Qarabağda peyda olan erməni əsilli milyarder Ruben Vardanyanın burada törətmək istədiyi növbəti təxribat baş tutmayıb. Ruben Vardanyan 17 dekabra mitinq təyin etmişdi. Saat 15:00-a Xankəndinin mərkəzinə erməni icmasını çağıran Vardanyan “34 il əvvəl olduğu kimi” yenidən birlik nümayiş etdirmək gərəkdiyini söyləmişdi.
Vardanyanın elan etdiyi “mitinq”dən saatlar keçməsinə baxmayaraq, heç bir toplantıya rast gəlinmədi.
Yəqin ki, Vardanyan bu aksiyanı Ermənistandan avtobuslara doldurulub gətirəcəyi muzdlu adamlar hesabına keçirmək istəyirmiş. Görünür, Laçın yolunda hərəkət məhdudlaşdığından o, Ermənistandan lazım olan sayda erməni gətirə bilmir.
Maraqlıdır ki, mitinqin azsaylı aksiyaçılarla keçirildiyi haqda da informasiya yoxdur. Belə aydın olur ki, Vardanyan tam rüsvay olub – hətta Xankəndidəki azsaylı erməni icmasından da aksiyaya qatılmaq istəyən tapılmayıb. Vardanyanın bu vəziyyətə düşməsinin başqa hansı ilginc səbəbləri ola bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, 17 dekabra təyin olunan aksiya baş tutmayıb: “Amma dedikləri kimi, əgər kecmiş “Dağlıq Qarabağ” ərazisində on minlərlə erməni yaşayır və 120 min əhali varsa, bizim fəallarımız tərəfindən aksiya keçirilən günün ertəsi günü onlar aksiya keçirməli idi. 120 min erməni meydana gəlsə idi, bununla da heç bir çağırışa ehtiyac olmadan aksiyaları baş tutardı. Deməli, növbəti yalan ortaya çıxdı. İkinci yalan o idi ki, bundan əvvəl keçirilən aksiyada Qarabağ erməniləri deyil, İrəvandan gətirilmiş, pul müqabilində yalandan yığılan insanlar olub. Güya dünyaya göstərmək istəyirdilər ki, Qarabağ erməniləri Azərbaycana etiraz edir. Artıq çıxılmaz vəziyyətdədirlər. Yoldan istifadə edə bilməmələri onları bu vəziyyətə saldı və bütün çılpaqlığı ilə ordakı ermənilərin sayını ortaya qoydu. Bu da Qarabağla bağlı bir daha erməni təbliğatının yalan olduğunu göstərdi. Rusların yalandan tez-tələsik avtobusla Xankəndidən adam qaytarması cəfəngiyyatdır. Reallıqlar var. Qarabağ erməniləri də anlayır ki, o torpaqlarda Azərbaycansız onların gələcəyi yoxdur. Razılasacaqlarsa orada qala bilərlər. Əks halda oranı tərk etməlidirlər. Çünki hamı kimi, Vardanyan-Arutyunyan da anlayır ki, Azərbaycanın ərazi bütövlüyü mübahisə predmeti deyil, Xankəndi Azərbaycandır. Xankəndiyə Azərbaycan bayrağının asılmasını sadəcə ləngitməyə çalışırlar ki, daha çox talasınlar”.
Görünən budur ki, bizim ekoloji tələblə bağlı keçirdiyimiz aksiya günü-gündən genişlənir, onlara yeni adamlar qoşulur. Xankəndidə isə yolun bağlı qalmasından dolayı yaranmış iqtisadi, psixoloji gərginlik yavaş-yavaş siyasi səhnəyə transfer edir. Separatçı rejimin rəhbərliyində Azərbaycan hökumətinin beynəlxalq hüquqa, ədalətə əsaslanan mövqeyinə qarşı cinayətkar davranışla bağlı fikir ayrılığı müşahidə olunmağa başlayıb.
Görünən budur ki, Qarabağdakı separatçılar sakit oturmaq fikrində də deyillər. Vardanyanın ardından separatçıların daha bir nümayəndəsi, özünü “deputat” elan etmiş Qeqam Stepanyan da ermənilərə müraciət edərək, onları aksiyaya çağırıb. Stepanyan bununla bağlı müraciətində deyib ki, Xankəndi və digər şəhərlərdə etiraz aksiyaları təşkil etsinlər.
Təbiidir ki, ermənilərin belə davranışları heç nəyi dəyişə bilməz. Faktiki olaraq, Qarabağda yaşayan ermənilərin sayı da hər kəsə məlumdur. Onların hamısı küçəyə çıxsa belə, bu Azərbaycanın mövqeyinə zərrə qədər təsir edə bilməyəcək.
Məhəmmədəli QƏRİBLİ
