Məlum olduğu kimi, aprelin 30-da Xəzər dənizində Qazaxıstan Respublikasının Milli Təhlükəsizlik Komitəsinin Sərhəd Xidmətinin Sahil Mühafizəsinin əməkdaşları tərəfindən Azərbaycan Respublikası vətəndaşları saxlanıb. Sahil mühafizəçiləri Q.İbrahimov, E.Nuriyev, E.Əhmədov və Ş.Novruzovu saxlayan zaman silah tətbiq ediblər. Nəticədə 1 Azərbaycan vətəndaşı ölüb, 2-si yaralanıb. Bununla əlaqədar Qazaxıstanın Azərbaycandakı səfiri Xarici İşlər Nazirliyinə dəvət edilib. Görüş zamanı Azərbaycan tərəfinin ciddi narahatlığı bildirilib və XİN-in notası səfirə təqdim edilib.
Bütün bunları sevinclə qarşılayan erməni mediası yazır ki, baş verənlər təsadüfi deyil. İddia edilir ki, Qazaxıstanda baş verən kadr islahatları o qənaətə gəlməyə əsas verir ki, bu ölkənin Azərbaycanla münasibətləri Nursultan Nazarbayevin prezidentliyi dövründəki kimi yaxın olmayacaq: “Hər halda, sərhədlərarası insident Nazarbayevin dövründə qurulmuş isti Qazaxıstan-Azərbaycan münasibətlərinə ziddir. Bu, münasibətlərin keçmişdə qalma meylini görmək mümkündür. Ancaq artıq rəsmi Nursultan Avrasiya İqtisadi İttifaqı məkanında Bakının dayağı olmaq niyyətində deyil”.
O da məlumdur ki, Qazaxıstan Avrasiya məkanında Azərbaycanın maraqlarını hər zaman qoruyub və ölkəmizin xeyrinə addımlar atıb. Bu, müxtəlif formalarda özünü göstərib. Bütün bunlardan da ermənilər daim narahat olublar. Bütün hallarda, indiki məqamda erməni mediasının Qazaxıstandakı kadr islahatlarından çıxardığı isterik anti-Azərbaycan nəticələri nə dərəcədə əsaslıdır?
“...bu ölkənin Azərbaycanla münasibətlərində ciddi kardinal dəyişikliklərin olacağını istisna edirəm”
Məsələyə münasibət bildirən politoloq Elşən Manafovun sözlərinə görə, erməni tərəfinin bu cür qənaətə gəlməsinin ciddi əsası yoxdur: “Qazaxıstanda kimin hakimiyyətdə olmasından asılı olmayaraq, bu ölkənin Azərbaycanla münasibətlərində ciddi kardinal dəyişikliklərin olacağını istisna edirəm. Düşünürəm ki, geosiyasi, siyasi-iqtisadi, coğrafi, nəqliyyat-kommunikasiya faktorlarına görə Qazaxıstan heç bir vəchlə Azərbaycanla münasibətlərin gərginləşməsinə getməz. Azərbaycanla Qazaxıstanın çoxəsrlik tarixi əlaqələri var. Ortaq dilə və dinə malik olan xalqlardır. Qazaxıstanda 300 min nəfərdən çox azərbaycanlı yaşayır. Onlar Qazaxıstanda elmlə yanaşı, ticarət və digər sahələrdə fəaliyyət göstərirlər. Ölkənin ictimai-siyasi həyatında kifayət qədər fəal iştirak edirlər. Qazaxıstan Azərbaycanla 1992-ci ildən diplomatik münasibətlər qurub. Qazaxıstan ölkəmizlə münasibətlərə o qədər yüksək önəm verir ki, Aktauda bizim diplomatik konsulluğumuz fəaliyyət göstərir. Mərhum prezident Heydər Əliyevin dönəmində Qazaxıstanla ikitərəfli maraqlara uyğun çox isti münasibətlər qurulub. Sözügedən münasibətlər İlham Əliyev Prezident olandan sonra dinamik inkişaf edib. Hər iki tərəf münasibətlərin inkişafında maraqlıdır. Qazaxıstan Tengiz yatağından hasil edilən nefti Bakı-Tiflis-Ceyhan neft kəməri ilə Avropa bazarına çıxarır. İki ölkə MDB-də, İslam Əməkdaşlıq Təşkilatında və digər təşkilatlarda təmsil olunmaqla yanaşı, bir-birinin maraqlarını müdafiə edirlər. Qazaxıstan hər zaman Azərbaycanın ərazi bütövlüyünün bərpasının tərəfdarı olub. Azərbaycan Kollektiv Təhlükəsizlik Müqaviləsi Təşkilatında, Avrasiya İqtisadi İttifaqında təmsil olunmasa da, Qazaxıstan həmin qurumlarda ölkəmizin mənafeyini müdafiə edib. Ona görə də Xəzər dənizində məlum insidentə görə münasibətlərin kardinal şəkildə dəyişəcəyini istisna edirəm. Bir məqamı da nəzərə almaq lazımdır ki, Prezident Kasım-Jomart Tokayev Nursultan Nazarbayevin siyasi varisidir. Nazarbayevin bu gün də Qazaxıstanın dövlət idarəçiliyinə təsir imkanları böyükdür. Ona görə də erməni mediasının gəldiyi qənaətin ciddi əsası yoxdur. Sadəcə, bu, ermənilərin arzusudur”.
Vidadi ORDAHALLI
