Zülfiyyə Eldarqızı: “Şou müğənnilərinin çoxunu xalqımızın ağrı-acısı maraqlandırmır” Qiymət Məhərrəmli: “Qan yaddaşımızdan xəbərsiz olan və Xocalı adlı yaramızın ağrısını hiss etməyən şou-biznes nümayəndələri ictimai qınağa çəkilməlidirlər”
Başı həmişə qalmaqallara qarışan, özlərini ucuz yolla reklam etməyə çalışan şou əhlini xalqımızın tarixi faciələri qətiyyən maraqlandırmır. Şou müğənnilərinin böyük əksəriyyəti Xocalı faciəsinin nə zaman baş verdiyindən xəbərsizdir. Bəzi internet kanalları “26 fevral nə günüdür” sualı ilə bir sıra şou müğənnilərinə müraciət edib.
Qəribədir ki, onlar 26 fevralda Xocalı soyqırımının olmasından bixəbərdirlər. Qəribədir, onlardan bəziləri yaddaşlarının zəifliyindən (?) giley edərək bildiriblər ki, bu tarixdə hansı hadisənin baş verdiyini yadlarında saxlaya bilmirlər. Halbuki, tariximizin qanlı səhifələrindən olan Xocalı soyqırımı haqqında hər bir Azərbaycan vətəndaşının, azərbaycanlının, xüsusilə də auditoriya qarşısına çıxan şəxslərin bilməsi vacibdir. Şou müğənnilərinin qan yaddaşımız olan Xocalı soyqırımı haqqında ən kiçik bir məlumatının olmaması həqiqətən də utancvericidir. Şou-biznesçilər dəfələrlə şəhidlərimizin, Xocalı soyqırımı qurbanlarının xatirəsinə müxtəlif formalarda hörmətsizlik ediblər. Elə “26 fevralda hansı hadisə baş verdiyini bilmirəm” deməklə həm öz mahiyyətlərini ortaya qoyurlar, həm də tariximizə, faciələrimizə biganə yanaşdıqlarını sərgiləyirlər. “Xalqım, millətim” - deyə “hayqıran” şou əhlinin xalqın ağır günündən, qanlı tarixindən xəbərsiz olması həqiqətən də biabırçılıqdır. Xalqla ağlayıb, xalqla gülməyən, ömründə bir dəfə də olsun şəhid ruhunu xatırlamayan, ancaq hamıdan yaxşı yaşamaq uğrunda mübarizə aparan şou-biznesçilər bu xalqın adına ləkədir. Buna başqa cür ad vermək olmaz.
Qeyd edək ki, dörd-beş il əvvəl bir neçə şou-biznesçi Xocalı soyqırımının ildönümü günü İsraildə konsert vermişdilər. Hətta əslən Ağdamdan olan Azəri qızı Günel də Xocalı soyqırımının ildönümlərindən birində efirdə əməlli-başlı çal-oynasınla məşğul olmuşdu. Reallıq budur ki, şou müğənniləri faciə günlərimizdə kef məclislərindən qalmır, hətta “Facebook” və “İnstagram” hesablarında şən mahnılar yaymaqdan çəkinmirlər.
Sənətşünaslıq üzrə fəlsəfə doktoru, bədii qiraətçi və aktrisa Zülfiyyə Eldarqızı “Bakı-Xəbər”ə bildirdi ki, müğənnilərin çoxunun tariximizdən xəbəri yoxdur. “Bunun da səbəbləri var. Başı pul qazanmağa, sponsor davasına, qalmaqallara qarışan bir sıra şou müğənniləri Xocalı soyqırımı qurbanlarının xatirəsinə hər zaman bu cür biganə yanaşıblar. Bu da ondan irəli gəlir ki, şou-biznesdə olan adamların əksəriyyəti adını yaza bilmir, onlar ömürlərində bir dəfə də olsun kitab oxumayıblar. Belə adamların qan yaddaşımıza bağlılıqları yoxdur. Çox təəssüf ki, onlar arasında müxtəlif fəxri adlar alanlar da var. Əslində, o insanlar bilmədiklərini öyrənməlidirlər. Sabah bəlkə hansısa bir xarici ölkədə bir jurnalist onlara Xocalı soyqırımı ilə bağlı sual verdi, onda özlərini əməlli-başlı biabır edəcəklər. Şou müğənnilərinin çoxunu xalqımızın ağrı-acısı maraqlandırmır. Xocalı vəhşəti, qətliamı elə bir məsələdir ki, o bizim hamımızı ağrıtmalıdır. Bir məsələni də deyim ki, aparıcısı olduğum proqramla əlaqədar şou müğənnilərinin çoxunu efirə dəvət edirəm, inanın ki, çoxunun repertuarında bir dənə də olsun vətənpərvərlik mahnısı yoxdur, hamısı toy mahnıları oxuyur” - deyə Z.Eldarqızı bildirdi.
Filologiya üzrə fəlsəfə doktoru Qiymət Məhərrəmli hesab edir ki, Xocalı soyqırımının törədildiyi tarix haqqında məlumatı olmayan şou müğənnilərinə qarşı ictimai qınaq olmalıdır. “Belələrini qınamaq lazımdır. Mən şəxsən şou müğənnilərinin Xocalı soyqırımı haqqında heç bir məlumata malik olmamasını qətiyyətlə pisləyirəm. Bu onların tariximizdən, milli faciələrimizdən xəbərsizliklərinin və vətənpərvər olmadıqlarının göstəricisidir. Bu cür insanları nəinki efirlərə, hətta başqa tədbirlərə belə dəvət etmək olmaz. Xocalı soyqırımının hansı tarixdə baş verdiyindən xəbərsiz olan yaddaşsız şou müğənniləri öz vətənpərvərliklərini də şouvari təqdim edirlər. Hətta gördüm ki, jurnalist onlara bu gün “hansı hadisə baş verib” - deyə sual etdikdə jurnalistin sualını lağlağıya çevirənlər də oldu. Mən onların çoxunun adlarını bilmirəm, inanıram ki, cəmiyyətimiz də onları tanımır. Qan yaddaşımızdan xəbərsiz olan və Xocalı adlı yaramızın ağrısını hiss etməyən şou-biznes nümayəndələri ictimai qınağa çəkilməlidirlər” - deyə alim bildirdi.
İradə SARIYEVA
