“İlk günlərdən Azərbaycan xalçalarına İsveçdə alıcı marağı hiss olunur” “Gələcəkdə İsveçin Göteborq və Malmö şəhərlərində də Azərbaycan xalçalarının satışı mağazalarının yaradılması nəzərdə tutulub”
Azərbaycan xalçalarının dünya bazarlarına çıxarılması ilə bağlı işlərə başlanıb. Reallıq bundan ibarətdir ki, xalçalarımıza artıq xarici bazarlarda tələbat yaranıb. Bu da Azərbaycan xalçasının bir brend kimi dünyada tanıdılmasına xidmət edir. Şübhəsiz ki, xalçalarımızın dünya ölkələrində satışa çıxarılması həm xalçaçılıq ənənəmizin, mədəniyyətimizin təbliğinə xidmət edir, həm də ölkə büdcəsinə kifayət qədər gəlir gəlməsinə səbəb olur.
Azərbaycan xalçalarının dünya bazarlarına çıxarılması ənənəsi yeni olsa da, müxtəlif dövrlərdə xalçalarımızın beynəlxalq satış sərgilərində təqdim edilməsi məlumdur.
Ekspertlər hesab edirlər ki, Azərbaycan xalçalarının dünya bazarına çıxarılması müsbət haldır. Onlar düşünürlər ki, bizim xalçalar dünya xalça bazarında rəqabətə davam gətirən məhsullardır. Dünyanın heç bir yerində belə zəngin xalçaçılıq ənənəsinin olmadığını vurğulayan ekspertlər hesab edirlər ki, Azərbaycan xalçaları hansı bazara daxil oldusa, orada liderliyi, üstünlüyü əldə etməyə qadirdir.
Məlum olduğu kimi, İsveçdə Azərbaycan xalçalarının satışına başlanıb. Bu gün sözügedən ölkənin bazarında milli xalçalarımıza marağın olması şübhəsizdir.
“Azərxalça” Açıq Səhmdar Cəmiyətinin mətbuat xidmətinin rəhbəri Tural Səfərov “Bakı-Xəbər”ə bildirdi ki, hazırda qurumun 20 filialında keyfiyyətli məhsul istehsal edilir. Fabriklərdə Azərbaycan xalçalarının bütün qrupları üzrə xalçalar toxunur. 2016-2017-ci illərdə Səhmdar Cəmiyyətin 10, 2018-ci ildə isə daha 10 filialı fəaliyyətə başlayıb. “Gələcəkdə bu filialların sayının 31-ə çatdırılması nəzərdə tutulub. “Azərxalça”nın məhsullarının xarici bazara çıxarılmasının əhəmiyyəti böyükdür. Bu həm ölkəmizə valyuta gətirilməsi, həm də tariximizin, milli dəyərlərimizin dünyada təbliği baxımından önəmli məsələdir. Azərbaycan xalçalarının dünya bazarında öz layiqli yerini tuta bilməsi üçün mühüm tədbirlər həyata keçirilir, müxtəlif ölkələrin bu sahə üzrə ixtisaslaşmış şirkətləri ilə əlaqələr yaradılır”. O qeyd etdi ki, cəmiyyət hər il dünyanın müxtəlif ölkələrində keçirilən beynəlxalq xalça satış-sərgilərində iştirak edir. Onun sözlərinə görə, həmin sərgilərdə nümayiş etdirilən xalçalar isə “Azərbaycan brendi” kimi təqdim olunur. 2016-2018-ci illərdə “Azərxalça”nın məhsulları Amerika Birləşmiş Ştatlarında, Almaniyada, Rusiyada və Cənubi Koreyada keçirilən belə tədbirlərdə sərgilənib və böyük maraq oyadıb. O vurğuladı ki, bundan başqa, dünyanın bir sıra inkişaf etmiş ölkələrinə xalça ixracı üçün razılıqlar əldə olunub. Cəmiyyət Azərbaycan xalçalarının müxtəlif ölkələrdə satışının təşkili məqsədilə mağazalar yaratmaq istiqamətində də iş aparır. Bu tədbirlərdən biri də xalçalarımızın İsveç bazarına çıxarılmasıdır. Onun sözlərinə görə, artıq ilk mağazanın İsveçin Stokholm şəhərində açılması bu sahədə mühüm hadisədir.
T.Səfərov qeyd etdi ki, İsveçdə fəaliyyət göstərən "NGK-AZE" şirkəti Azərbaycan xalçalarının bu ölkəyə idxalı üçün “Azərxalça”ya müraciət edib. “Təklif dəyərləndirilib, həmin şirkətin “Azərxalça”nın İsveçdəki distribütoru olmasına razılıq verilib. Stokholmun “Vikjö” ticarət mərkəzində açılan mağazada Azərbaycan xalçalarının Bakı, Qarabağ, Quba, Şirvan və Gəncə qrupları üzrə müxtəlif ölçülü 15 xalça satışa çıxarılıb. İsveçdə həndəsi naxışlı və al-əlvan rəngli Azərbaycan xalçalarına tarixən ciddi maraq olub. İsveçdəki kolleksionerlərin şəxsi kolleksiyalarında xeyli qədim Azərbaycan xalçası var. Ancaq ilk dəfədir bu ölkədə Azərbaycan xalçalarının satışı mağazası açılıb” - deyə T.Səfərov məlumat verdi.
İsveçdə Azərbaycan xalçalarına alıcı tələbatı yüksəkdir
İsveç rütubətli yer olduğundan, orada yun xalçalara tələbat çoxdur. Keyfiyyətli Azərbaycan xalçalarına isə daha çox maraq göstərilir. Stokholm şəhərində Azərbaycan xalçalarının satış mağazasının yaradılması uğurlu layihədir.
T.Səfərovun sözlərinə görə, artıq 2019-cu ilin əvvəlindən İsveçə məhsul ixracına start verilib. Artıq bu məhsullarla bağlı reklam bukletləri hazırlanıb. Bu bukletlərdə məhsulların fotoşəkilləri, əl üsulu ilə toxunan xalçaların ipliklərinin təbii boyalarla boyanması, onların insan sağlamlığına müsbət təsiri barədə məlumatlar yerləşdirilib. Yerli kütləvi informasiya vasitələrində reklam çarxlarının yerləşdirilməsi də nəzərdə tutulub.
“İlk günlərdən Azərbaycan xalçalarına İsveçdə alıcı marağı hiss olunur. Ona görə gələcəkdə İsveçin Göteborq və Malmö şəhərlərində də Azərbaycan xalçalarının satışı mağazalarının yaradılması nəzərdə tutulub” - deyə o bildirdi.
T.Səfərov, həmçinin, bildirdi ki, gələcəkdə başqa ölkələrdə də belə satış mərkəzləri yaradıla bilər.
İradə SARIYEVA
