Aydın Kazımzadə: “Azərbaycan bu filmlə dünyaya öz tarixi torpaqları haqqında həqiqətləri çatdıra bilər”
Azərbaycan tarixinin müxtəlif dövrlərinin bədii kinoda əks olunması olduqca vacibdir. Nəzərə alsaq ki, istənilən ideyanı kino başqa sənət sahələrindən daha ifadəli şəkildə auditoriyaya çatdırır, onda tariximizin filmlərdə canlandırılmasına xüsusi əhəmiyyət verməliyik. Ölkəmizdə tarixi filmlərin çəkilməsi ənənəsi var və bu ənənə bir müddət qırılsa da, sonradan dövlət dəstəyilə yenidən bərpa edildi. Müstəqillik illərinin son 10-15 ilində Azərbaycanda bir neçə tarixi film çəkilib. Bu filmlərin bəziləri xarici ölkələrlə müştərək çəkilib.
Heç şübhəsiz ki, Azərbaycan tarixinin ayrı-ayrı dövrləri haqqında bədii film çəkilərsə, onun daha keyfiyyətli olması və daha geniş auditoriyaya çatdırılması üçün mütləq o film xarici ölkələrin kinoşirkətlərilə müştərək lentə alınmalıdır. Çünki müştərək layihələr dünyada özünə daha tez yer tapır və kino bazarına maneəsiz daxil olur.
Bildiyimiz kimi, bir müddət əvvəl Azərbaycan, İran və Türkiyənin müştərək serial istehsalına başlayacağı və artıq bununla bağlı sözügedən dövlətlərin aidiyyəti qurumları tərəfindən əməkdaşlıq müqaviləsinin imzalandığı məlumdur.
Azərbaycan indi də başqa kino layihəsində müştərək işə imza atacaq. Türkiyə, İran, İsveç, İsrail və ABŞ-dan kino şirkətlərinin iştirakı ilə şərti adı “İrəvan xanlığı” olan tarixi janrda bədii film çəkəcək. Artıq filmin çəkilişi üçün hazırlıqlara başlandığı bildirilir. Bu filmin ərsəyə gətirilməsi üçün müqavilə də imzalanıb.
Qeyd edək ki, İrəvan xanlığının tarixindən bəhs edəcək film “Run Group” şirkətinin media layihəsidir. Məlumatlara görə, filmin istehsalı üçün xaricdən ən müasir texniki avadanlıqlar gətiriləcək.
Məlumat üçün bildirək ki, növbəti mərhələdə böyük bir ərazidə İrəvan qalasının maketi qurulacaq, eyni zamanda müvafiq qurumlar tərəfindən təsdiqlənmiş layihə əsasında böyük pavilyonda İrəvandakı Xan Sarayının identik modeli inşa ediləcək.
Filmin baş prodüseri Rəşad Cəfərov, baş rejissoru isə Namiq Ağayevdir. Filmdə tanınmış azərbaycanlı aktyorlarla yanaşı, bir sıra məşhur əcnəbi aktyorların da rol alacağı bildirilir. Onların arasında Hollivud ulduzlarının olacağı istisna edilmir.
“İrəvan xanlığı” filmində yanlışlıqlara yol verilməməsi və onun ən yüksək səviyyədə hazırlanması məqsədilə “Run Group” bir sıra müvafiq dövlət qurumları və elmi təsisatlarla sıx əməkdaşlığını davam etdirəcək.
Filmin üstün cəhətlərindən biri budur ki, tarixi janrda çəkiləcək bədii filmdə 15-20 min nəfərlik kütləvi döyüş səhnələri yer alacaq və həmin kadrlar kompyuter qrafikasının köməyi ilə deyil, canlı olaraq real insanların iştirakı ilə çəkiləcək.
Onu da vurğulayaq ki, film Cənubi Qafqazda baş verən tarixi həqiqətlərin dünyaya çatdırılmasına və erməni yalanlarının ifşa edilməsinə kömək edəcək. Filmin yaradıcıları İrəvan qalasının və xanlığının yaranması tarixçəsini, onun Azərbaycanın digər xanlıqları və xarici dövlətlərlə münasibətlərini geniş əks etdirmək, erməni məsələsinin üstündən isə bir-iki məqamla keçmək niyyətindədirlər. Çünki ermənilərin İrəvana və İrəvan xanlığına, ümumiyyətlə, bu bölgəyə heç bir aidiyyətı yoxdur. Ona görə də filmdə erməni məsələsi çox qabardılmayacaq, lakin onların həmin ərazilərə, yəni indiki Ermənistana Rusiya imperiyası tərəfindən digər yerlərdən köçürüldüyü və erməni xisləti ilə bağlı digər məsələlər mütləq yer alacaq.
