Bəhram Osmanov: “Heç bir yaşlı aktyor və aktrisanı teatrdan işdən çıxarmamışıq, sadəcə olaraq...”
Teatrda hər aktyorun öz tamaşası var. Baxmayaraq ki, son illər yerli teatrlarda yaşlı nəslə münasibət elə də müsbət deyil. Yəni təqaüd yaşına çatan sənətkarları çox asanlıqla səhnədən, teatrdan uzaqlaşdırırlar. Bizdə çox zaman elə düşünürlər ki, yaşlı aktyor və aktisaların tamaşaçıları yoxdur.
Əskinə, vaxtilə teatrın yükünü çiyinlərində daşıyan, keçid dövründə az maaş müqabilində çox işləməklə teatrı yaşadan bu insanların teatrdan kənarlaşdırılması ənənəsi elə də müsbət şeylər vəd etmir. Teatrda hər yaş kateqoriyasına uyğun aktyor və aktrisalar çalışmalıdır. Uzağa getməyək, qonşu Gürcüstan, Rusiya, Türkiyədə yaşlı aktyor və aktrisaların potensialından, təcrübəsindən geniş istifadə edilir. Bizdə isə belə deyil.
Azərbaycan Dövlət Gənc Tamaşaçılar Teatrında yaşlı nəsil aktyorların teatrdan uzaqlaşdırılması xəbərinin yayılması və ardıcıl olaraq işdən çıxarılan aktyorların mətbuata açıqlamalar verməsi məsələnin daha da ciddi olmasından xəbər verir.
Ağaxan Salmanlı, Lətifə Əliyeva, Əməkdar artistlər Atabala Səfərov, Rahib Əliyev və başqaları işdən azad ediliblər. Adları çəkilən sənətkarların teatrın direktoru Naidə İsmayılzadənin göstərişilə işdən çıxmaq haqqında ərizələrinin alındığı bildirilir.
Yalnız iki Xalq artisti - Yasin Qarayev və Tariyel Qasımov etiraz edərək işdən çıxmaq haqqında ərizəyə qol çəkməyiblər.
Xalq artisti Yasin Qarayev “Artıq Xalq artistləri Ağaxan Salmanlının, Lətifə Əliyevanın, Əməkdar artistlər Atabala Səfərovun, Rahib Əliyev və başqalarının ərizələri alınıb. Yalnız mənimlə Xalq artisi Tariyel Qasımov etiraz edib işdən çıxmaq ərizəsinə qol çəkməmişik. Bizə deyirlər ki, gəl, öz xahişinlə işdən çıxmağınla bağlı ərizə yaz. Mən də deyirəm ki, işdən çıxarırsınızsa, onda ərizəmizdə qeyd edin ki, yaşı 70-i keçib, ona görə çıxarırıq. Bunu da yazmırlar. Guya Əmək Məcəlləsində belə bir maddə var ki, 65 yaşdan sonra işləmək olmaz. Axı biz fabrik-zavodda fəaliyyət göstərmirik, incəsənət sahəsində çalışırıq. Bizim oynadığımız tamaşalar var, onlar necə olacaq? Teatrda yaşlı nənə-baba rollarını kim oynayacaq? Guya biz Rusiya teatrlarından, Stanislavski məktəbindən nümunə götürür, onların yolu ilə işləyirik. Axı onlarda Etuş, Yuriski, Zaxarov, Şirvind və s. kimi 80-90-95 yaşlı teatr və kino xadimləri teatrdan çıxarılmır, qalıb işləyir, maaş alırlar? Bizim doğma teatrımızın 90 illiyində bizə hədiyyəsi budurmu?” - deyə bildirərək, məsələ ilə bağlı əlaqədar qurumlara məktub yazdıqlarını da nəzərə çatdırıb: “Ümid edirik ki, problemimiz qısa müddətdə aradan qaldırılacaq”.
Azərbaycan Dövlət Gənc Tamaşaçılar Teatrında yaşlı nəsil aktyor və aktrisalar niyə işdən çıxarılır?
Teatrın baş rejissoru, Xalq artisti Bəhram Osmanov “Bakı-Xəbər”ə bildirdi ki, heç bir aktyor işdən çıxarılmayıb, sadəcə, onlarla bağlanan əməkdaşlıq müqaviləsinin vaxtı başa çatıb, teatra dəvət edilsələr də, yaşlı nəslin nümayəndələri gəlib müqaviləni yeniləmək istəmirlər. “Heç bir yaşlı aktyor və aktrisanı teatrdan işdən çıxarmamışıq, sadəcə olaraq, biz aktyorlarla illik müqavilə bağlayırıq. Düzdür, o aktyorların əmək kitabçaları teatrdadır, ancaq onlarla illik əmək müqavilələri mütləq imzalanmalıdır. O aktyorlar, demək olar ki, işə gəlmirlər, bizimlə ancaq telefonla əlaqə saxlayırlar. Biz o yaşlı aktyorları teatra dəvət edirik ki, gəlib müqavilə bağlasınlar, lakin gəlmirlər. Bilirsiniz, müəyyən yaş həddinə gəlib çatmış baş rejissorlar Mədəniyyət Nazirliyi ilə müqavilə imzalayırlar, bu qanundur. Yaşlı aktyorlarla isə biz birillik deyil, bir çıxış üçün müqavilə imzalayırıq. Özlərinin dediyi kimi, onların heç biri işdən uzaqlaşdırılmayıb. Qanun çərçivəsində, Əmək Məcəlləsinin müvafiq maddəsi ilə onlarla müqavilə bağlanılmalıdır. Yəni onlarla söhbət edilib ki, sizinlə birdəfəlik (bir tamaşada oynamaq üçün) müqavilə bağlanılmalıdır. Onlar tamaşada oynadıqları rola görə pul alacaqlar. Bir tamaşada oynayacaqlarsa, bir tamaşadan, iki tamaşada rol alacaqlarsa, iki tamaşadan onlara pul ödəniləcək. Mən sənət adamlarını yaxşı başa düşürəm, onlar çox kövrək olurlar, istəyirlər ki, həmişə onlara diqqət, qayğı göstərilsin” - deyə B.Osmanov bildirdi.
O, həmçinin, vurğuladı ki, teatrda yaşlı nəsil sənətkarlara həmişə qayğı, diqqət göstərilir, sənətkarların yubileyləri qeyd edilir.
İradə SARIYEVA
