“Azərbaycanlılar deyəndə ki yolu onlar bağlamayıb, qəribə də olsa, doğru deyirlər”. Bunu Ermənistanın Avropa Partiyasının lideri Tiqran Xzmalyan deyib. O bəyan edib ki, ekoloji fəallar magistral yolu bağlamayıb, Laçın yolunu Rusiya sülhməramlıları bağlayıb: “Ruslar yolu hər iki tərəfdən bağlayıb”.
Görünən odur ki, artıq o yoldan humanitar yükləri aparan avtomobillər sərbəst şəkildə hərəkət edə bilir. Baxmayaraq ki, azərbaycanlı aktivistlər ordadır. Bu o deməkdir ki, Ermənistanda bəzilərinin haray-qışqırıq saldığı kimi yolu biz bağlamamışıq. Azərbaycanın yolu bağladığı barədə deyilənlər yalandır və bu sübut olunur. İkincisi də, Azərbaycan o yoldan ancaq humanitar məqsədlərlə istifadə olunması normativinə güc verib. Görünən odur ki, oradan ancaq humanitar yüklərin aparılması məsələsini artıq biz işə sala bilmişik. Aksiyaçıların orada olması Xankəndiyə şübhəli yüklərin aparılmasını önləyib. Bu da əslində aksiyaçıların böyük uğuru kimi qəbul olunamalıdır. Deməli, iki məsələ - birrincisi yolun azərbaycanlılar tərəfindən bağlanmadığı sübuta yetirilir. İkincisi də, azərbaycanlılar o yoldan ancaq humanitar məqsədlərlə istifadə olunması üzərində tam nəzarəti ələ alıblar.
“Onlar, sadəcə, Qarabağa şübhəli hərbi yüklərin daşınmasına mane olur”
Məsələyə münasibət bildirən ekspert Azər Həsrətin fikrincə, bütün bunlar azərbaycanlıların yolu bağlamadığını əyani şəkildə sübut edir: “Əvvəla, biz nəzərə almalıyıq ki, Qarabağda sülhməramlıların nəzarət etdiyi ərazidə vəziyyətin hakimi Rusiyadır. Onlar orada yolu açırlar da, bağlayırlar da. Bütün bunları edən ruslardır. Əslində Qarabağda qalan erməni əhalinin böyük əksəriyyəti müharibə başa çatandan sonra Azərbaycan vətəndaşı olmağa hazır idi. Bununla bağlı siqnallar gəlirdi. Ancaq Rusiya sülhməramlıları ora yerləşdikdən sonra çox qısa zamanda təbliğat apardılar. Bu işə yaramayanda digər təzyiq vasitələrinə əl atdılar. Qondarma “rus icması” yaratdılar və s. Bütün vasitələrlə elə görüntü yaratdılar ki, guya etnik ermənilər Azərbaycan vətəndaşı olmaq istəmir. İkinci bir tərəfdən, Azərbaycan dövlət qurumlarının təmsilçilərinin gedib o yataqlarda monitorinq aparmasını əngəlləyən əslində Rusiya sülhməramlıları idi. Sülhməramlıların marağı olsaydı, monitorinqin aparılmasına kimsə mane ola bilməzdi. Çünki Rusiya azərbaycanlı və erməni icmaları arasında təmasların baş tutmasında maraqlı deyil. Ona görə də ara-sıra təxribatlar törədirlər. Bununla görüntü yaradırlar ki, guya Azərbaycan erməni əhalini qorxu altında saxlayır. Laçın yolunda azərbaycanlı etirazçılar həm bəyan edirlər, həm də sübut edirlər ki, o yolu bağlamayıblar. Yol açıqdır və istənilən dinc insan ordan keçmək istəyirsə buyursun. Reallıq da göstərir ki, azərbaycanlı etirazçılar buna mane olmur. Onlar, sadəcə, Qarabağa şübhəli hərbi yüklərin daşınmasına mane olur. Yolu açıb-bağlayan Rusiya sülhməramlılarıdır. Başqa bir tərəfdən, Rusiyanın media resursları, telekanalları Azərbaycana qarşı təbliğat aparırlar. Sevindirici hal odur ki, artıq Qarabağdakı etnik ermənilər Azərbaycana müraciət edir. Belə vəziyyətdən bezdiklərini deyirlər. İndi Ermənistanda da bəzi siyasilər bunun fərqindədi. Fərqində olduqlarına görə də ya birbaşa, ya da dolayısı ilə real vəziyyəti etiraf etməyə məcburdular. Ermənistanın Avropa Partiyasının liderinin dedikləri bu qənaətə gəlməyə əsas verir. Bu o deməkdir ki, Ermənistanda hamı vicdanını itirməyib. Ədalətli yanaşanlar da var”.
Vidadi ORDAHALLI
