“Biz bu Fərmandan düzgün istifadə edə bilsək və onun tələblərini əsas götürsək, Azərbaycan kinosunda ciddi bir proses başlayacaq”
“Çünki Azərbaycan kinosunda müasir dövrün tələblərinə uyğun böyük islahatlara ehtiyac var”
Müasir Azərbaycan kinosunun yönünü, istiqamətini, missiyasını, ideoloji-mənəvi xəttini müəyyən etmək, onu yeni inkişaf yollarına çıxarmaq dövlətin kino siyasətinin əsas hədəflərindəndir. Azərbaycan kinosuna ciddi dövlət dəstəyi var və kinomuz bu dəstək sayəsində bir sıra uğurlar qazanıb.
Bilirik ki, ayrı-ayrı vaxtlarda Prezident İlham Əliyev tərəfindən Azərbaycan kinosunun inkişafını hədəfləyən bir sıra sərəncamlar, konsepsiyalar imzalanıb və Dövlət Proqramları qəbul edilib. Martın 1-də Prezident İlham Əliyev “Azərbaycan kinematoqrafiyasının inkişafı ilə bağlı bəzi tədbirlər haqqında” Sərəncam imzalayıb. Sənəddə qeyd edilir ki, Azərbaycanda kino sənəti əlamətdar hadisələrlə zəngin böyük inkişaf yolu keçmiş və ciddi sənət nailiyyətləri qazanmışdır. Ötən əsrin, xüsusən 50–80-ci illərində yaradılmış və milli özünəməxsusluğu ilə seçilərək mədəniyyətimizin qızıl fonduna daxil olmuş ekran əsərləri kino salnaməmizin parlaq səhifələridir. “Müstəqillik illərində milli kino ənənələrinin qorunması və Azərbaycan kinematoqrafiyasının yeni şəraitdə fəaliyyət göstərə bilməsi istiqamətində mühüm addımlar atılmışdır. “Azərbaycan kinosunun 2008–2018-ci illər üzrə inkişafına dair Dövlət Proqramı” kino tariximiz üçün əhəmiyyəti baxımından ilk genişmiqyaslı mühüm sənəddir. Proqram çərçivəsində ötən dövr ərzində kino müəssisələrinin maddi-texniki bazası xeyli möhkəmləndirilmiş, o cümlədən Bakı şəhərində Dövlət Film Fondu üçün ən müasir texnoloji avadanlıqlara malik yeni bina inşa edilmiş və Nizami Kino Mərkəzi dünya standartları səviyyəsində yenidən qurulmuşdur. Dövlət sifarişi ilə film istehsalı təkmilləşdirilmiş, milli kinonun kadr potensialının gücləndirilməsinə yönəlmiş müxtəlif layihələr gerçəkləşdirilmişdir. Dövlət sifarişi və maliyyə yardımı ilə dövlət və özəl studiyalarda 300-dən artıq film çəkilmiş, istehsal edilən çox sayda ekran əsərləri beynəlxalq film festivallarında müxtəlif mükafatlara layiq görülmüşdür. Eyni zamanda, son illərdə özəl kino sektoru tərəfindən istehsal olunan filmlərin sayının və film çəkilişinə özəl vəsait qoyuluşunun həcminin artması, eləcə də həmin filmlərin tamaşaçı auditoriyasının genişlənməsi kinematoqrafiyamızın keyfiyyətcə yeni inkişaf mərhələsinə qədəm qoyduğunu göstərir”-deyə bildirilir.
Məlumat üçün bildirək ki, sənəddə ölkədə mədəniyyətə dövlət qayğısının daha da artırılması, kino sənəti ənənələrinin yaşadılması və film istehsalı sahəsinin modernləşdirilməsi zərurəti önə çəkilib.
“Azərbaycanfilm” Kinostudiyasının direktoru Müşfiq Hətəmov “Bakı Xəbər”ə açıqlamasında bildirdi ki, Prezidentin kino ilə bağlı imzaladığı son Sərəncam sözün həqiqi mənasında milli kinomuzun inkişafı üçün yeni yollar açır. Onun sözlərinə görə, Sərəncamda əskini tapan məsələlərin hər biri günümüz üçün aktualdır.
O bildirdi ki, Sərəncama əsasən, kinemtoqrafiya qurumlarının təklifləri nəzərə alınmaqla, milli kinematoqrafiyanın dövrün tələblərinə uyğun inkişaf etdirilməsinə dair “Azərbaycan kinematoqrafiyasının inkişaf konsepsiyası” layihəsi hazırlanıb üç ay müddətində Azərbaycan Respublikasının Prezidentinə təqdim ediləcək. “Bu, tarixi bir sərəncamdır. Biz bu sərəncamdan düzgün istifadə edə bilsək və onun tələblərini əsas götürsək, Azərbaycan kinosunda ciddi bir proses başlayacaq. Çünki Azərbaycan kinosunda müasir dövrün tələblərinə uyğun böyük islahatlara ehtiyac var. Bilirsiz ki, bununla bağlı 2013-cü ildə Milli Məclisə qanun layihəsi təqdim etmişdik. Bundan əlavə, bizim konsepsiyalarımız var ki, Sərəncamdan sonra onu yekunlaşdırıb Azərbaycanda müasir tələblərə cavab verən kinoindustriya qurmalıyıq. Burada əsas götürüləcək işlərdən biri milli kinonun inkişafı ilə bağlıdır. İkincisi isə xarici investisiyanın Azərbaycana cəlb edilməsi və dünya kinosuna interqasiya prinsiplərinin müəyyənləşdirilib həyata keçirilməsidir ki, biz onlarla məşğul olmalıyıq. Prezidentin imzaladığı müvafiq Sərəncam bizə imkan verəcək ki, bu sahədə böyük işlər görülsün”.
M.Hətəmov qeyd etdi ki, bu sərəncamın kinomuz üçün maddi dəstəkdən əlavə bir mənəvi tərəfi də var. O hesab edir ki, bunun mənəvi tərəfi xüsusilə vurğulanmalıdır. “Milli kinomuzun inkişafına dövlət hər zaman dəstək göstərib. Ancaq bununla yanaşı, kino dünyada böyük bir gəlir sahəsidir. Sizə deyim ki, 2 ildir Mədəniyyət Nazirliyinin köməyi və həm də öz gücümüzə “Azərbaycanfilm”i saxlamışıq. Bilirsiz ki, bu gün “Azərbaycanfilm”də işlər gedir, qısametrajlı filmlər çəkilir, bir qrup gənc burada sınaqdan keçirilir, müxtəlif televiziyalarla əməkdaşlıq edilir. Azərbaycan filmləri dünyanın bir çox yerlərində göstərilir, satılır. Yəni biz bu prosesi başlamışıq. Ancaq bunu daha da yüksək səviyyədə, daha da peşəkar şəkildə etmək üçün bizə yeni qanuni baza və konsepsiya lazımdır. Bu da artıq cənab Prezidentin imzaladığı Sərəncamda öz əksini tapıb”-deyə M.Hətəmov qeyd etdi.
İradə SARIYEVA
