Aydın Kazımzadə: “Xocalı soyqırımı ilə bağlı filmlərin xarici ölkə televiziyalarında nümayiş etdirilməsi ənənəsi davam etdirilməlidir” Sadiq Qarayev: “Bu gün Xocalı soyqırımı haqqında xaricilərə ən dolğun məlumatı bədii və sənədli filmlərlə, eləcə də televiziya proqramları ilə verə bilərik”
27 il əvvəl ermənilərin öz havadarlarının dəstəyi ilə Xocalıda azərbaycanlılara qarşı törətdiyi soyqırım aktının beynəlxalq aləmdə tanıdılmasının ən mühüm vasitələrindən biri bu mövzuda çəkilən filmlərin xarici ölkə telekanallarında nümayiş etdirilməsi ilə bağlıdır.
Artıq neçə illərdir ki, Xocalı soyqırımı ilə bağlı çəkilən filmlərin xarici telekanallarda, xarici ölkələrdə nümayişi həyata keçirilir. Heç şübhəsiz ki, burada Heydər Əliyev Fondunun həyata keçirdiyi layihələr öz səviyyəsinə, hədəflərinə görə daha çox diqqəti cəlb edir. Fondun həyata keçirdiyi layihələr çərçivəsində Ermənistan silahlı qüvvələrinin Xocalıda törətdiyi qırğınla bağlı Rusiya, Türkiyə, Fransa, Macarıstan, Rumıniya, Belçika, Avstriya, Almaniya, Çexiya, İsveçrə və Gürcüstanda silsilə tədbir keçirilib, faciə ilə bağlı çəkilən filmlər təqdim edilir. Heydər Əliyev Fondunun ingilis, rus və türk dillərində hazırladığı "Xocalı soyqırımı" filmi erməni şovinistlərin Xocalıda törətdiyi vəhşilikləri əks etdirir.
Qeyd edək ki, Xocalı qətliamı ilə bağlı Moskva, Berlin, Strasburq, Brüssel, Buxarest, Cenevrə, Ankara, İstanbul, Paris, Praqa, Lidiçe, Tiflis və başqa şəhərlərin sakinlərinə Xocalı soyqırımı haqqında obyektiv və dürüst informasiya almağa imkan yaradan sənədli və bədii filmlərin nümayişi təşkil ediləcək.
Tanınmış kinoşünas, Əməkdar Mədəniyyət Xadimi Aydın Kazımzadə baki-xeber.com-a bildirdi ki, bütün dünyada Xocalı dəhşətləri ilə bağlı çəkilən filmlərin müxtəlif dillərdə yayımının həyata keçirilməsi vacibdir. Kinoşünas qeyd etdi ki, bu filmlərin təqdimatları elə şəkildə edilməlidir, biz xaricilərə bu ağrımızı çatdıra bilək. “Soyqırım haqqında əsasən sənədli filmlər və proqramlar çəkilib. Xocalı soyqırımı ilə bağlı filmlərin xarici ölkə televiziyalarında nümayiş etdirilməsi ənənəsi davam etdirilməlidir. Mən hesab edirəm ki, biz bu filmləri daha çox qonşu ölkələrin televiziyalarında nümayiş etdirməliyik. Nə üçün? Çünki onlar ermənilərin nə qədər təhlükəli millət olduğunu anlasınlar və görsünlər ki, erməni şovinistləri Azərbaycan xalqının başına necə oyunlar gətirib. Qonşuluqda yaşayan heç bir xalq, dövlət erməni terrorundan sığortalanmayıb. Odur ki, onlar bu filmlərə baxmaqla ermənilərin uşaqlarımıza, qocalarımıza, qadınlarımıza qarşı etdiyi zülmləri, vəhşilikləri görə bilərlər. Bir də biz çalışmalıyıq ki, Xocalı soyqırımının beynəlxalq ictimaiyyətə tanıdılması ilə bağlı daha çox xarici kino təşkilatları ilə müştərək filmlər çəkək və o filmləri yayaq. Biz ermənilərin törətdikləri soyqırım aktı ilə bağlı xarici kino şirkətlərinin də imkanlarından istifadə etməliyik” - deyə A.Kazımzadə bildirdi.
Azərbaycan Yazıçılar Birliyinin üzvü, alim-yazıçı Sadiq Qarayev baki-xeber.com-a bildirdi ki, Xocalı soyqırımına müasir dünya ictimaiyyətinin diqqətini çap məhsulları ilə deyil, daha çox elektron vasitələrlə, vizual materiallarla cəlb etməliyik. Onun sözlərinə görə, bu gün Xocalı soyqırımının beynəlxalq ictimaiyyətdə tanıdılması istiqamətində atılan addımlar müsbətdir. “Bilirsiz, bu gün Xocalı soyqırımı haqqında xaricilərə ən dolğun məlumatı bədii və sənədli filmlərlə, eləcə də televiziya proqramları ilə verə bilərik. Burada da bir neçə məsələyə diqqət yetirməliyik. Bu filmlər sırf tarixi faktlar əsasında çəkilməlidir, özü də elə təsvir vasitələri seçilməlidir ki, bu xarici tamaşaçıları cəlb edə bilsin. Xocalıda baş verən hadisələr sənədlər əsasında obrazlı şəkildə təqdim edilsə daha yaxşı olar. Bu filmlər müxtəlif bədii priyomlardan istifadə edilməklə çəkilməlidir. Əsas məsələ mövzunun təqdimatı və onun qəbul edilməsidir. Mən Xocalı, Qarabağla bağlı yazdığım iki iri həcmli əsərimdə-“Sahilsiz təzadlar” və “Sahibsiz kölgələr” romanlarımda bədii, elmi, fəlsəfi fikirlərin, dedektiv priyomların içərisində əsərin qəhrəmanının, eləcə də oradakı müxtəlif etnosların Dağlıq Qarabağda baş verən hadisələrə münasibətini, bu problemin gerçək mahiyyətini də vermişəm. Bunu ona görə belə vermişəm ki, ingilis, fransız, rus, eləcə də digər xalqların nümayəndələri bu əsərləri oxuyanda orada Xocalı faciəsinin əsl mahiyyətini görə bilsin. Biz özümüz xalq olaraq yaxın tarixdə baş verən Xocalı faciəsinin bütün detallarını bilirik və onu canımızda, qanımızda yaşayırıq. Bunu dünyaya çatdırmalıyıq. Hesab edirəm ki, Xocalı soyqırımının beynəlxalq ictimaiyyətə çatdırılması üçün çox mükəmməl əsər əsasında ssenari yazılmalıdır, onun musiqi həlli də, rejissor yanaşması da düzgün verilməlidir ki, xarici tamaşaçılar o filmlərə baxsın və onların Xocalı ilə bağlı təsəvvürləri olsun. Bizim əsas işimiz faktları dəqiqliklə və incəliklə çatdırmaq olmalıdır. Onu da deyim ki, bu barədə filmlər çəkilərkən bir məsələyə xüsusi diqqət yetirilməlidir. Bundan sonra Xocalı haqqında film çəkərkən öz xalqımızın döyüşkənliyini, qəhrəmanlığını da verməliyik. Qoy dünya elə bilməsin ki, biz ermənilərlə vuruşmamışıq, biz döyüşmüşük, sadəcə ermənilər xarici havadarlarının dəstəyi ilə həm torpaqlarımızı işğal edib, həm də Xocalı qətliamını törədib” - deyə S.Qarayev qeyd etdi.
İradə SARIYEVA
