“Teatrların statusunun artırılması birbaşa əməkhaqlarının artmasına səbəb olacaq”
Azərbaycan teatrlarına hər zaman dövlət qayğısı göstərilib və bu da teatrların inkişafına səbəb olur. Ancaq bununla müasir Azərbaycan teatrlarının bir sıra qayğıları da var ki, onların həlli zərurətə çevrilib.
Burada əsas diqqət çəkən məsələlərdən biri ölkəmizdə fəaliyyət göstərən teatrların əksəriyyətinin statusunun olmamasıdır. Teatrların statusunun olmaması birbaşa həmin mədəniyyət ocağında işləyən aktyor və aktrisaların əmək haqqlarına mənfi təsir edir. Yəni onlar akademik, milli və aparıcı teatr statusları daşıyan teatrların əməkdaşlarından az əməkhaqqı alırlar.
Bildirək ki, Azərbaycan teatrlarının statusunun artırılması məsələsi uzun müddət idi ki, gündəmdə idi və teatrlar bu sahədə zəruri addım atılmasını gündəmə gətirirdilər. Nəhayət bu məsələ öz həllini tapa bilib. Belə ki, Azərbaycan Prezidenti İlham Əliyev bir qrup mədəniyyət və incəsənət xadimi ilə görüşdə mədəniyyət sahəsində mövcud olan bir sıra problemlərlə yanaşı teatrların statusunun artırılması məsələsinin həll olunacağını qeyd edib. “Həm teatr işçilərinin əməkhaqları, həm də teatrların statusu artırılacaq” - deyən Prezident İlham Əliyev bildirib ki, bu məsələlər öz həllini tapacaq: “Burada teatrlarla bağlı bir neçə təklif səsləndi. Aparıcı teatrların adlarını mən çəkdim və giriş sözümdə dedim ki, ilk növbədə, teatrların təmiri ilə biz məşğul olduq - Akademik Dövlət Dram Teatrının, Rus Dram Teatrının, Musiqili Teatrın, Gənc Tamaşaçılar Teatrının, Kukla Teatrının. Ona görə, əlbəttə, mən hesab edirəm ki, burada fərq qoymaq olmaz. Teatr işçilərinin əməkhaqları ilə bağlı təkliflər hazırlansın və əməkhaqları əhəmiyyətli dərəcədə artırılsın. Biz bunu mütləq etməliyik”.
Prezident İlham Əliyev Rus Dram Teatrının akademik teatra çevrilməsi məsələsində heç bir problem görmədiyini bildirib: "Bu gün tapşırıq verirəm ki, bu məsələ həll olunsun və digər teatrların da səviyyəsini qaldırmaq üçün mütləq addımlar atılmalıdır. Prinsipcə, həm maaşlar, həm də status artacaq. Mən dedim ki, teatr işçilərinin maaşlarının qaldırılması məsələsi tezliklə öz həllini tapmalıdır”.
Azərbaycan Dövlət Musiqili Teatrının direktoru Əliqismət Lalayev baki-xeber.com-a bildirdi ki, gerçəkdən də teatrların statusunun artırılmasına ciddi ehtiyac vardı. “Teatrların statusunun artırılması məsələsi gündəmdə idi və bu məsələ cənab Prezident tərəfindən həll edildi. Teatrların statusunun artırılmasının teatrların özlərinə və əməkdaşlarına müsbət təsiri olacaq. Hesab edirəm ki, Prezident tərəfindən teatrların statusunun artırılması məsələsinin həll edilməsi çox əlamətdar bir hadisədir. “Teatr və teatr fəaliyyəti haqqında” Qanuna görə, aparıcı, akademik və milli status daşıyan teatrlar var. İndi teatrlara milli, akademik, aparıcı status verməklə onlara uyğun şəkildə teatrlarda çalışanların əməkhaqları qaldırılacaq. Bu gün Azərbaycanda akademik və aparıcı teatrlar var. Akademik Opera və Balet Teatrının və Akademik Milli Dram Teatının əməkadaşları əməkhaqqının 100 faizini artıqlaması ilə alırlar. Milli teatr statusu olanlar da əməkhaqqının 50 faizini eyni qaydada ala bilir. Aparıcı teatrlar da ki, ən yüksək kateqoriyalı teatrlardır. Əgər aparıcı teatrlara “milli teatr” statusu veriləcəksə, bu teatrlarda əməkhaqlarının artmasına səbəb olacaq. Teatrların statusunun artırılması teatrların inkişafında mühüm rol oynayacaq. Bilirsiz ki, teatrlara böyük dövlət qayğısı var. Dövlət bizdən qayğısını əsirgəmir. İndi də teatrların statuslarının artırılması məsələsi öz həllini tapdı. Bunlar hamısı müsbətdir. Çünki teatrların statusunun artırılması birbaşa əməkhaqlarının artmasına səbəb olacaq” - deyə Ə.Lalayev bildirdi.
İradə SARIYEVA
