Vətən müharibəsindən sonra Qarabağda minalanmış ərazilərdə mütəmadi olaraq mülki və hərbi şəxslərin minaya düşməsi ermənilərin minalanmış ərazilərin xəritəsini Azərbaycana verməsi məsələsini gündəmə gətirib. Ermənistan tərəfi minalanmış ərazilərin xəritəsinin onlarda olmadığını iddia etsə də, beynəlxalq ekspetlər bildirir ki, həmin xəritəni Azərbaycana verməyə borcludur. Əks halda bu, hərbi cinayət hesab olunur.
Qeyd edək ki, Ermənistan işğal etdiyi ərazilərdə hər yeri, hətta hərbi təyinatı olmayan əraziləri də minalayıb, minalı sahələrin xəritələrini isə vermir. Məqsəd mümkün qədər çoxlu sayda mülki şəxsin həlak olmasıdır, bu ərazilərə sakinlərin qayıdışını çətinləşdirməyə, uzatmağa yönəlmiş cinayətdir.
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Qarabağ və ətraf rayonlardakı ərazilərin böyük əksəriyyətinin xəritəsi mövcuddur: “Onların Azərbaycan tərəfinə təqdim edilməməsi Ermənistan tərəfinin növbəti bir cinayəti anlamına gəlir. 1994-cü ildə əldə olunan atəşkəs razılaşmasından sonra 2020-ci ilə kimi Ermənistan həmin ərazilərin minalardan təmizlənməsi istiqamətində heç bir addım atmayıb. İndi bu prosesi başa çatdırmaq Azərbaycanın üzərinə düşür. Ancaq ərazi həddən artıq böyük olduğu üçün işi tez bir zamanda itkisiz həyata keçirmək qeyri-mümkün olur. Çünki Ermənistan əlində olan xəritələri bizə təqdim etmir. Söhbət ötən ilin sentyabr ayının 27-dən noyabr ayının 10-na qədər olan müddətdə basdırılan minalardan gedirsə, bunun dəqiq xəritəsi ermənilərdə 100 faiz var. Biz bugünə qədər də İkinci Dünya müharibəsinin baş verdiyi ərazilərdə partlanmamış minaların tapıldığının şahidi oluruq. Belə vəziyyət bizi də gözləyir. Xəritəsiz aparılan işdən sonra biz iddia edə bilmərik ki, filan ərazi tam təmizlənib”.
Ekspertin sözlərinə görə, erməni hərbçilərin böyük əksəriyyəti Rusiya hərbi məktəbinin yetirmələridir: “Təlimata görə, minalanan ərazilərin xəritələri mütləq tərtib olunur. Həmin xəritələrin bir nüsxəsi Ermənistan Silahlı Qüvvələrinin Baş Qərargahında saxlanılmalıdır. Başqa cür mümkün deyil. Ona görə də hesab edirəm ki, beynəlxalq ictimaiyyət, həmsədr ölkələr, xüsusilə də Moskva Ermənistana bu xəritələri Azərbaycan tərəfinə verməsi üçün təzyiq etməlidir. Sözsüz ki, Rusiya bu məsələdə xüsusi rol oynamalıdır. Çünki Rusiya vəziyyətin sülh yolu ilə inkişafında, regiona tammiqyaslı dinc həyatın qayıtmasında maraqlıdır. Minalanmış ərazilərin xəritəsi olmadan bu proses çox gecikə bilər. Bundan başqa bir məqamı da xüsusi vurğulamaq istəyirəm. Nə qədər ki, Ermənistan minalanmış ərazilərin xəritəsini Azərbaycan tərəfinə təqdim etmir, bu, regiondakı Rusiya sülhməramlılarının fəaliyyətinə və təhlükəsizliyinə böyük təhdiddir”.
Məhəmmədəli QƏRİBLİ
