”..Mən bir daha demək istəyirəm ki, biz bir çox hallarda humanistlik göstərmişik və Ermənistan tərəfi bunu qiymətləndirməlidir. Bunun müqabilində Ermənistan xarici işlər nazirinin bizim torpağımıza gəlməsi qəbuledilməzdir. Artıq mən demişəm, ümid edirəm ki, onlar düzgün nəticə çıxaracaqlar. Çıxarmasalar, onların böyük problemləri olacaq və yenə də peşman olacaqlar”.
Məlum olduğu kimi, bu fikirləri yanvarın 7-də 2020-ci ilin yekunlarına həsr olunmuş müşavirədə Prezident İlham Əliyev bildirmişdi.
Ölkə başçısının da vurğuladığı kimi, Ermənistan Azərbaycanın humanist siyasətindən nəticə çıxartmalı və təxribatçı addımlar atmamalıdır.
Faktiki olaraq, Ermənistan Azərbaycana qarşı hər cür cinayətlər törətməsinə baxmayaraq, Azərbaycan dövləti humanizm göstərib. Azərbaycanın ədalətli, məsuliyyətli, humanist siyasəti, Ermənistandan fərqli olaraq, hətta hərbi əməliyyatlar dövründə yalnız hərbi hədəflərə qarşı əməliyyatlar aparılması, dinc əhalinin hədəfə götürülməməsi, ərazilərin boşaldılması üçün düşmənə vaxt verilməsi kimi məsələr, fikrimizcə, bütün dünya üçün bir örnəkdir.
Bilirik ki, Azərbaycanın icazəsi olmadan xarici ölkə vətəndaşları, rəsmi şəxslər Dağlıq Qarabağa səfərlər ediblər və cənab Prezidentin də vurğuladığı kimi, bu yolverilməzdir. Əgər belə təxribatçı addımlar davam edəcəksə, Azərbaycan sərt cavab verəcək.
Azərbaycanın prinsipial mövqeyi noyabrın 10-da imzalanmış üçtərəfli bəyanata əsaslanır. Bu bəyanatda təsbit olunmamış heç bir fəaliyyət həyata keçirilə bilməz. Yaxud Azərbaycanın buna prinsipial icazəsi olmalıdır. Azərbaycan hazırda ərazidə vəziyyəti başa düşür və humanitar məsələlərin həllinə razılığını verib. Lakin bundan sui-istifadə yolverilməzdir.
Ermənilər Ermənistan ərazisindən Azərbaycan ərazisinə keçərək diversiya, terror törətməyə cəhd göstəriblər. Onlar terrorçu və diversantlardır. Lakin Azərbaycan yenə də humanizm göstərərək onları məhv etmədi, əsir götürdü.
Ölkə başçısının qeyd etdiyi kimi, Ermənistan Azərbaycanın humanist siyasətindən nəticə çıxarmalı və təxribatçı addımlar atmamalıdır. Bunun cavabı sərt olacaq və Ermənistan böyük problemlə üzləşəcək.
“...bölgəyə silahlı terrorçu dəstələr göndərir”
AVCİYA-nın vitse-prezidenti, professor, tanınmış siyasi icmalçı Məhərrəm Zülfüqarlı qeyd edir ki, Azərbaycan dövlətinin ədalətli və humanist yanaşmasından Ermənistan hərtərəfli nəticə çıxarmalıdır ki, sonra daha pis vəziyyətə düşməsin. M.Zülfüqarlının sözlərinə görə, Prezident İlham Əliyev 2020-ci ilin yekunlarına həsr olunmuş müşavirədəki çıxışında bəyan etdi ki, bu müharibə zamanı biz, eyni zamanda, məsuliyyət göstərdik, ədalət göstərdik, Ermənistan ərazisinə girmədik.
