“Bunun ardınca aktyorlarımızın əməkhaqqının qaldırılması, mükafatların artırılması, teatr işçilərinin mənzil məsələsinin həll edilməsi gözləniləndir” “… bu sahədə görüləcək işlərin başlanğıcıdır”
Azərbaycanda teatrın inkişafı üçün dövlət tərəfindən hərtərəfli diqqət və qayğı mövcuddur. Məlum olduğu kimi, bir neçə gün əvvəl Prezident İlham Əliyev və Birinci vitse-prezident Mehriban Əliyeva bir qrup mədəniyyət və incəsənət xadimini qəbul edib. Bu görüşdə mədəniyyət və incəsənətin bir sıra vacib problemləri gündəmə gətirilib.
Burada Azərbaycan teatrlarının üzləşdiyi probemlər də səsləndirilib. Prezident İlham Əliyev səsləndirilən bütün problemlərin həll ediləcəyini qeyd edib. Bu özünü çox gözlətmədi. Martın 4-də dövlət başçısı Azərbaycan teatrlarının inkişafı ilə bağlı əlavə tədbirlər haqqında sərəncam imzaladı və bu məqsəd üçün 1,8 milyon manta vəsait ayrıldı.
Məlum olduğu kimi, sərəncam Azərbaycan teatrlarının fəaliyyətinə dövlət qayğısının daha da artırılması məqsədi daşıyır.
Sərəncamla Azərbaycan teatr ənənələrinin qorunub saxlanması və dövrün tələblərinə uyğun inkişaf etdirilməsi üçün Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Mədəniyyət Nazirliyinə 1,8 milyon manat, o cümlədən Azərbaycan Dövlət Akademik Milli Dram Teatrı, Azərbaycan Dövlət Akademik Opera və Balet Teatrı, Azərbaycan Dövlət Musiqili Teatrı, Azərbaycan Dövlət Gənc Tamaşaçılar Teatrı, Azərbaycan Dövlət Rus Dram Teatrı və Azərbaycan Dövlət Kukla Teatrının hər birinə 200 min manat, Naxçıvan Dövlət Musiqili Dram Teatrı, Gəncə Dövlət Dram Teatrı, Sumqayıt Dövlət Dram Teatrı, Mingəçevir Dövlət Dram Teatrı, Lənkəran Dövlət Dram Teatrı və Şuşa Dövlət Musiqili Dram Teatrının hər birinə 100 min manat ayrılıb.
Sərəncamda bildirilib ki, Azərbaycan teatr sənəti ölkəmizin ictimai-mədəni həyatında daim fəal rol oynayıb. Xalqımız milli ədəbiyyatın qiymətli nümunələri ilə yanaşı, dünya dramaturgiyasının inciləri ilə məhz Azərbaycan teatrının dolğun repertuarı sayəsində yaxından tanış olmaq imkanı əldə edib. Cəmiyyətimizdə milli və ümumbəşəri dəyərlərin təbliğində, vətənpərvərlik ruhunun, yüksək mənəvi keyfiyyətlərin aşılanması və estetik zövqün formalaşdırılmasında teatrın əvəzsiz xidmətləri var. “Azərbaycan teatrının fəaliyyəti, həmişə olduğu kimi, bu gün də dövlətimizin diqqət mərkəzindədir. Milli teatrın parlaq bədii irsinin qorunması, teatr sahəsində islahatların aparılması, teatr mədəniyyətinin təbliği və bütövlükdə, Azərbaycan teatr sənətinin inkişafı ilə bağlı silsilə tədbirlər həyata keçirilir” - deyə sənəddə vurğulanır.
Akademik Milli Dram Teatrının aparıcı səhnə ustadı, respublikanın xalq artisti, görkəmli aktyor Nurəddin Mehdixanlı “Bakı-Xəbər”ə bildirdi ki, bu sərəncamı ölkə başçısının problemlərə dərhal reaksiyasının nəticəsi hesab etmək lazımdır. “Birincisi, teatrın inkişafı naminə atılan hər addım, əlbəttə, bu sahənin inkişafı üçün şərait yaradır. Teatrlar tamaşalarını maddi vəsait hesabına hazırlayır və problemlərini həll edir, qastrol səfərlərini təşkil edirlər. Bu mənada, hesab edirəm ki, sərəncam teatrların işinin xeyrinə olacaq. Bu olduqca vacib bir sərəncamdır. Bilirsiniz ki, həm teatr, həm də kino sahəsinə Prezident sərəncamı ilə maliyyə vəsaiti ayrıldı. Akademik Milli Dram Teatrı üçün də 200 min manat ayrılıb. Həmin vəsait hesabına teatrımız 4 tamaşanı rahatlıqla hazırlaya bilər. 4 tamaşa bir teatrın repertuarı üçün çox gözəl bir göstəricidir. Prezident İlham Əliyev tərəfindən teatrlara maliyyə vəsaitinin ayrılması ilə bağlı imzalanan sərəncam cənab Prezidentin mədəniyyət və incəsənət xadimləri ilə görüşündən dərhal sonra verildi. Bu sərəncamın həmin tarixi görüşdən üç gün sonra verilməsi onu göstərir ki, problemlər dövlət başçısına çatdırılanda anındaca öz həllini tapır. Bu sərəncam da teatrların problemlərinin yerindəcə həll edilməsi istiqamətində verilən sərəncamdır. Bunu təqdir edirəm, bəyənirəm. Hesab edirəm ki, bu sənədin imzalanması hələ bu sahədə görüləcək işlərin başlanğıcıdır. Bunun ardınca aktyorlarımızın əməkhaqqının qaldırılması, mükafatların artırılması, teatr işçilərinin mənzil məsələsinin həll edilməsi gözləniləndir. Mən bütün bunların baş verəcəyinə və bütün problemlərin həll ediləcəyinə inanıram. Bu olduqca vacib sərəncamdır” - deyə N.Mehdixanlı bildirdi.
İradə SARIYEVA
