66 saylı Biləsuvar seçki dairəsinin gənc deputatı Bəhruz Məhərrəmovdan oranın icra başçısının həbsinə münasibət öyrəniblər. Deputat deyib ki, media bu məsələlər ətrafında manipulyasiya etməməlidir.
Yıxılana balta vurmaq olmaz: “Fürsətdən istifadə edib, medianı bu məsələlər ətrafında manipulyasiya etməməyə çağırıram. Başqa şayiə və fikirlərə əhəmiyyət verməyin. İkincisi, bildiyiniz kimi, sabiq icra başçısı barəsində Cinayət Məcəlləsinin 308, 311 və 179-cu maddələrinin müvafiq bəndləri üzrə cinayət işi açılıb, lakin məhkəmənin yekun hökmü yoxdur, təqsir məhkəmə qaydasında sübut olunana qədər ifadələrimizdə ehtiyatlı olaq. Və sonda, aydındır ki, pozuntu bir günün işi deyil, problemləri indiyədək yazmaq lazım idi, əks halda, necə deyərlər, daldan atılan daş topuğa dəyər. Yıxılanı baltalamaq bizə yaraşmaz”.
Böyük ehtimalla gənc deputatımız Biləsuvarın icra başçısına qarşı qaldırılan maddələri sadalayaraq cəmiyyətə, xüsusilə də mətbuata “təqsirsizlik prezumpsiyası dərsi” keçməyə çalışmaqla, ixtisasca hüquqşünas olduğunu göstərmək istəyib. Ancaq bu cəhd alınmayıb. Çünki hər şey hamının gözü qarşısında baş verib. Bundan başqa, həbs edilən icra başçısının əməlləri, danışıqları lentə alınıb, əlində rüşvət tutulub. Adam müavininə “gəl bir 500 nəfərə koronavirusa görə pul yazaq, 200-nü götürək” deyir, sonra da DTX-nin kamerası qarşısında etiraf edərək, “bu əməllərimə görə xəcalət çəkirəm” söyləyir. Nəhayət, Prezident də bu həbslərə dəfələrlə münasibət bildirir və əlində rüşvət tutulan məmurları ən sərt ifadələrlə qınayır. Bir sözlə, nəzərə alsaq ki, məlum hadisə ölkədə böyük rezonans doğurub, ölkə başçısı tərəfindən onun əməli pislənib, o zaman deputatın buna belə yanaşması nə dərəcədə doğrudur?
Arzuxan Əlizadə: “...mediaya yönəlik fikirlərini uğurlu hesab etmirəm”
Məsələyə münasibət bildirən AMİP-in sədr əvəzi Arzuxan Əlizadənin sözlərinə görə, baş verənlərlə əlaqədar deputatın medianı, bir növ, borclu çıxarması doğru yanaşma deyil: “Aprelin 29-da Biləsuvar Rayon İcra Hakimiyyətinin başçısı Mahir Quliyevin saxlanması ilə nəticələnən Dövlət Təhlükəsizliyi Xidmətinin xüsusi təyinatlı dəstəsinin keçirdiyi əməliyyat sıradan bir hadisə deyil. Onu da nəzərə alsaq ki, son 5 ay ərzində artıq sayca dörd rayon icra hakimiyyəti başçısı DTX-nın keçirdiyi əməliyyatla həbs edilib. Şübhəsiz ki, bunun cəmiyyətdə xüsusi rezonansa səbəb olması ilə əlaqədar ölkə mediasının sözügedən hadisələri diqqət mərkəzində saxlaması da təbiidir. Buna görə medianı günahlandırmaq doğru yanaşma deyil. Bildiyim qədər, parlamentdə Biləsuvarı təmsil edən deputat Bəhruz Məhərrəmov ilk ali təhsilini jurnalist ixtisası üzrə alıb. Bu anlamda deputatın məsələyə yalnız hüquq müstəvisindən çıxış edərək, təqsirsizlik prezumpsiyası prizmasından yanaşmasını və mediaya yönəlik fikirlərini uğurlu hesab etmirəm. Digər tərəfdən, görünən odur ki, ölkədə yeni bir düzən formalaşmaqdadır. Ölkə Prezidenti siyasi iradə nümayiş etdirərək, korrupsiya və rüşvətin qarşısını almaq üçün bu prosesin davamlı olacağını bildirir. Belə olan halda, deputatın aparılan siyasətə dəstək vermək əvəzinə, bununla əlaqədar sərgilədiyi mövqeyi, yumşaq desək, başadüşülən deyil”.
Günün sonunda isə Milli Məclisin deputatı Bəhruz Məhərrəmov açıqlama yayaraq fikirlərinin təhrif olunduğunu bildirib. Deputatın açıqlamasında deyilir: “Azpolitika.az saytında adımdan gedən 04.05.2020-ci il tarixli yazı ilə əlaqədar bildirirəm ki, qeyd olunan sayt Biləsuvar rayon İcra Hakimiyyətinin sabiq başçısı və hazırda həbsdə olan Mahir Quliyev barəsində fikrimi təhrif olunmuş və həqiqətə uyğun olmayan şəkildə təqdim etmişdir, qeyd olunan mövqe tərəfimdən qəbul edilmir və birmənalı şəkildə rədd edilir. Belə ki, mən ixtisasca hüquqşünas olaraq aparılan araşdırmanın nəticəsini gözləməyi tövsiyə etmişəm, çünki biz cənab Prezidentin rəhbərliyi altında hüquqi dövlətdə yaşayırıq və təqsirləndirilən şəxsin barəsində son qərar məhkəmə tərəfindən qəbul ediləcək.
Lakin bu o demək deyil ki, sabiq icra başçısı qeyd olunan əməlləri törətməyib. Mahir Quliyev ilk növbədə ona göstərilən etimadı doğrultmayıb, cənab Prezidentin korrupsiya və digər mənfi hallara qarşı mübarizə apardığı bir dövrdə bu əməlləri törədib və törədilməsinə şərait yaradıb. Buna görə də yerli sakinlər haqlı olaraq onun fəaliyyətindən ciddi narazı olub və bu barədə əsaslı müraciətlər edib. Bunun nəticəsidir ki, hazırda onun barəsində kifayət qədər təkzib olunmaz sübutlar olduğuna görə onun haqqında tamamilə doğru olaraq Azərbaycan Respublikasının Cinayət Məcəlləsinin 179, 308 və 311-ci maddələri ilə cinayət işi istintaq edilir və barəsində əsaslı olaraq məhkəmə tərəfindən həbs qəti imkan tədbiri seçilib. Bütün günahkar şəxslər Azərbaycan məhkəməsi qarşısında cəzalarını alacaqlar”.
Vidadi ORDAHALLI
