Prezident İlham Əliyev Azərbaycan Respublikasında media sahəsində islahatların dərinləşdirilməsi haqqında Fərman imzalayıb.
Fərmanda deyilir: “Ötən əsrin 90-cı illərində Azərbaycan Respublikasında dövlət müstəqilliyi bərpa edildikdən sonra müasir medianın formalaşması və inkişafı üçün geniş imkanlar yaranmışdır. Həyata keçirilmiş köklü islahatlar nəticəsində ölkədə senzura, söz və məlumat azadlığını məhdudlaşdıran digər süni maneələr aradan qaldırılmış, medianın fəaliyyətini tənzimləyən mütərəqqi qanunvericilik bazası formalaşdırılmış, redaksiyaların davamlı inkişafı, onların iqtisadi müstəqilliyinin gücləndirilməsi, jurnalistlərin sərbəst fəaliyyətinin təmin edilməsi məqsədilə ardıcıl tədbirlər görülmüşdür. Ötən dövr ərzində Azərbaycan mediası özünəməxsus inkişaf yolu keçmiş, ölkəmizdə və dünyada baş verən hadisələrlə bağlı cəmiyyətin məlumatlandırılması, xalqımızın haqq səsinin dünya ictimaiyyətinə çatdırılması istiqamətində məqsədyönlü fəaliyyət göstərmişdir. Bununla yanaşı, Azərbaycanda cəmiyyət həyatının hər bir sahəsini əhatə edən köklü islahatların həyata keçirildiyi, habelə bütün dünyanı əhatə edən vahid informasiya məkanında yeniliklərin intensiv xarakter aldığı, kommunikasiya vasitələrinin sürətlə inkişaf etdiyi, mütərəqqi texnologiyaların, iş metodlarının tətbiq olunduğu müasir dövrdə media sahəsində keyfiyyət dəyişikliklərinə ehtiyac vardır. Qlobal informasiya mühitinin müəyyənləşdirdiyi fəaliyyət prinsiplərinə uyğun olaraq modernləşmə, rasionallıq, qabaqcıl texnologiyaların geniş tətbiqi, aparıcı trendlərin izlənilməsi və digər mühüm şərtləri özündə birləşdirən innovativ təkamülün yaratdığı imkanlardan Azərbaycan mediasının daha çox bəhrələnməsi, onun şəffaflıq və vətəndaş məmnunluğu prinsiplərinə əsaslanan, cəmiyyətin obyektiv və peşəkar şəkildə məlumatlandırılmasına xidmət edən fəaliyyətinin stimullaşdırılması üçün bu sahədə əsaslı islahatlar aparılmasına zərurət yaranmışdır. Azərbaycan Respublikasında medianın inkişafının dəstəklənməsi, bu sahədə institusional quruculuq işlərinin davam etdirilməsi, yeni informasiya-kommunikasiya texnologiyalarının və innovasiyaların tətbiqinin stimullaşdırılması məqsədilə, Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram: Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılsın…”
Yaradılan bu yeni qurum medianın inkişafına nə kimi töhfələr verə bilər?
Vüqar Rəhimzadə: “Bu qərar mediaya verilən dəstəyi daha da genişləndirəcək”
“İki sahil” qəzetinin baş redaktoru Vüqar Rəhimzadə “Bakı-Xəbər”ə açıqlamasında bildirdi ki, bu qərarın verilməsini yüksək qiymətləndirir: “Hesab edirəm ki, hər bir media işçisi bu qərardan məmnundur. Fürsətdən istifadə edib, mən cənab Prezidentə medianın inkişafına davamlı və sistemli şəkildə töhfələr verdiyinə görə dərin təşəkkürümü bildirirəm. Bu qərar mediaya verilən dəstəyi daha da genişləndirəcək. Təsdiq olunan əsasnamədən görürük ki, quruma geniş səlahiyyətlər verilib. Hesab edirəm ki, bu da müsbət mənada ciddi nəticələrə səbəb olacaq. Bu gün medianın ənənəvi sahəsi ilə yanaşı, elektron media da inkişaf edir. Bizim qanunvericilik bazamızda bununla bağlı ciddi boşluqlar var. Qanunvericiliyə də müəyyən yeniliklərin edilməsi zərurəti hiss edilir. Əminəm ki, bu qurum bütün işləri sistemli şəkildə görəcək. 1999-cu ildə qəbul edilən KİV Haqqında Qanunun artıq dövrün tələbləri ilə tam ayaqlaşa bilmədiyi məlum olur. Yeni qurum müasir tələblərə tam uyğundur və əminəm ki, medainın bütün sahələrinin inkişafına nail olacaq”.
Bəhruz Quliyev: “Yeni qurum bütün sahələr üzrə ixtisaslı jurnalistlərin yetişdirilməsi işinə də öz töhfəsini verəcək”
“Səs” qəzetinin baş redaktoru Bəhruz Quliyev “Bakı-Xəbər”ə açıqlamasında bildirdi ki, bu addım qlobal dünyanın çağrışları ilə tam uzlaşır: “Azərbaycan Şərq ölkəsi olduğu üçün mediada müəyyəm dəyərlərin gözlənilməsinə xüsusi önəm verməlidir. Biz deyə bilmərik ki, bu illər ərzində müstəqil mətbutaın inkişafı olmayıb. Amma bugünkü dövrün tələbləri ilə tam uzlaşması üşün yeni qərarların qəbul edilməsinə ehtiyac var. Bu baxımdan da yeni qurumun yaradılmasını vaxtında atılan addım sayıram. Biz artıq yazılı mətbuata verilən dəstəkdən bütün medianı əhatə edəcək quruma transferi görürük. Bunların hamısının birgə inkişafını qurmaq üçün verilən fərmanı tam dəstəkləyirəm. Bu fərman özü ilə fundamental işi zəruriləşdirib. Bütün bunları dövlətin mətbuatın inkişafına konseptual yanaşması saymaq olar. Azərbaycan mətbuatında kifayət qədər problemlərin olduğunu biz 44 günlük Zəfər tarixində də gördük. Hesab edirəm ki, yeni qurum bütün sahələr üzrə ixtisaslı jurnalistlərin yetişdirilməsi işinə də öz töhfəsini verəcək”.
Məhəmmədəli QƏRİBLİ