Siyasi şərhçi vurğulayır ki, Ermənistan ərazisindən bizə qarşı namərd atəşlə törədilən hərbi cinayət nəticəsində onlarla mülki şəxsin həlak olmasına, şəhərlərimizin bombalanmasına baxmayaraq, biz Ermənistan ərazisinə keçmədik, beynəlxalq hüquqa hörmətimizi göstərdik. Ermənistan, erməni toplumu üçün heç bir mənəvi dəyərin olmadığını deyən M.Zülfüqarlının sözlərinə görə, Azərbaycan xalqı və dövləti hər zaman mənəvi insani dəyərlərə bağlı olub, beynəlxalq hüquqa hörmət edib. “Azərbaycan Prezidenti İlham Əliyev hər zaman öz humanistliyi ilə nümunə olub. Humanistlik bizim xalqımızın, türk millətinin xarakterik xüsusiyyətlərindən, özəlliklərindən biridir ki, biz onu həmişə dövlətimizin yürütdüyü siyasətdə görürük. Ermənistan və ermənilər isə humanizmin nə olduğunu dərk etmirlər, ümumiyyətlə, bu anlayışdan, prinsipdən uzaqdırlar. Təəssüflər olsun ki, Ermənistan həmişə Azərbaycanın bu humanistliyindən sui-istifadə etməyə cəhdlər edir. Bilirsiniz ki, bir müddət əvvəl Ermənistanın baş naziri qanunuz olaraq Qarabağa səfər edib. Azərbaycan dövlətindən icazəsiz onun beynəlxalq hüquqla tanınan ərazilərinə bu adamın gəlməsi yolverilməzdir. Ümumiyyətlə, bizim ərazilərimizə icazəsiz səfərlərə son qoyulmalıdır. Azərbaycan dövlətinin humanistliyindən sui-istifadə edib qanunsuzluqlar törədən Ermənistan bu addımların məsuliyyətini dərk etməli, sonrakı nəticələrini düşünməlidir. Hesab edirəm ki, Qarabağa qanunsuz səfərlər edən həm Ermənistan tərəfi, həm də bəzi ölkələrin təmsilçiləri əsaslı nəticə çıxarmalıdırlar. Cənab Prezident də vurğuladı ki, bu qanunsuz səfərlər davam edərsə, bu təxribatçı hərəkətlərə Azərbaycan tərəfindən sərt addımlar atılacaq. Azərbaycanın mövqeyi noyabrın 10-da imzalanmış üçtərəfli bəyanata əsaslanır. Bunu Ermənistan nəhayət ki, dərk etməli və bəyanatın prinsiplərini pozmağa cəhd göstərməməlidir”.
M.Zülfüqarlının sözlərinə görə, təkcə Azərbaycan deyil, qardaş Türkiyə də Ermənistanın təxribatlarına, erməni faşizminə, iyrəncliklərinə baxmayaraq, humanistlik göstərir. M.Zülfüqarlı qeyd etdi ki, Türkiyə Prezidenti Ərdoğan da dəfələrlə Türkiyədə saysız erməni yaşadığını və onların çoxunun Ermənistandan gəlib orada çörək qazandığını, lakin onlara dəyib toxunulmadığını deyib. Azərbaycanda da ermənilərin yaşadığını xatırladan M.Zülfüqarlının sözlərinə görə, demokratik, tolerant, multikultural Azərbaycan dövlətində onlara qarşı heç bir təzyiqlər yoxdur, onlar burada hər hansı bir problemlə üzləşmirlər. “Türkün hesabına çörək qazana-qazana türkün əleyihinə hərəkət edirlər. Azərbaycan ərazisində yaşayan ermənilər burada heç bir problemlə üzləşmirlər, amma görün Ermənistan bizim dinc əhaliyə qarşı nə qədər terror cinayəti törədib, evlərimizi dağıdıb, şəhərlərimizi qadağan olunmuş ağır silahlarla, raketlərlə atəşə tutub. Biz görün necə qeyri-humanist bir ölkə ilə qonşuyuq. Bütün bunlara baxmayaraq, Azərbaycan dövləti ərazidəki hazırkı vəziyyəti nəzərə alır və humanitar məsələlərin həllinə razılığını verib. Amma Ermənistan sui-sitifadədən əl çəkmir. Prezident özü də dəfələrlə deyib ki, 10 noyabr bəyanatında əks olunmamasına baxmayaraq, biz oradakı insanlara humanitar yardım göstərilməsinə imkan yaratdıq. Hərçənd ki, o bəyanatda humanitar yardım məsələsi yoxdur. Biz humanitar yardım göstərilməsi üçün şərait yaradırıq, Ermənistan isə bundan sui-istifadə edərək “humanitar yardım” adı altında bölgəyə silahlı terrorçu dəstələr göndərir. Ermənistanın Azərbaycan dövlətinin humanist münasibətindən sui-istifadə etməsi yolverilməzdir və bu ölkə atdığı bu zərərli addımlarının onun üçün ağır nəticələrə gətirib çıxaracağını düşünsün”.
Moskva görüşlərinə toxunan M.Zülfüqarlının sözlərinə görə, Paşinyan bu görüşdə bir sıra cəfəng fikirlər səsləndirib və onlardan biri də “hərbi əsir”lərlə bağlı olub: “Əsirlərin dəyişdirilməsi məsələsi 10 noyabra qədərki dövri əhatə edirdi. Bu da Putinin dediyi kimi, qaydasında gedir. Amma 10 noyabrdan sonra Ermənistan Azərbaycan ərazisinə terrorçu dəstələr göndərirsə və onlar ifşa olunursa, onlar artıq hərbi əsir deyil, terrorçulardır. Ona görə də, hesab edirəm, indən sonra da Azərbaycanın mövqeyi qətiyyətli olmalıdır ki, gələcəkdə belə hallarla üz-üzə qalmasın”.
İradə SARIYEVA
