Tək YAP daxili islahatlar kursundan hələlik kənardadır - hakim partiyada islahatlar qaçılmaz sayılır…

Musa Musayev: “Belə bir söhbət olsaydı, mən mütləq bundan xəbərdar olardım”

img

Yeni Azərbaycan Partiyası özünün qurultayını keçirəcək. Bu barədə hakim partiyadakı mənbələr mediaya açıqlamasında bildirib. Məlumata görə, YAP-ın budəfəki qurultayı əvvəlkilərdən xeyli fərqli olacaq. Belə ki, hakim partiyanın İdarə Heyəti və Siyasi Şurasında olan bir sıra ünlü şəxslər öz postlarından kənarlaşdırılacaq.

Mənbə YAP rəhbərliyindən kənarlaşdırılacaq bəzi şəxslərin  kimliyini də açıqlayıb. Bildirilir ki, qurultayda YAP sədrinin 4 müavinindən 2-si öz postu ilə vidalaşacaq. Məlumata görə, Siyasi Şuranın da tərkibi tamamilə yenilənəcək.

Ölkədəki indiki siyasi vəziyyətə YAP-ın qurultayının hansı təsiri ola bilər?

YAP Siyasi Şurasının üzvü, sabiq millət vəkili Musa Musayev “Bakı-Xəbər”ə açıqlamasında bildirdi ki, hələlik bunlar yalnız şayiə formasında danışılır: “Belə məlumatlara mediada mən də rast gəlmişəm, ancaq bunu əsaslı saymıram. Hətta kimlərinsə vəzifədən gedəcəyilə bağlı uzun bir siyahı da tərtib ediblər. İndidən kim bu proqnozu verə bilər? YAP-ın qurultayı iki ildən bir baş tutur. Son qurultaydan keçən vaxt bu zamanı doldurur. Yəni əslində qurultayın vaxtıdır. Ancaq pandemiya şəraiti buna bir qədər maneçilik törədir. Bilirsiniz ki, kütləvi tədbirlərin keçirilməsi mümkün deyil. YAP-ın qurultay keçirməyə ehtiyacı var. Hesab edirəm ki, partiyanın İdarə Heyətindən tutmuş, bütün strukturlarına kimi yeniliyə ehtiyac var. Təbiidir ki, bu böyük partiyanın daxilində və ətrafında baş verən proseslərin ölkənin siyasi mühitinə də ciddi təsiri olur. Əgər YAP qurultay keçirmək fikrinə düşsə, onda gərək müəyyən addımlar atılsın. İlk növbədə rayon, şəhər təşkilatlarının konfransları keçirilir. Həmin konfranslardan qurultaya nümayəndələr irəli sürülür. Hələ ki, heç bir təşkilatda belə bir konfrans keçirilməyib. Digər tərəfdən isə bunun üçün Siyasi Şura və İdarə Heyəti yığışır icra katibliyinə və  qurultayın keçirilməsilə bağlı qərar qəbul edirlər. Ondan sonra yerlərə  nümayəndələr gedir və yerli təşkilatlarda konfranslar keçirir”.

Müsahibimizin sözlərinə görə, onda belə bir məlumat yoxdur: “Mən YAP Siyasi Şurasının üzvüyəm. Belə bir söhbət olsaydı, mən mütləq bundan xəbərdar olardım. Cənab Prezidentin son dəfə namizədliyini irəli sürəndə bizim qurultay keçirilib. Əslində keçirilməsinin vaxtıdır. Hələlik isə bu barədə ciddi söhbət yoxdur. Təmsil olnduğum partiyada islahatları zəruri və qaçılmaz sayıram”.

Məhəmmədəli QƏRİBLİ

Son xəbərlər