Tanınmış kinoşünas Aydın Kazımzadə “Bakı-Xəbər”ə bildirdi ki, İrəvan xanlığının tarixi ilə bağlı filmin çəkilməsi erməni saxtakarlığının ifşa edilməsində müstəsna rol oynayacaq. “Həmişə demişəm, yenə də deyirəm ki, bizim tarixi filmlərə ehtiyacımız var. Azərbaycan xalqının böyük və şanlı tarixi bizə əsas verir ki, bu mövzunu daim gündəmdə saxlayaq. Azərbaycan yalnız indiki ərazisindən ibarət deyil. Vaxtilə bizim torpaqların, ərazilərin ucu-bucağı görünməyib. Təəssüf ki, tarixin müxtəlif dövrlərində torpaqlarımızın xeyli hissəsini itirmişik. Buna baxmayaraq, o torpaqlar bizim tarixi ərazilərimizdir və bunu gənc nəslə aşılamalıyıq. “İrəvan xanlığı” adlı filmin çəkilməsini olduqca müsbət bir hal hesab edirəm. Bu filmin çəkilməsinə bir sıra xarici dövlətlərin kino şirkətlərinin cəlb edilməsi də təqdirəlayiqdir. Bu mənada ki, biz onların texniki dəstəyilə daha keyfiyyətli film çəkilişinə nail ola bilərik. Azərbaycan xanlıqlarının tarixinin kinoya gətirilməsi ənənəsinin davam etdirilməsi bizə çox şey qazandıracaq. Bu filmdə əsas hədəfimiz erməni yalanlarını ifşa etmək, onların bizim torpaqlara Çar Rusiyası tərəfindən köçürüldüyünü açıq şəkildə tarixi faktlarla əks etdirməkdir. Buna nail olmalıyıq. Dünya bilsin ki, ermənilər Qafqaza yamaqdır. Onlar bu torpaqların əzəli sahibləri deyillər. Bu filmi çəkməklə İrəvan xanlığının tarixi haqqında dünyaya geniş bilgilər verə bilərik. Çünki Çar Rusiyası İrəvan xanlığını qəsb edənə qədər o xanlıq öz əzəməti ilə seçilib. İrəvan xanlığının tarixi haqqında filmdə ermənilərin bizim torpaqlara hansı yollarla köçürülməsini göstərmək lazımdır ki, onların işğalçı, təcavüzkar olduğunu çatdıra bilək. Azərbaycan bu filmlə dünyaya öz tarixi torpaqları haqqında həqiqətləri çatdıra bilər. Ermənilər saxta tarixləri haqqında onlarla film çəkib dünyaya yayıblar. Özü də çalışıblar ki, bu filmlərin çəkilişlərinə xarici kino şirkətlərini də cəlb etsinlər. Haqlı tərəf bizik və bizim filmimiz özündə əsl həqiqəti əks etdirəcək. Xarici kino şirkətlərini bu layihədən sonra başqa layihələrə də cəlb etmək lazımdır” - deyə bildirən A.Kazımzadə hesab edir ki, Azərbaycan kinosunu müştərək layihələrlə daha da inkişaf etdirə bilərik. Azərbaycan Prezidentinin qeyri-neft sektorunun inkişafına xüsusi önəm verdiyini qeyd edən A.Kazımzadənin fikrincə, kinematoqraflarımız milli kino sənayesini inkişaf etdirməklə qeyri-neft sektoruna töhfə verə bilərlər. Onun fikrincə, artıq mədəniyyət sahəsi də pul qazanmağı, dövlət büdcəsinə xeyir verməyi qarşıya məqsəd qoymalıdır. “Dövlət kino haqqında ciddi düşünür və həmişə də kinoya dəstək olur, maliyyə ayırır. Amma kino həmişə dövlət maliyyəsindən asılı olmamalıdır. Özü pul gətirməlidir. Kinonun pul gətirməsinin yolu isə xarici ölkələrlə maraqlı müştərək filmlər çəkmək, o filmləri dünya kino bazarına çıxarmaq, prokata vermək, müxtəlif ölkələrin kinoteatrlarına, televiziyalarına satmaqdan keçir. Buna əməl etmək lazımdır. Bu gün həyata keçirilən müştərək kino layihələrindən gözləntilərimiz çoxdur. Hesab edirəm ki, İran, Türkiyə, İsveç, İsrail və ABŞ-la birgə çəkiləcək “İrəvan xanlığı” tarixi bədii filmi Azərbaycan kinosunun dünyada tanıdılmasında, eləcə də erməni yalanlarının ifşa edilməsində əhəmiyyətli rol oynayacaq” - deyə A.Kazımzadə vurğuladı.
İradə SARIYEVA
