“Bu serialların mövzusu elə seçilməlidir ki, Azərbaycanın, İranın və Türkiyənin dövlətçilik maraqlarına zidd olmasın” “Seriallar tarixi mövzularda çəkilərsə...”
İndiyə qədər çox olmasa da, müxtəlif xarici ölkələrlə, əsasən də İranla müştərək film layihələrimiz olub. İtaliya ilə də yeni müştərək film layihələrimiz reallaşdırılacaq. İranla müştərək film layihələrində bu ölkə filmlərin çəkilişində əsasən texniki vəsaitləri və aktyorları ilə təmsil olunub. Filmlərin mövzusu və ssenarisi isə Azərbaycan kinodramaturqları tərəfindən hazırlanıb.
İranın Azərbaycandakı səfiri Cavad Cahangirzadə bizim mətbauta bildirib ki, İran, Azərbaycan və Türkiyə birgə seriallar çəkəcək. Səfirin sözlərinə görə, İran və Azərbaycan arasında birgə film çəkilişi də nəzərdə tutulur. “Eyni zamanda, İran, Azərbaycan və Türkiyə arasında tanınmış aktyorların iştirakı ilə birgə seriallar çəkiləcək. Azərbaycan tərəfi bu məsələ ilə bağlı razılığını verib və müvafiq işlər aparılır” - deyə C.Cahangirzadə bildirib.
İki ölkə arasında mədəniyyət sahəsində əməkdaşlıqdan danışan diplomat bildirib ki, 2018-ci ilin iyun ayında İranın mədəniyyət və islami irşad naziri Seyid Abbas Salehi Azərbaycana səfər edib:
O qeyd edib ki, həm Bakıda, həm də Gəncədə İran mədəniyyəti günləri keçirilib. İranın aparıcı kinorejissorlarından biri - Məcid Məcidinin Azərbaycana gəldiyini, Azərbaycanın kino sahəsinin mütəxəssisləri ilə görüşdüyünü deyən diplomatın sözlərinə görə, bundan başqa, Fərabi Kino Fondunun icraçı direktoru Əlirza Tabeş də Azərbaycana səfər edib, görüşlər keçirib, kino sahəsində müqavilələr imzalanıb.
Azərbaycan, İran və Türkiyənin müştərək film, serial çəkməsi həqiqətən də maraqlıdır. Bu, Azərbaycan serial sənayesinin inkişafına müsbət təsir edə bilər. Çünki hər iki ölkə kifayət qədər güclü kino sənayesinə malikdir və hazırda İran, Türkiyə filmləri dünyaya çıxış əldə edib. Bu mənada, Azərbaycan kinosunun, seriallarının da dünyaya çıxması arzuediləndir. Qeyd etdiyimiz kimi, bu üç dövlətin razılığa gəlib müştərək serial istehsal etməsi vacibdir. Lakin serialın hansı janrda çəkiləcəyi maraq doğurur. Rəsmi qurumlar müştərək serialların janrları barədə məlumat verməsələr də, bəzi kinematoqraflar qeyd edirlər ki, serialların janrı tarixi olmaya bilər. Tarixi film çəkmək üçün, mütləq mənada, tarixi mənbələrə müraciət etmək lazım gələcək. Bilirik ki, hər iki qonşu dövlətlə tarixi məsələdə xeyli mübahisəli məqamlar var. Elə Türkiyə və Azərbaycan tarixinin müəyyən bir dövrü var ki, həmin çağlarda mübahisəli hadisələr baş verib. Eləcə də İranla Azərbaycan arasında bu məsələ mövcuddur. Məsələn, bir neçə il əvvəl Azərbaycan kinematoqrafları Şah İsmayıl haqqında film çəkmək istəyirdilər, buna İran tərəfi etiraz edərək bildirdi ki, siz onun haqqında film çəkə bilməzsiniz.
Əməkdar incəsənət xadimi, tanınmış kinoşünas Aydın Kazımzadə “Bakı-Xəbər”ə bildirdi ki, Azərbaycan, İran və Türkiyənin müştərək serial istehsalına başlaması çox müsbət haldır, lakin burada elə mövzular seçilməlidir ki, hər üç dövlətin dövlətçilik maraqlarına zidd olmasın. “Azərbaycan, İran və Türkiyə kinematoqraflarının müştərək seriallar çəkməsi çox müsbət haldır. Çünki İran və Türkiyənin bu sahədə xeyli təcrübəsi var və biz də onlarla birgə layihələr həyata keçirməklə bu təcrübədən yararlana bilərik. Bu günə kimi İranla bəzi layihələrimiz olub. Hətta aktyor mübadiləsi də baş verib. Bizim aktyorlar İran kinosuna, İran aktyorları isə Azərbaycan filmlərinə çəkiliblər. Türkiyə kinematoqrafları ilə də qarşılıqlı əlaqələrimiz olub. Düşünürəm ki, hazırda gündəmdə olan yeni layihə tamamilə fərqli xarakter daşıyır. Bilmirəm, İran və Türkiyə bu seriallarda ancaq texnologiyalarla və aktyorlarla təmsil olunacaqlar, yoxsa mövzuların, janrların müəyyən edilməsində onların da rolu olacaq. Məni əsas düşündürən bu serialların mövzusu və janrlarıdır. Bu gün Türkiyə kinematoqrafında tarixi filmlərə, seriallara daha çox üstünlük verilir. Yeni layihə çərçivəsində tarixi filmlər çəkiləcəkmi? Bu daha çox diqqəti cəlb edir. Çünki seriallar tarixi mövzularda çəkilərsə, burada kifayət qədər mübahisə doğuran məsələ ola bilər. Ona görə ki, tarixlə bağlı məsələlərdə hər iki dövlətlə xeyli mübahisəli məqamlar var. Elə tarixi dövrlər, hadisələr var ki, ona mövqeyimiz, baxışımız çox fərqlidir, hətta o mövzulara yanaşmada fikir ayrılıqları var. Bu mənada, inanmıram ki, serialların mövzusu tarixi olsun. Fikrimcə, müştərək seriallar macəra janrında çəkilməlidir ki, hər kəsin diqqətini cəlb etsin. Bu daha maraqlı və mübahisəsiz olar. Məsələn, keçən tarixi dövrlərdə Türkiyə ərazisinə köçmüş azərbaycanlıların həyatı haqqında maraqlı seriallar çəkmək olar. Elə Qarabağ mövzusunu da seriallarda qabartmaq mümkündür. Bu serialların mövzusu elə seçilməlidir ki, Azərbaycanın, İranın və Türkiyənin dövlətçilik maraqlarına zidd olmasın” - deyə A.Kazımzadə bildirdi.
O hesab edir ki, seriallar sevgi haqqında da ola bilər. Yəni kinoşünas deyir ki, seriallarda siyasi proseslər, hadisələr canlandırılmamalıdır. “Elə mövzular seçilməlidir ki, hər üç dövlətin maraqları orada təmin olunsun. Bəlkə İran və Türkiyə tərəfi filmə texniki dəstək verəcəklər və burada yalnız aktyorları ilə təmsil olunacaqlar. Hələ bu barədə hər hansı bir fikir yoxdur” - deyə A.Kazımzadə vurğuladı.
İradə SARIYEVA
