“Quruda külək və günəş enerjisinin həcmi 27 qiqavatdan çoxdur, Xəzər dənizinin Azərbaycan sektorunda isə külək enerjisi 157 qiqavat təşkil edir”. Bu fikri Prezident İlham Əliyev Buxarestdə “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in imzalanması mərasimi ilə bağlı keçirilən plenar iclasdakı çıxışında deyib.
Ölkə başçısının sözlərinə görə, Azərbaycan bərpa olunan enerjidən əldə olunacaq elektrik enerjisinin 80 faizini ixrac edəcək: “Ölkəmiz Avropanın mühüm elektrik enerjisi, əsasən, yaşıl enerji təchizatçısına çevrilməyi planlaşdırır. Azərbaycanın bərpaolunan enerji potensialına gəldikdə, quruda külək və günəş enerjisinin həcmi 27 qiqavatdan çoxdur, Xəzər dənizinin Azərbaycan sektorunda isə külək enerjisi 157 qiqavat təşkil edir. Ölkəmizin strateji investorlarının biri ilə biz 2027-ci ilə qədər 3 qiqavat külək və 1 qiqavat günəş enerjisini istehsal etməyi planlaşdırırıq. Onların 80 faizi ixrac olunacaq”.
“Elektrik enerjisinin ixrac olunması Azərbaycanın strateji mövqeyini daha da möhkəmləndirəcək”
Məsələyə münasibət bildirən millət vəkili Vüqar Bayramovun fikrincə, bütün bunlar Azərbaycanın böyük ixrac potensialı olmasından xəbər verir: “Məsələ ondadır ki, bu sahədə Azərbaycanın potensialı böyükdür. Həm yerli tələbatı ödəmək baxımından, həm də ixrac üçün potensial böyükdür. Digər tərəfdən, bərpa olunan enerji mənbələrində istehsal edilən enerjinin həcmində artımlar var. Bunu statistik rəqəmlər də təsdiq edir. Bu ilin ilk 10 ayında bütövlükdə enerji istehsalı üzrə təxminən 4 faiz, bərpa olunan enerji mənbələrindən istehsal 5 faiz artıb. Ümumilikdə, bu, ciddi artımdır. Çünki bütün bunlar ondan xəbər verir ki, bərpa olunan enerjinin ümumi elektrik enerjisi istehsalında payı artır. Nəzərə almaq lazımdır ki, Azərbaycan hələlik 4 ölkəyə elektrik enerjisi ixrac edir. Ancaq istehsal artdıqca ixracın miqyası daha da genişlənəcək. Yəni, ixrac təkcə 4 ölkə ilə məhdudlaşmayacaq. Gözlənilir ki, Azərbaycandan Avropa İttifaqına da elektrik enerjisi ixracı həyata keçiriləcək. Çünki Avropa ölkələrində hər il elektrilk enerjisinə olan tələbat artır. İlbəil artan tələbatın bir hissəsini bu ölkələr idxal hesabına təmin edir. Bütün bunlar əlbəttə ki, Azərbaycana olan marağı artırır. Başqa bir tərəfdən, bərpa olunan enerji mənbələrindən alınan elektrik enerjisinin ixrac olunması Azərbaycanın strateji mövqeyini daha da möhkəmləndirəcək. Bu, bir tərəfdən Azərbaycanın Avropanın enerji təhlükəsizliyində rolunun artırılmasına, digər tərəfdən ixracdan ölkəyə daha çox vəsaitin daxil olmasına xidmət edəcək. Ona görə də sözügedən sahədə mövcud potensialdan ixrac məqsədi üçün istifadə olunması mühüm əhəmiyyət kəsb edir. O üzdən, bu imkanlardan maksimum səmərəli istifadə etmək lazımdır. Ona görə də Avroittifaqla enerji sahəsində əməkdaşlığın genişləndirilməsi, Azərbaycanın regiondakı mövqeyinin daha da güclənməsinə gətirib çıxaracaq. Bununla belə, yeni iqtisadi imkanların yaranmasına əlverişli zəmin yaradacaq. Bir sözlə, bunun geniş və çoxşaxəli fayda verəcəyi qənaətindəyəm”.
Millət vəkili onu da əlavə etdi ki, əldə olunan anlaşma bütün tərəflərin xeyrinə olacaq.
Vidadi ORDAHALLI
