narahat olmağa başladı. Ermənistanı hər cür himayə etdi. Döyüşlərin qızğın çağında İran öz ərazisindən, hava sahəsindən şərait yaratdı ki, Ermənistana silah-sursat daşınsın. O vaxt İranın islam həmrəyliyinə zidd olan bu siyasətini hamı yaxşı görürdü. Daha sonra İran Arazboyu ərazilərdə genişmiqyaslı hərbi təlimlərə start verdi. İndiyə qədər İran silahlı qüvvələri Araz çayı boyunca 3 dəfə hərbi təlim keçirib. Halbuki, ərazilərimiz 30 ilə yaxın işğal altında olanda, İranla olan sərhədimizin 132 kilometri Ermənistan işğalı altında olanda mövcud Tehran rejimi bir dəfə olsun hərbi təlim keçirmədi. Bununla bağlı əzələ nümayiş etdirmədi. Niyə? Ona görə ki, İran ərazilərimizin erməni işğalında qalmasında maraqlı idi. İstəmirdilər ki, Azərbaycan ərazi bütövlüyünü təmin edə bilsin. Ancaq bütün bunlara baxmayaraq, onların arzuları gözlərində qaldı. Azərbaycan zamanla güclü və müasir ordu yaratdı. Nəticədə 30 illik işğala son qoyuldu. İranın Ermənistana PUA ixrac etməsi Tehranın məkrli siyasətinin davamıdır. Ancaq hesab edirəm ki, İranın dron satışı Ermənistanın Azərbaycan üzərində üstünlüyünü təmin edə bilməyəcək. Ona görə ki, İran PUA-larının texniki göstəriciləri elə də yüksək səviyyədə deyil. İsrail və Türkiyənin Azərbaycana satdığı PUA-lar daha müasir və funksionaldır. İran dronları GPS sistemi əsasında hədəfə doğru yönəlirsə, İsrail PUA-ları videomüşahidə və lazer sistemi əsasında hədəfə çırpılır. İsrail zərbə dronları daha dəqiq və effektlidir, nəinki İran dronları. Bundan başqa, Azərbaycanın müasir hava hücumundan müdafiə sistemləri İran dronlarını zərərsizləşdirmək gücündədir”.
Bu baxımdan hərbi ekspert hesab edir ki, narahatlığa əsas yoxdur.
Vidadi ORDAHALLI
