Ermənistanın baş naziri Nikol Paşinyan sentyabrın 22-də BMT Baş Assambleyasının 77-ci sessiyasında özünü yenidən dünyanın gülüş hədəfinə çevirdikdən sonra yenə də BMT-də səsləndirdiyi cəfəngiyyatlarını davam etdirib.
Ermənistanın Baş naziri "Twitter" mikrobloqunda bildirib ki, İrəvan Azərbaycanın Ermənistanın ərazi bütövlüyünü tanıyıb-tanımaması ilə bağlı suala cavab almayıb: “BMT-dəki çıxışımda sadə bir sual verdim: Azərbaycan Ermənistanın beynəlxalq səviyyədə tanınmış sərhədləri daxilində ərazi bütövlüyünü tanıyırmı? Əgər belədirsə, onda sülh sazişinə getmək lazımdır. Təəssüf ki, hələlik müsbət reaksiya yoxdur. Sual budur ki, niyə?”
Xatırladaq ki, BMT Baş Assambleyasının 77-ci sessiyasında çıxış edən Paşinyan Azərbaycan Prezidenti İlham Əliyevdən Ermənistanın tanıyacağı xəritəni göstərməsini xahiş edib.
N.Paşinyan deyib ki, Azərbaycan Ermənistanın ərazi bütövlüyünü tanımayıb. Sual olunur, əgər BMT Ermənistanın ərazi bütövlüyünü tanıyıbsa, demək Azərbaycan da tanıyıb. Bu öz yerində. Məlumdur ki, Ermənistan ərazi bütövlüyü məsələsinə normal yanaşmır, o, “ərazi bütövlüyü” deyəndə Qarabağı Ermənistanın tərkibində görür. Bunu Azərbaycan necə tanıya bilər? Yaxud da ki, BMT Ermənistanın ərazi bütövlüyünü Qarabağla bir yerdəmi tanıyıb?
Ekspertlər deyir ki, əslində Paşinyanın cavabını BMT rəhbərliyi BMT Baş Assambleyasının 77-ci sessiyasında verməli idi. Yəni BMT rəhbərliyi ədalətli olsaydı Paşinyana yerindəcə cavab verərdi və o, Ermənistana qayıtdıqdan sonra sərsəmləmələrini davam etdirməzdi.
“Ermənistan həmin dövrdən indiyə qədər Azərbaycanın ərazi bütövlüyünü tanımayıb...”
AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə şərhində bildirdi ki, Ermənisanın baş naziri yenə də öz ənənəsinə sadiq qalaraq beynəlxalq aləmi çaşdırmağa çalışır: “İndiki vəziyyətdə Ermənistan dünya qarşısında tamamilə riyakar bir mövqedən çıxış edir və beynəlxalq aləmi çaşdırmağa çalışır. Əgər söhbət ərazi bütövlüyü məsələsindən gedirsə, Azərbaycan və Ermənistan 1991-ci ildə dövlət müstəqilliyini bərpa etdikdən sonra BMT tərəfindən sərhədləri daxilində tanınıb. Ermənistan həmin dövrdən indiyə qədər Azərbaycanın ərazi bütövlüyünü tanımayıb, millətlərin öz müqəddəratını təyin etmək hüququ bəhanəsi ilə Qarabağa qarşı ərazi iddiası irəli sürüb. Nəinki Qarabağa, hətta digər ərazilərimizə qarşı da əsassız iddialar edib. İndiki dövrə və 12-13 sentyabrdan sonrakı vəziyyətə gəlincə, bilirsiz ki, Azərbaycan və Ermənistan arasında uzunmüddətli sərhəd məsələsi həll olunmayıb. Azərbaycan təklif verir, saziş imzalamağa 5 prinsip irəli sürür, komissiya yaranıb, amma Ermənistan müstəqil siyasət yeridə bilmədiyinə, forpost olduğuna görə onun başına ip salıb fırlayırlar, o da hər dəfə bir söz deməklə canını qurtarmaq istəyir. Əgər normal bir dövlət olsaydı, normal siyasət yeritsəydi bu problemlər çoxdan həll olunardı. İndiki dövrdə Azərbaycanla Ermənistan arasında sərhədlər müəyyən olunmadığına görə hər hansı bir ərazini tutmaq, əraziyə girmək, öz ərazisi kimi təqdim etmək məsələsi düzgün yanaşma deyil. Qaldı ərazi məsələsinə, BMT-yə qədər Birinci Dünya müharibəsindən sonra yaranan beynəlxalq qurumlar var. Xəritə məsələsinə gəlincə, biz xəritələri irəli sürə bilərik. Cümhuriyyət dövründən əvvəlki dövrün xəritəsini də, Cumhuriyyət dövrünün xəritəsini də təqdim edə bilərik. Məsələn, Cumhuriyyət dövrü xəritəsində sərhəd Göyçə gölünün içindən keçir, Zəngəzur tam Azərbaycan ərazisidir”.
