Son günlər Naxçıvanda baş verən hadisələr medianın əsas diqqət mərkəzindədir. Bütün bunların fonunda Naxçıvanın Ali Məclisinin sədri Vasif Talıbovun ünvanına kifayət qədər sərt ittihamlar səslənir.
Cəmiyyətdə əsas müzakirə mövzusu olan suallara aydınlıq gətirmək üçün əslən Naxçıvandan olan siyasətçi, Cümhuriyyət Xalq Partiyasının rəhbəri Bədrəddin Quliyevlə həmsöhbət olduq:
- Naxçıvanda aparılan antikorrupsiya həbsləri zamanı maraqlı məqam ortaya çıxdı. Rəsmən elan edildi ki, həbs edilən 3 vəzifəli şəxs ümumilikdə yarım milyard vəsait mənimsəyib. Bunu MR rəhbərliyindən gizli etmək olardımı?
- Muxtar Respublikanın korrupsiyada ittiham edilən nazirləri Vasif Talıbovdan başqa heç kəsə hesabat vermirdilər. Mərkəzi büdcədən də Naxçıvana çox iri həcmdə vəsait ayrılıb. Bu məbləğdə vəsaitin təklikdə mənimsənilməsi qeyri-mümkündür. Orada “muxtar” qaydada çalışan bir korrupsiya mexanizmi qurulmuşdu.
- Belə iddialar var ki, Naxçıvanda bizimlə düşmən mövqedə olan təriqətlərin kök salmasına şərait yaradılıb. Bununla bağlı nə deyə bilərsiniz?
- Bu olduqca ciddi ittihamdır. Güman edirəm ki, DTX orada nə varsa araşdırır. Bu cür mövzularda biz prosesləri qabaqlamamalıyıq. Hər halda, rəsmi araşdırmaların sonunu gözləyək. Belə mövzularla bağlı yalnız rəsmi məlumatlara əsaslanaraq nəsə demək olar.
- Baş verən son hadisələrdən sonra Naxçıvanda nə dəyişib?
- İlk növbədə oradakı insanların Azərbaycan dövlətinə olan inamı artıb. Neçə illərdir oradakı insanların şikayətinə baxılmayıb. Hazırda insanlar özündə inam tapıb həmin şikayətləri əlaqədar dövlət qurumlarının diqqətinə çatdırırlar. Mən özüm də çıxışlarımda yerli əhalini şikayətlərini DTX-nın yeni heyətinə çatdırmağa səsləyirəm. Qoy xalqın nə dərdi varsa, söyləsin.
- 44 günlük müharibənin son günü Naxçıvanın Ermənistanla sərhədində Rusiyaya məxsus helikopter vuruldu. Ondan sonra Bakıya raket atıldı və Üçtərəfli Saziş imzalandı. Bununla bağlı da MR rəhbərliyinin ünvanına ciddi ittihamlar səslənir. Buna münasibətiniz necədi?
- Bu mövzu ilə bağlı rəsmi heç bir məlumat eşitməmişəm. Yalnız ictimai müzakirələrin aparıldığının şahidiyəm. Belə məsələ varsa, buna Müdafiə Nazirliyi, DTX və Baş Prokurorluq səviyyəsində aydınlıq gətirilməlidir. Hətta bu həqiqətdirsə, onda bunun niyə gizlədildiyi ilə bağlı sual yaranır. Çünki belə məlumatın gizlədilməsinin özü dövləti cinayətdir.
- Siyasi partiyaların çoxunun MR-də özəkləri olub, onlar niyə bu neqativliklər barədə məlumat verməyiblər?
- Naxçıvanda açıq siyasi fəaliyyət olmayıb. Hətta sadə vətəndaş şikayətləri belə Prezident Administrasiyasına çatdırılmayıb. Bəzi şikayətçiləri “dəlixanaya” da saldırırdılar. Partiyaların şöbələrinin orada olması formal xarakter daşıyıb. Bizim özümüz də üzvlərimizin həyatını risqə ataraq açıq fəaliyyətini istəməmişik. Bunun üçün münbit şərait olmayıb. Güman edirəm ki, bu yeniliklər həm də Naxçıvandakı siyasi mühiti sağlamlaşdıracaq.
Məhəmmədəli QƏRİBLİ
