Rusiyanın Raket və Artilleriya Elmləri üzrə İnformasiya Siyasəti Akademiyasının prezident yardımçısı, hərbi elmlər doktoru Konstantin Sivkov deyib ki, Ukrayna məsələsini həll edəndən sonra Rusiya silahlı qüvvələrinin əl-qolu açılacaq və Azərbaycanla məşğul olacaq.
Bundan əvvəl Moskva Dövlət Beynəlxalq Münasibətlər İnstitutunun (MDBMİ) Hərbi-Siyasi Araşdırmalar Mərkəzinin aparıcı eksperti Mixail Aleksandrov Azərbaycanı hədələmiş, Bakının neft yataqlarına zərbə endirilməsi gərəkdiyini demişdi.
Rusiyadakı ekspertləri bizə qarşı belə aqressivləşdirən səbəb nədir?
Siyasi şərhçi Tofiq Abbasov “Bakı-Xəbər” qəzetinə bildirdi ki, tez-tez səslənən hədələr, Azərbaycan qarşısında aparılan bu kampaniya boş yerdən yaranmayıb: “Biz görürük ki, bir neçə mənbə artıq sinxron şəkildə Azərbaycan-Rusiya münasibətlərinə və onun kontekstinə yad fikirlər səsləndirməkdədir və bu halda təsadüfdən danışmaq olmaz. Çox güman, hansısa qüvvələr artıq qarşılarına məqsəd qoyublar ki, Azərbaycanla münasibətlərə gərginlik potensialı gətirsinlər. Belə olduğu halda münasibətlərdə soyuqluq, hətta böyük problemlər yarana bilər. Çünki bu bir nəfərin və ya iki nəfərin düşüncəsi olsaydı, deyərdik ki, bəli, təsadüfdür. Ancaq biz görürük ki, müxtəlif səviyyələrdə, hətta dövlət vəzifələrində çalışan adamlar belə açıq şəkildə Azərbaycana qarşı aqressiya göstərirlər, ictimai fikirə nüfuz edərək çalışırlar Rusiya ilə Azərbaycanın əlaqələrini korlasınlar. Halbuki, bizim Rusiyaya qarşı heç bir məkrli yanaşmamız yoxdur. Bizim çox yaxşı münasibətlərimiz var. Xüsusilə yada salaq - prezidentlərimiz İlham Əliyev və Vladimir Putini etibarlı əlaqələr birləşdirir”.
Ekspertin sözlərinə görə, bir neçə dəfə də Putin bu məsələni ictimailəşdirib: “Siyasi aləmdə belə münasibətlərin olması xüsusi rol oynayır. Eləcə də göstərir ki, ölkə rəhbərləri xalqların, toplumların adından bu münasibətləri gələcəyi, perspektivi olan məcraya yönəldirlər. Ancaq bu istiqamətdə biz bəzi qüvvələrin fəallığını müşahidə edirik. Bu da təsadüfi deyil. Belə bir fikir var ki, Kremlin 7-8 qülləsi var. Onların hərəsi bir istiqamətdə hərəkət edir. Bu fikir həm bayağılaşıb, həm də köhnəlib. Əvvəl-axır dövlət siyasətini formalaşdıran bir qüllə olur. Bu da rəsmi Kremlin səsini ucaldan qüllədir. Bu baxımdan rəsmi dairələrin özündə də Azərbaycan meyllərini gücləndirmək istəyən personalar var. Onlar istəyirlər ki, belə bir zəmində yeni platforma yaratsınlar. Hələ müharibə bitməyib. Niyə öz axarı ilə gedən proseslərə maneçilik törədilsin? Sivqov bildirib: “Əllərimiz hələ ki bağlıdı, əllərimizi açaq ki, Azərbaycanla məsələni həll edək. Çünki Azərbaycan bizə maneçilik törədir. Bizim ölkəmiz üçün problem yaradır”. Sivkovun yadına salmaq lazımdır ki, 30 ildə Rusiya Azərbaycana problem yaradıb. İmkan verməyib ki, Azərbaycan öz gücü ilə Ermənistanın dərsini versin. Vladimir Putin müharibə dövründə sağlam bir fikir ifadə etdi ki, Azərbaycan öz dövründə öz ərazilərində əks-hücum əməliyyatı aparır. Biz o prosesə qatıla bilmərik. Bu yeganə saglam göstəricidir. Amma ona qədər 2016- cı ildə də Rusiya problem yaratdı, qoymadı ermənilərin dərsini verək. Bəlkə də sona kimi getsəydik yaşanan problemlər olmazdı, itkilərimiz də az olardı. Mixail Aleksandrovun yadına salmaq lazımdır ki, o şizofrenikdi. O gərək psixi xəstəliyindən müalicə alsın. Onun yeri ali məktəbin auditoriyası yox, xəstəxana palatası olmalıdır. Bir halda ki, bu adam belə danışır, gərək onunla artıq siyasilər, ya da baş istintaq orqanları yox, məhz səhiyyə məşğul olsun. Belə xəstə təxəyyüllü adam başqalarına necə dərs deyə bilər? Biri iki dövlət arasında oturuşmuş münasibətlərə belə xələl vurursa, onda auditoriyanı səhv salıb. Satanovskiyə gəldikdə isə, o çoxdanın demaqoqudur. Onun daima ikibaşlı oyunları olub. O, xüsusi orqanların agentidir. Yəhudi olmasına baxmayaraq, sionizm ideologiyasına qulluq edir. Sionistlər çox təhlükəli xəttin yolçularıdır. O, obraz olaraq mənə bazarlarda oturub dedi-qodu edən yaşlı qadınları xatırladır. Rusiyanın hakim dairələrinin bu məsələyə dözüm göstərməsi heç də yaxşı deyil”.
Məhəmmədəli QƏRİBLİ
