Azərbaycanda vətəndaş cəmiyyəti hüquqi dövlət quruculuğunda həmişə rol oynayıb. Ölkəmizlə bağlı bütün məsələlərdə vətəndaş cəmiyyəti özünü göstərib, sözünü deyib. Məlumdur ki, Azərbaycanın ayrılmaz hissəsi olan Qarabağda yaşayan separatçılar Azərbaycana məxsus yataqları qanunsuz olaraq istismar edir.
30 ildən artıqdır ki, Ermənistan və Qarabağdakı separatçılar birləşib Azərbaycanın sərvətlərini talan edir. Qarabağda faydalı qazıntı yataqlarının qanunsuz istismarı əleyhinə Xankəndi-Laçın yolunda keçirilən etiraz aksiyası artıq bir neçə gündür davam edir.
Azərbaycanda vətəndaş cəmiyyəti dövlətçilik mövqeyində...
Məlum, hava şəraitinin soyuq olmasına baxmayaraq, fasiləsiz dinc aksiyaya qoşulanların sayı da getdikcə artmaqdadır. Belə ki, dinc aksiyaya Azərbaycanın hər yerindən böyük dəstək var. Qeyd edək ki, ekofəallar, vətəndaş cəmiyyəti nümayəndələri, QHT təmsilçiləri, tələbələr, ümumilikdə bütün aksiya iştirakçıları günlərdir ki, yüksək əzm, mətanət, qətiyyət nümayiş etdirirlər. Əlbəttə, burada vətəndaş cəmiyyəti institutunun fəalları xüsusi seçilir.
Bu gün yataqların, mədənlərin qanunsuz istismarına qarşı vətəndaş cəmiyyəti də ciddi dirəniş göstərir. Sevindirici haldır ki, vətəndaş cəmiyyəti dövlətçiliyimiz naminə birləşdi və bu gün də aksiyalar keçirərək dövlətlə həmrəyliklərini ifadə edirlər. Vətəndaş cəmiyyəti təmçiləri dövlətə bu və digər şəkildə dəstək göstərirlər.
Azərbaycan Milli QHT Forumun prezidenti Rauf Zeyni “Bakı-Xəbər”ə bildirdi ki, ölkənin vətəndaş cəmiyyəti institutları hər zaman dövlət maraqları naminə addımlar atıb. “Artıq on gündür ki, Azərbaycan qeyri-hökumət təşkilatları separatçılar tərəfindən həyata keçirilən ekoloji terrora etiraz edir. Bilirsiz ki, bizim Qarabğdakı sərvətlərimiz beynəlxalq hüquq normalarına, beynəlxalq qanunvericiliyə zidd olaraq talanır. Buna etiraz olaraq bizim ekofəallarımız, QHT-lər, gənclər təşkilatları, könüllülər, bütövlükdə vətəndaş cəmiyyəti bir səngərdə birləşərək Şuşa-Xankəndi yolunda dinc ictimai aksiyalar keçirir və dünyaya çağırış eidr ki, ölkəmizin ərazisində separatçılar tərəfindən aparılan ekoloji terrora son qoyulsun, dayandırılsın, Azərbaycanın qanuni hüquqları bərpa olunsun. Ona görə də artıq 10-cu gündür ki, (11) xalqımızın haqq səsi, haqlı səsi vətəndaş cəmiyyətinin fədailəri, ictimai liderlər tərəfindən yayılır. Ekoloji fəalların bu haqq işinə demək olar ki, bütün vətəndaş cəmiyyəti institutları qoşulub. Hamımız bu aksiyanı dəstəkləyirik. Aksiya ilə əlaqədar olaraq bütün QHT-lər mövqeyini bildirir və hər kəs orada iştirak etmək üçün sözügedən bölgəyə getmək istəyir. Bununla əlaqədar olaraq müraciət edirlər, dinc aksiyanı dəstəkləyirlər. Bizim də məqsədimiz ondan ibarətdir ki, nəhayət Azərbaycan vətəndaşlarının aidiyyəti dövlət qurumlarının Azərbaycan ərazisində sərbəst hərəkət etməsinə imkan verilsin və Rusiya sülhməramlıları öz missiyalarına uyğun orada xidmətlərini davam etdirsinlər və öz mandatlarından kənara çıxmasınlar. Hər hansı bir formada orada qanunsuz hərbi birləşmələrin, sərvətlərimizi qanunsuz talayanların və ora qanunsuz səfər edənlərin qarşısı alınmalıdır. Halbuki, onlara orada sərbəst gəzməyə icazə verilir, amma bizim vətəndaşlarımıza maneçilik törədilir. Bizim məmurlarımızın istənilən vaxt gedib ərazimizdə monitorinq aparmasına, hər hansı formada hərəkət etməsinə imkan verməmək, monitorinqi məhdudlaşdırmaq hüquqlarımızın pozulması və Rusiya sülhməramlılarının öz mandatından kənara çıxması, özbaşnalığı deməkdir. Ona görə də bunun qarşısı alınmalıdır”.
“Bütün dünyanı da aksiyanı dəstəkləməyə səsləyirlər”
R.Zeyni qeyd etdi ki, vətəndaş cəmiyyəti institunun tələbləri aydındır və qanunsuz istismara son qoyulsun, vətəndaşlarımızın öz doğma ərazisində azad, sərbəst gəzməsinə, monitorinq aparmasına şərait yaradılmalıdır. Azərbaycan QHT-lərinin və vətəndaş cəmiyyəti institutlarının keçirdiyi dinc aksiyaların nəticə verəcəyinə ümid edən R.Zeyni hesab edir ki, Azərbaycanın səsi dünyaya çatdırılır: “Təbii ki, bütün dünyanı da aksiyanı dəstəkləməyə səsləyirlər. Bu mənada biz bu aksiyanı sona qədər davam etdirəcəyik və bizim qeyri-hökumət təşkilatlarının haqlı tələbi yetirilənə qədər bu aksiyalar davam edəcək. Mən fürsətdən istifadə edib bu aksiyalarda iştirak edən, bu aksiyaları dəstəkləyən bütün qeyri-hökumət təşkilatlarına öz dərin minnətdarlığımı bildirirəm. Bəzi insanlar sağlamlığında mövcud olan problemlə bağlı o aksiyalarda iştirak edə bilməyiblər, amma onlar da mənəvi-ictimai dəstəklərini hər zaman bildiriblər. Sosial şəbəkələrdə, media orqanlarında bütövlükdə vətəndaş cəmiyyəti, bütün vətəndaşlar, dünya azərbaycanlıları bu aksiyanı dəstəkləyirlər” - deyə R.Zeyni bildirdi.
Qeyd edək ki, uzun illərdir ki, “Qızılbulaq” və “Dəmirli” yataqları ermənilər, Ermənistan dövləti və onların havadarları tərəfindən qanunsuz olaraq istismar edilməsinə beynəlxalq aləmin münasibət bildirməsi üçün QHT-lər, vətəndaş cəmiyyəti institutları durmadan çalışır. Azərbaycanın səsini dünyaya çatdırmaq üçün böyük əziyyətlər çəkən bu insanlar həqiqətləri dünya birliyinə çatdırır və separatçıların Azərbaycan ərazisində yataqları qanunsuz taladığını bəyan edir. Əlbəttə, bu məsələdə həm QHT-lər, həm də dövlət qurumları həmrəylik göstərir və ortaya iradə qoyurlar. Onların səsinin uzaqlara çatacağına əminik, yetər ki, əl və əmək birliyi daimi olsun!
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
