“Dünyanın heç bir yerində, hətta muğamın təşəkkül tapdığı ölkələrdə belə bir mərkəz yoxdur”
“2008-ci ildə inşasına başlanan Beynəlxalq Muğam Mərkəzi bir musiqi, mədəniyyət ocağı kimi muğam sənətinin ölkəmizdə və beynəlxalq aləmdə təbliğatını həyata keçirir. Beynəlxalq Muğam Mərkəzinin fəaliyyətə başlamasının 10 ili tamam olur. Bu illər ərzində mərkəz onlarla ölkə və beynəlxalq əhəmiyyətli tədbirə, konfrans və simpoziumlara evsahibliyi edib. Əsrlərdən bəri formalaşan və özünün ən yüksək mərhələsinə çatan muğam sənətinin təbliğində mərkəzin oynadığı rol əvəzsizdir. Beynəlxalq Muğam Mərkəzinin yaradılması mədəniyyət tariximizdə böyük hadisədir. Dünyanın heç bir yerində, hətta muğamın təşəkkül tapdığı ölkələrdə belə bir mərkəz yoxdur. Azərbaycanın timsalında Beynəlxalq Muğam Mərkəzi dünyada yeganə mərkəzdir. Bu mərkəzdə muğamla bağlı müxtəlif səpkili tədbirlər keçirilir. Yarandığı 10 ildə Beynəlxalq Muğam Mərkəzi çox mühüm layihələrin həyata keçirilməsinə nail olub”. Bunu “Bakı-Xəbər”ə Akademik Opera və Balet Teatrının aparıcı solisti, görkəmli muğam ustadı, Xalq artisti, professor Mənsum İbrahimov Beynəlxalq Muğam Mərkəzinin inşasının 10 illiyi münasibətilə bildirib.
“Beynəlxalq Muğam Mərkəzi həm də muğam ifaçılarının, xanəndələrin evidir”
M.İbrahimovun bildirdiyinə görə, on il ərzində Azərbaycanda muğam sənəti dövlət dəstəyilə və Heydər Əliyev Fondunun təmənnasız köməyi, qayğısı ilə özünün ən yüksək inkişaf mərhələsinə qədəm qoyub. Beynəlxalq Muğam Mərkəzində indiyə qədər keçirilən bütün tədbirlərin milli musiqimizin, milli mədəniyyətimizin tanıdılmasına, yayılmasına xidmət etdiyini deyən M.İbrahimovun sözlərinə görə, Beynəlxalq Muğam Mərkəzinin səhnəsindən saysız istedadlı xanəndə Azərbaycan ictimaiyyətinə təqdim edilib. Beynəlxalq Muğam Festivalının, eləcə də televizya muğam müsabiqələrinin mərkəzin səhnəsindən tamaşaçılara təqdim edildiyini qeyd edən M.İbrahimovun dediyinə görə, bura müqəddəs bir məkandır. “Beynəlxalq Muğam Mərkəzi muğam sənətinin təbliğ edildiyi məkan olmaqla yanaşı, həm də muğam ifaçılarının, xanəndələrin evidir. Biz bu mərkəzin timsalında özümüzə üz tutduğumuz bir ev tapmışıq. Mübaliğəsiz deyə bilərəm ki, bu evin qapıları bizim hər birimizin üzünə açıqdır. Mərkəzdə tez-tez müxtəlif tədbirlər keçirilir, görkəmli xanəndələrin, muğam ustadlarının yubileyləri, xatirə günləri təşkil edilir. Beynəlxalq Muğam Mərkəzinin rəhbərliyi və kollektivi bu tədbirlərin yüksək səviyyədə keçirilməsi üçün böyük zəhmət çəkirlər. Beynəlxalq Muğam Mərkəzinin fəaliyyətə başlaması bölgələrdə də muğamın canlanmasına səbəb oldu. Bu gün Ağcabədidə, Füzulidə, Ağdamda muğam mərkəzləri fəaliyyət göstərir. Bu mərkəzlərin yaradılmasında Prezident İlham Əliyevin, ölkəmizin Birinci vitse-prezidenti, Heydər Əliyev Fondunun rəhbəri Mehriban Əliyevanın böyük əməyi, rolu var. Mərkəzlərin açılışında cənab Prezident və Mehriban xanım şəxsən iştirak ediblər. Əlbəttə, bu, muğam sənətinə verilən böyük dəyərdir. Arzu edirəm ki, torpaqlarımız işğaldan azad olunsun və Şuşada böyük, möhtəşəm bir Muğam Mərkəzi yaradılsın. Muğamımızın səsi Şuşa Muğam Mərkəzindən bütün dünyaya yayılsın” - deyə M.İbrahimov bildirdi.
Heydər Əliyev Fondunun mühüm layihələrindən biri…
Bildiyimiz kimi, Bakıda, dənizkənarı Milli Parkda yaradılan Beynəlxalq Muğam Mərkəzinin inşasına 2008-ci ildə başlanıb və 2009-cu il dekabrın 27-də Beynəlxalq Muğam Mərkəzinin açılışı olub.
Heydər Əliyev Fondunun milli mənəvi dəyərlərimizin qorunması və dünyada geniş təbliği ilə bağlı reallaşdırdığı möhtəşəm layihələr sırasında xüsusi əhəmiyyəti olan bu mərkəzin inşası fondun prezidenti, UNESCO və İSESCO-nun xoşməramlı səfiri, ölkəmizin Birinci vitse-prezidenti Mehriban Əliyevanın təşəbbüsü ilə həyata keçirilib. Mərkəzin yaradılması, belə bir mədəniyyət ocağının tikilməsi, muğamın daha da inkişaf etdirilməsi və təbliği üçün görkəmli xanəndələrin, muğam bilicilərinin iştirakı ilə “dəyirmi masa” keçirilib və Bakıda Beynəlxalq Muğam Mərkəzinin yaradılması qərara alınıb. Bundan sonra 2005-ci il aprelin 6-da Prezident İlham Əliyev Bakıda Beynəlxalq Muğam Mərkəzinin yaradılması haqqında sərəncam imzalayıb. Beləliklə, xalqımızın qədim mədəni irsinin ölməz nümunəsi, Azərbaycan musiqisinin zəngin fəlsəfi təməl üzərində təşəkkül tapmasında əvəzsiz rol oynayan muğama möhtəşəm abidə ucaldılması istiqamətində ciddi addım atılıb. Azərbaycan muğamının bəşər mədəniyyətinin nadir inciləri ilə bir sırada UNESCO-nun Dünya İrs Siyahısına daxil edilməsi isə, bütövlükdə, onun nə dərəcədə bənzərsiz sənət növü olduğunu bir daha təsdiqləyir. Onu da qeyd edək ki, Beynəlxalq Muğam Mərkəzinin təməli Prezident İlham Əliyevin və ölkəmizin birinci xanımı Mehriban Əliyevanın, UNESCO-nun keçmiş baş direktoru Koişiro Matsuuranın iştirakı ilə qoyulub. Azərbaycan-UNESCO əməkdaşlığının bəhrəsi olan Beynəlxalq Muğam Mərkəzi bu gün muğam sənətinin dünyada təbliğ edilməsində və unikal sənətin yaşadılmasında mühüm rol oynayır.
İradə SARIYEVA