M.Zülfüqarlının sözlərinə görə, xanlıqlar dövrünü götürsək, Ermənistan adlı dövlətdən söhbət gedə bilməz, ermənilər burada yaşamayıb, onlar bura Türkmənçaydan sonra köçürülüblər. Köhnə xəritələrin heç birində Ermənistanın izi-tozu olmadığını deyən M.Zülfüqarlı deyir ki, Azərbaycan müasir dövrdə beynəlxalq hüquqa hörmətlə yanaşdığı üçün biz Ermənistandan Azərbaycanın ərazi bütövlüyünü tanımasını tələb edirik. “Biz Ermənistandan tələb edirik ki, sən Azərbaycanın ərazi bütövlüyünü tanı, biz də səni BMT-yə daxil olarkən qəbul olunmuş sərhədlər daxilində tanıyırıq və bu sərhədləri də bir yerdə komissiya vasitəsilə müəyyən edək. Doğrudan da, müstəqilliyin bərpasından sonra, hətta SSRİ dövründən sərhədlər düzgün bölünməyib, müəyyən edilməyib. Bu problem hətta Rusiya ilə Azərbaycan, Azərbaycanla Gürcüstan arasında da var. Bunları tənzimləmək lazımdır. Sadəcə olaraq Ermənistan daim razılaşmadan qaçmaqla və beynəlxalq aləmdə məsuliyyətsiz fikirlər irəli sürməklə işini bitmiş hesab edir. Azərbaycan qalib dövlətdir və Ermənistan artıq bəhanələrlə heç bir şey edə bilməz. İndi çalışmalıyıq ki, BMT-də qəbul olunan sərhədlər daxilində Ermənistan Azərbaycanın ərazi bütövlüyünü tanısın və Azərbaycan ərazisində olan erməni hərbi birləşmələri də təcili ərazimizdən çıxsın. Azərbaycan-Ermənistan sərhədləri yaranməş komissiya ilə birgə müəyyən edilsin. Yeganə çıxış yolu da budur, Azərbaycan da bunu istəyir. Əgər belə olmazsa Azərbaycan necə ki Qarabağ münaqişəsini öz gücünə həll etdi, sərhəd problemini də öz gücünə həll etmək iqtidarına malikdir. Biz beynəlxalq hüquqa söykənərək öz hüquqlarımızı, öz ərazi bütövlüyümüzü müdafiə etməyə hazırıq”.
M.Zülfüqarlı qeyd etdi ki, Qarabağ BMT tərəfindən Azərbaycan ərazisi olaraq tanınıb: “Qarabağ BMT tərəfindən Azərbaycanın sərhədləri daxilində tanınıb. BMT rəsmən Qarabağı Azərbaycan ərazisi olaraq tanıyıb. BMT Təhlükəsizlik Şurasının 4 qətnaməsinin olduğu da məlumdur. BMT rəhbərliyi Paşinyanın cəfəngiyyat danışdığını çox yaxşı bilir və gərək orada ona Ermənistanın işğalçı olduğu xatırladıla idi. Qarabağ Azərbaycanın ərazisidir”.
İradə SARIYEVA
