Ombudsman institutu yarandığı gündən hər il dünyaya Xocalı müraciəti edir - real nəticənin təhlili aparılırmı...

img

Xəbər verildiyi kimi, Azərbaycan Respublikasının İnsan hüquqları üzrə müvəkkili (ombudsman) Səbinə Əliyeva Xocalı soyqırımının 29-cu ildönümü ilə əlaqədar bəyanat verib.

Bəyanat BMT-nin Baş katibinə, Təhlükəsizlik Şurasına, qurumun insan hüquqları üzrə ali komissarına, qaçqınlar üzrə ali komissarına, İnsan Hüquqları Şurasına, UNICEF-in, UNESCO-nun, Avropa İttifaqının, Avropa Şurasının, ATƏT-in rəhbərlərinə, Beynəlxalq və Avropa Ombudsmanlar İnstitutlarına, Asiya Ombudsmanlar Assosiasiyasına, İslam Əməkdaşlıq Təşkilatına və bu quruma üzv dövlətlərin Ombudsmanlar Assosiasiyasına, İslam Əməkdaşlıq Təşkilatının Müstəqil Daimi İnsan Hüquqları Komissiyasına, Avropa Uşaq Hüquqları Ombudsmanları Şəbəkəsinə, Beynəlxalq Sülh Bürosuna, müxtəlif ölkələrin ombudsmanlarına və milli insan hüquqları institutlarına, Azərbaycan Respublikasının xarici ölkələrdəki və xarici ölkələrin respublikamızdakı səfirliklərinə, Azərbaycanın diaspor təşkilatlarına göndərilib.

Bir sıra beynəlxalq qurumlara göndərilən sözügedən bəyanatda ermənilərin Xocalıda dinc insanlara qarşı törətdikləri soyqırımdan, insanlıq əleyhinə cinayətlərdən, bunun beynəlxalq konvensiyalara zidd olmasından və s. məsələlərdən bəhs olunub.

O da məlumdur ki, ombudsman institutu yaradılandan, yəni 2002-ci ildən bəri hər il Xocalı ilə bağlı beynəlxalq qurumlara müraciət edir. Bir növ, qurumun sözügedən məsələ ilə bağlı müraciət etməsi ənənə halını alıb. İndiyə qədər əvvəlki ombudsman Elmira Süleymanova dəfələrlə müraciət edib. Ancaq bu müraciətlərin real olaraq hansı nəticələr və hansı reaksiyalar doğurmasının monitorinqi aparılmayıb. İndiyə qədər dünyada tanınmış Xocalı genosidi qərarlarının hansı hissəsi ombudsmanın payına düşür? Bu istiqamətdə ombudsmanın işi nə qədər səmərəli sayıla bilər?

  • Elşad Musayev: “Təkcə hansısa beynəlxalq quruma formal müraciət etməklə kifayətlənmək olmaz”

Məsələyə münasibət bildirən Böyük Azərbaycan Partiyasının sədri Elşad Musayev ombudsmanın indiyə qədər bu yöndə fəaliyyətini o qədər də qənaətbəxş saymır: “Düzdür, sözügedən inistitut bununla bağlı hər il müraciət edir. Ancaq bu müraciətlərin nəticələrinin real təhlili barədə hər hansı bir fəaliyyət müşahidə olunmayıb. Belə bir şey olsaydı, o zaman hər halda bu, ictimaiyyətə bəlli olardı. Bir növ, bu kimi müraciətlər formal təsir bağışlayıb. Başda ombudsman olmaqla, digər qurumlar daim sözügedən məsələni gündəmdə saxlamalıdır. Ona görə ki, Xocalı həqiqətlərinin dünyada tanıdılması olduqca vacib məsələdir. Təkcə hansısa beynəlxalq quruma formal müraciət etməklə kifayətlənmək olmaz. Bu yöndə davamlı işləmək lazımdır. Çünki görürsən ki, ortada heç nə olmadan ermənilər ajiotaj yaradırlar. Ancaq biz öz faciəmizi sanki düz-əməlli təqdim etməyə çəkinirik. Ona görə də biz Xocalı soyqırımını dünyaya tanıtmalıyıq”.

  • Əli Orucov: “Düşünmürəm ki, Xocalı ilə bağlı qəbul olunan qətnamələrdə ombudsmanın hansısa rolu olub”

AMİP funksioneri Əli Orucov isə hesab edir ki, ombudsmanın indiyədək bu yöndə fəaliyyəti formal xarakterli olub: “Düşünmürəm ki, Xocalı ilə bağlı qəbul olunan qətnamələrdə ombudsmanın hansısa rolu olub. Belə bir şey olsaydı, mütləq bu, hansısa formada bəlli olardı. Deməli, ortalıqda bir nəticə olmayıb. Hesab edirəm ki, ombudsmanın indiyə qədər bu yöndə fəaliyyəti qənaətbəxş sayıla bilməz. Bundan sonra necə olacağına gəldikdə isə bunu zaman göstərəcək”.

Partiya funksioneri hesab edir ki, Xocalı həqiqətlərinin dünyada tanıdılması ilə bağlı çox çalışmaq lazımdır.

Vidadi ORDAHALLI

Son xəbərlər