Paşinyanın Lilit Makuntsu - öz ingilis dili müəlliməsini ABŞ-a səfir göndərməsinin görünməyən tərəfləri…

Yeganə Hacıyeva: “Bütün ümidləri puça çıxan Paşinyan öz inanılmış adamı vasitəsilə Bayden hakimiyyətilə yeni əlaqələr qurmağa can atır”

img

Ermənistanın Vatikandakı sabiq səfiri, keçmiş prezident Serj Sarkisyanın kürəkəni Mikael Minasyan Nikol Paşınyanın öz ingilis dili müəlliməsini ABŞ-a səfir göndərməsi haqda məlumat yayıb. Onun sözlərinə görə, Nikol Paşinyan Lilit Makuntsu Ermənistanın ABŞ-dakı fövqəladə və səlahiyyətli səfiri təyin etməsi çox yanlış addımdır. O bildirib ki, Makunts yaxşı insan olsa da, siyasi biliyi yoxdur:

 

"Soros dairələrinə anti-Rusiya ritorikasını və ABŞ ilə təmasları gücləndirmək tapşırılıb. Makunts səriştəsiz diplomatdır. Əslində, heç diplomat da deyil. Sadəcə Paşinyan ona güvəndiyi üçün belə bir addım atdı".

Erməni politoloq Suren Surenyan da ABŞ-a yeni səfir təyinatını tənqid edib. O, Ermənistanın ABŞ-a təcrübəsiz bir qadını səfir təyin etməsini uğursuz addım kimi qiymətləndirib: “Əmin olun ki, Lilit Makuntsun ABŞ-a səfir göndərilməsi Vaşinqtonda çox mənfi qarşılanacaq. Başqa sözlə, İrəvan sanki Vaşinqtona siqnal göndərir ki, Ermənistan-Amerika münasibətləri onun üçün heç bir əhəmiyyət daşımır. Səfirlik isə dövlət imtiyazlarına sahib uzunmüddətli turizm məkanına çevrilir. Diplomatiyada sıfır təcrübəyə malik insanı ABŞ kimi bir ölkəyə necə səfir təyin etmək olardı axı?”

Qeyd edək ki, Lilit Makuntsun ABŞ-a səfir təyin edilməsi Ermənistanda etirazla qarşılanıb. Politoloqlar təcrübəsiz diplomatın ABŞ-da rəsmi İrəvanı təmsil edə bilməyəcəyini deyirlər. Bu təytinatla bağlı daha hansı gizli məqamları qeyd etmək olar?

Politoloq Yeganə Hacıyeva “Bakı-Xəbər”ə açıqlamasında bildirdi ki, bu xanım qısa müddət ərzində həm də Ermənistanın mədəniyyət naziri vəzifəsini tutub: “Bu xanımın Ermənistanın ABŞ-dakı səfiri təyin olunması yalnız onun Paşinyanın ingilis dili müəlliməsi olmasına bağlı olan məsələ deyil. Sözügedən xanım ABŞ-ın xüsusi xidmət orqanlarına Ermənistandan bağlı olan şəxslərdən biridir. Ermənistanda ABŞ-a bağlı şəbəkə ilə əlaqədar ciddi araşdırmalar aparılıb. Həmin araşdırmanın müəllifini hətta həbs etmişdilər. Bir müddət sonra azadlığa buraxdılar. Sözügedən xanım uzun illər ABŞ-ın Ermənistandakı “Sülh korpusu”nda çalışıb. Daha öncə isə ABŞ-dakı Universitetlərdən birində  “Yay məktəbi”ni keçib. Qısa müddətli olan “Yay məktəblərinin” ABŞ-ın Mərkəzi Kəşfiyyat İdarəsinin nəzarətində olan bir proqram olduğunu hamı gözəl bilir. İş burasındadır ki, ABŞ-a bağlı olan bu şəbəkə Paşinyan hakimiyyətindən əvvəl də Ermənistan hakimiyyətinə yol tapmağı bacarmışdı. Aprel döyüşlərindən sonra təyin olunan müdafiə naziri də həmin dairələrə bağlı olan adam idi. Ermənistanda müxtəlif vəzifələr tutmuş David Tonoyan da Lilit  Makuntsun yetirməsi olub. Bu baxımdan da yeni səfirin ciddi təsir imkanlarına malik olduğu danılmazdır. Bu xanıma Paşinyanın böyük inamı və etimadı var. Bilirsiniz ki, ABŞ-da yeni hakimiyyət formalaşdırılır. Bütün ümidləri puça çıxan Paşinyan öz inanılmış adamı vasitəsilə Bayden hakimiyyətilə yeni əlaqələr qurmağa can atır”.

Ekspertin bildirdi ki, bu təyinatın Ermənistana hər hansı müsbət nəticə verəcəyinə inanmır: “Bu həm də Ermənistanın Rusiyadan ala bilmədiyi dəstəyi ABŞ-dan qazanmaq istəyinə uyğun gedişdir. Lilit Makunts Paşinyan hakimiyyətində kadr bazasını formalaşdıran persona olub. Bu baxımdan da Paşinyanın ondan gözləntiləri çoxdur”.

Məhəmmədəli QƏRİBLİ

Son xəbərlər