“Biz bu addımı Azərbaycan mədəniyyətinə və incəsənətinə, eyni zamanda, Azərbaycan tamaşaçılarına, xüsusən də İrəvan teatrsevərlərinə göstərilən qayğı və sevginin təzahürü olaraq qiymətləndiririk” “Bu qayğı deportasiya həyatı yaşayan İrəvan Teatrının öz dədə-baba torpaqlarına dönmək ümidinin artmasına və daim aktuallığında qalmasına böyük təkan verir”
Azərbaycanda teatrlara hərtərəfli dövlət qayğısı göstərilir. Teatların binaları əsaslı şəkildə təmir edilir, maddi-texniki bazaları möhkəmləndirilir. Bu gün qaçqın və məcburi köçkün teatrları da dövlətin diqqətindədir və mütəmadi olaraq bu teatrlara qayğı göstərilir.
Məlum olduğu kimi, Prezident İlham Əliyev Bakı şəhərinin Binəqədi rayonunda yerləşən İrəvan Dövlət Azərbaycan Dram Teatrının binasının əsaslı təmiri və yenidən qurulması işləri haqqında sərəncam imzalayıb. Sərəncama əsasən, teatr binasının əsaslı təmirinin və yenidənqurma işlərinin davam etdirilməsi məqsədilə Mədəniyyət Nazirliyinə 2,0 (iki) milyon manat vəsait ayrılıb.
Qeyd edək ki, İrəvanda Azərbaycan dilində yaradılan (ilk) İrəvan Dövlət Azərbaycan Dram Teatrı azərbaycanlıların Ermənistandan deportasiyası ilə əlaqədar olaraq hazırda Bakıda fəaliyyət göstərir. 1928-ci ildə teatr dövlət statusu alıb və 1935-ci ildə teatra görkəmli dramaturq Cəfər Cabbarlının adı verilib.
İrəvan Dövlət Azərbaycan Dram Teatrının direktoru İftixar Piriyev “Bakı-Xəbər”ə açıqlamasında bildirdi ki, sözügedən sərəncam teatrın həyatında mühüm rol oynayacaq. O hesab edir ki, teatr əsaslı şəkildə təmir edildikdən sonra yaradıcı kollektiv daha da səmərəli fəaliyyət göstərəcək. “2019-cu il teatrımızın kollektivi üçün uğurla başladı. 15 yanvar tarixindən etibarən teatrın inzibati binasında əsaslı təmir işlərinə start verildi. Bir ay beş gün içində çox sürətlə gedən işlərin davam etdirilməsi məqsədilə 20 fevral tarixində möhtərəm cənab Prezidentin növbəti sərəncamı ilə iki milyon manat məbləğində vəsait ayrıldı. Kollektivimizin böyük sevinc hisslərinə səbəb olan bu sərəncam bizi daha da məsuliyyətlə çalışmaq etimadı ilə vəzifələndirdi. İkiqat stimul oldu. Biz bu addımı təkcə teatrımıza olan qayğı kimi dəyərləndirmirik, Azərbaycan mədəniyyətinə və incəsənətinə, eyni zamanda, Azərbaycan tamaşaçılarına, xüsusən də İrəvan teatrsevərlərinə göstərilən qayğı və sevginin təzahürü olaraq da qiymətləndiririk. Bu dəyərli diqqət və qayğıya görə biz böyük sənət ordusunun bir qolu olaraq öz tərəfimizdən ölkə rəhbərinə fikirlərimizi belə ifadə edirik: “Möhtərəm cənab Prezident! Zati-alinizə kollektivimiz adından dərin təşəkkürlərimizi və ehtiramımızı bildiririk! Siz xalqımızın hər bir nümayəndəsi üçün əziz və dəyərlisiniz! İrəvan teatrının kollektivinə daim qayğı göstərmisiniz. Bu qayğı deportasiya həyatı yaşayan İrəvan Teatrının öz dədə-baba torpaqlarına dönmək ümidinin artmasına və daim aktuallığında qalmasına böyük təkan verir. Biz Sizə hər zaman sədaqətlə bağlıyıq! Bunu bütün fəaliyyətimiz, repertuarımızda yer tutan əsərlərimiz, daxildə və xaricdə təmsil olunduğumuz səfərlərimiz və ictimai fəaliyyətimizlə sübut etməyə çalışırıq. Daim var olun! İrəvan Teatrına həmişə qayğı göstərmiş Ulu Öndərimizin ruhu qarşısında daim sayğı duruşunda dayanan kollektivimiz Sizin varlığınızdan qürur hissi keçirir! Sənətin yaşamasının xalqımızın əbədiyaşarlığını təmin edən amil olduğunu nəzərə alsaq, qətiyyətlə deyə bilərik ki, Sizin sənət və sənətkarlara verdiyiniz dəyər, qiymət və göstərdiyiniz diqqət, qayğı məhz xalqımızın əbədiyaşarlığının təminatıdır!”.
İradə SARIYEVA
