Tərlan Eyvazov: “…muzdlu əsgərlərin meyitini haraya göndərəcəyi, harada dəfn edəcəyi barədə çaşqınlıq içərisindədir”
"Azərbaycan Respublikası beynəlxalq humanitar hüquq normalarına, eyni zamanda, Cenevrə Konvensiyasının tələblərinə öz sadiqliyini ifadə edərək Ermənistan və Azərbaycan Respublikasının humanitar atəşkəs elan olunması haqqında Moskva bəyannaməsindən sonra öz humanist mövqeyini bir daha vurğulayıb”. Bunu Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi İsmayıl Axundov media nümayəndələrinə açıqlamasında deyib.
O qeyd edib ki, Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası oktyabrın 12-də Beynəlxalq Qızıl Xaç Komitəsinin Azərbaycan Nümayəndəliyinin başçısı ilə keçirilmiş görüşdə Azərbaycan tərəfi humanist addım kimi Ermənistana aid 30 nəfər hərbçinin meyitinin, eyni zamanda, Ermənistan hərbçilərinin işğal edilmiş ərazilərdən geri çəkildikləri zaman köməksiz halda buraxıb getdikləri 2 mülki şəxsin qarşı tərəfə verilməsi ilə bağlı birtərəfli qaydada təklif verib: "Bundan sonra Dövlət Komissiyasının digər səlahiyyətli nümayəndələri tərəfindən Beynəlxalq Qızıl Xaç Komitəsinin nümayəndələri ilə keçirilmiş görüşlərdə bununla bağlı bir neçə dəfə təklif verilməsinə baxmayaraq, qarşı tərəfdən müsbət cavab verilməyib. Bunu beynəlxalq hüquq normalarına hörmətsizlik əlaməti olmaqla, eyni zamanda, Ermənistan tərəfinin öz vətəndaşlarına qarşı qeyri-humanist mövqeyini sərgiləmək kimi qiymətləndiririk”.
Ermənistan rəhbərliyinin meyit və əsirlərinə sahib çıxmaması maraq doğurur.
- “…çoxsaylı cəsədin ailələrinə verilməsi daxildə Paşinyan hakimiyyəti əleyhinə narazılığın daha da artmasına səbəb olacaq”
Hərbi ekspert Tərlan Eyvazov bildirdi ki, erməni hərbçiləri savaş meydanında ölürlər: “Humanitar atəşkəs elan olunanda biz gözləyirik ki, onlar gəlib meyitləri götürsünlər. Ancaq ermənilər meyitlərini götürmürlər. O qədər meyit Ermənistana getsə, o ölkədə yer yerindən oynayar. Görərlər ki, orada nə qədər insan itiriblər. Onu da nəzərə almaq lazımdır ki, həlak olanların bir qismi muzdlu əsgərlərdir. Bu səbəbdən də Ermənistan rəhbərliyi həlak olan muzdlu əsgərlərin meyitini haraya göndərəcəyi, harada dəfn edəcəyi barədə çaşqınlıq içərisindədir”.
Həmsöhbətimiz onu da əlavə etdi ki, Ermənistan tərəfi meyitləri ona görə təhvil almır ki, çoxsaylı cəsədin ailələrinə verilməsi daxildə Paşinyan hakimiyyəti əleyhinə narazılığın daha da artmasına səbəb olacaq.
Günel CƏLİLOVA
