Avropa Xəbər Agentliyinin İtaliya üzrə xüsusi müxbiri, “Eurasiaticanews” portalının rəhbəri Karlo Marino sözügedən agentlikdə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin Ermənistan tərəfindən Azərbaycanın işğal olunmuş ərazilərində aparılan qanunsuz məskunlaşdırma siyasəti ilə bağlı açıqlamasını dərc edib.
Yazıda Azərbaycanın işğal olunmuş ərazilərinə son günlər Livandan olan ermənilərin köçürülməsindən bəhs edilib. Qeyd olunur ki, Ermənistanın işğal etdiyi Azərbaycan ərazilərində apardığı qanunsuz məskunlaşdırma müharibə cinayətidir.
Bildirilir ki, Azərbaycan da daxil olmaqla, dünya ölkələri Livanda baş vermiş faciənin nəticələrinin aradan qaldırılması, Livana humanitar yardım göstərilməsi ilə məşğul olarkən Ermənistan bu faciədən, insanların iztirablarından özünün çirkin məqsədləri naminə sui-istifadə edir. Bununla da Ermənistan onun üçün heç bir mənəvi dəyərlərin olmadığını nümayiş etdirir.
Xüsusilə vurğulanır ki, işğal olunmuş ərazilərimizdə məskunlaşdırılmış əhali, faktiki olaraq, Ermənistanın məsuliyyətsiz, avantürist siyasətinin qurbanına çevrilir. Hamı bilməlidir ki, Azərbaycanın işğal olunmuş ərazilərində həyata keçirilən qanunsuz məskunlaşdırma siyasətinin heç bir hüquqi qüvvəsi yoxdur və Azərbaycan onun nəticələrini tamamilə rədd edir.
Məlum olduğu kimi, Prezidentin köməkçisi Hikmət Hacıyev bu məsələyə etirazı əks etdirən geniş bəyanatla çıxış edib. Onun Ermənistanın apardığı qanunsuz məskunlaşdırma siyasətinə etdiyi etirazın Avropanın da diqqətini cəlb etməsi təsadüfi deyil. Çünki Hikmət Hacıyevin mövqeyi həm də bəşəriyyəti narahat edən problemin aradan qaldırılnmasına hesablanıb. Elə cinayətlər var ki, lokal mahiyyət daşımır. Yəni onların baş verməsi gələcəkdə bütün bəşəriyyətə ciddi problemlər yarada bilər. Hikmət Hacıyevin məlum bəyanatında doğru olaraq qeyd edilir ki, azğınlaşmış ermənilər, hətta insanların faciəsindən belə özləri üçün fayda götürməyə çalışır. Livandakı faciəyə kömək adı ilə Ermənistan qanunsuz məskunlaşdırma aparıb, insanları müharibənin içinə atmaq istəyir. Onlardan gələcəkdə canlı sipər olaraq istifadəni planlayır. Yəni insanları bir faciədən çıxarıb, kömək adı ilə başqa bir faciənin içinə atır. Təbiidir ki, bunları detallı şəkildə izah etməklə Hikmət Hacıyev dünyanın aparıcı ölkələri və medaisının diqqətini bu vacib problemə cəlb etməyi bacarıb. Araşdırmalar göstərir ki, Hikmət Hacıyevin məlum fikirlərinə yalnız Avropa deyil, digər qitələrin aparıcı media nümunələrində də geniş yer verilib. Görünən budur ki, rəsmi İrəvanın nümayişkaranə şəkildə qanunsuz köçürmə siyasətini sərgiləməyə başlaması bir sıra məsələlərə bağlıdır. Ermənistan ilk dəfə deyil ki, işğal olunmuş ərazilərdə qanunsuz məskunlaşdırma siyasəti aparır. Bu ölkə uzun illər ərzində beynəlxalq hüquq normalarını nəinki inkar edib, hətta aşkar şəkildə tapdalayıb. Bütün bunlar sivil dünyanın gözü önündə baş verir. Təəssüflər olsun ki, həmişə dünya birliyi bu cür kobud qanun pozuntularına, işğalçı ölkə tərəfindən beynəlxalq hüququn tapdanmasına biganəlik nümayiş etdirir. Hazırda ermənilərin aktiv və nümayişkaranə şəkildə bu siyasəti davam etdirmələrinə səbəb də həmin biganəlikdir.
Aktiv köçürmə siyasəti işğalın, demək olar ki, ikinci dalğası sayıla bilər. Çünki hazırda Ermənistan ordusunun nəzarəti altında olan torpaqlarımıza hansısa bir dövlətin vətəndaşlarını gətirmək, münaqişəli ərazilərdə məskunlaşdırmaq Azərbaycanın maraqlarına ciddi zərbə sayılır. Bu, həm də birmənalı olaraq dünya birliyinə sayğısızlıq kimi qiymətləndirilməlidir. Bütün bunları detallı izah etdiyi üçün Hikmət Hacıyevin fikirlərinə belə ciddi önəm verilir. O çatdıra bilib ki, Livan, Suriya və ya başqa yerlərdən gətirilən ailələrdən başqa məqsədlər üçün istifadə ediləcək. Belə amillər isə gələcəkdə dünyanın ümumi təhlükəsizliyi üçün ciddi təhlükə yaradacaq.
Məhəmmədəli QƏRİBLİ
