Ənvər Çingizoğlu: “Naxçıvanda İslam və Türk dünyasının mədəniyyət zənginliyinin rəmzi olan bir sıra abidələr var ki, o abidələr özündə böyük bir epoxanı yaşadır”
Bu gün ölkəmiz dünyada mövcud olan humanitar beynəlxalq qurumlarla çox səmərəli şəkildə əməkdaşlıq edir. Müsbət hallardan biri ondan ibarətdir ki, beynəlxaq layihələrin həyata keçirilməsində respublikamızın bölgələri də xüsusi rola malikdirlər.
2018-ci il İslam Mədəniyyətinin Paytaxtı seçilən və hazırda bu funksiyanı yerinə yetirən Naxçıvan bütün İslam aləminin diqqət mərkəzindədir. İslam Mədəniyyətinin Paytaxtı ili çərçivəsində Naxçıvana həm bir sıra beynəlxalq qurumların rəsmi təmsilçiləri, həm də turistlər kütləvi axın edir.
Keçən həftə Naxçıvan Muxtar Respublikası Ali Məclisinin sədri Vasif Talıbov İslam Təhsil, Elm və Mədəniyyət Təşkilatının baş direktorunun müavini Amina Əl-Həcri və TÜRKSOY-un baş katibinin müavini Fırat Purtaşla görüş keçirib.
Görüşdə bildirilib ki, Naxçıvan TÜRKSOY və ISESCO arasında, o cümlədən İslam mədəniyyəti paytaxtları ilə Türk dünyasının mədəniyyət paytaxtları arasındakı əlaqələrin qurulması və inkişafı baxımından mərkəz rolunu oynayır.
Şərq və Türk dünyasının vacib ərazilərindən olan Naxçıvanın həm islam, həm də türk mədəniyyətinin daşıyıcısı olduğunu deyən etnoqraf Ənvər Çingizoğlu bildirdi ki, Naxçıvan tarixən İslam və Türk dünyasının mərkəzi olub. Ə.Çingizoğlunun sözlərinə görə, Naxçıvanın bütün ərazilərində islam-türk abidələrinin mövcudluğu onu deməyə əsas verir ki, bu ərazidə hər iki dəyər paralel olaraq davam edir. “Naxçıvan türkləri tarixən inanclı insanlar olublar və bu gün də həm milli, həm də dini kimliklərinə sahib çıxmağı bacarırlar. Hazırda Naxçıvan Muxtar Respublikasında müxtəlif istiqamətlər üzrə işlər görülür və bu işlər arasında Türk və İslam dünyası ilə əlaqələrin inkişaf etdirilməsi əsas yerlərdən birini tutur. Azərbaycanın qədim tarixə malik mərkəzi məkanlarından olan Naxçıvanın 2018-ci il üçün İslam Mədəniyyətinin Paytaxtı seçilməsi təsadüfi deyil. Çünki Naxçıvan bütün göstəricilərinə görə bu tələbə cavab verir. Bu gün orada silsilə İslam Mədəniyyətinin Paytaxtı tədbiri keçirilir və bu tədbirlərin də əsas missiyası tarixi-mədəni abidələrin təbliği, onların bərpasıdır. Burada mövcud olan hər bir abidədə zəngin tarixi mədəniyyətimizin siması yaşayır. Tarixi-mədəni irsimizin ən nadir incilərinin mövcud olduğu Naxçıvan Türk dünyası və İslam aləmi arasında etibarlı bir körpüdür. Bu birlik naminə burada çox mühüm işlər görülüb və görülməkdədir. Bu bir həqiqətdir ki, Naxçıvan TÜRKSOY və ISESCO arasında, o cümlədən İslam mədəniyyəti paytaxtları ilə Türk dünyasının mədəniyyət paytaxtları arasındakı əlaqələrin qurulması və inkişafı baxımından mərkəz rolunu oynayır. Bu, fikirlərin səsləndirilməsi təsadüfi deyil. Bu, eyni zamanda, Naxçıvanın İslam dünyasındakı yerinin və nüfuzunun göstəricisidir. Naxçıvanda İslam və Türk dünyasının mədəniyyət zənginliyinin rəmzi olan bir sıra abidələr var ki, o abidələr özündə böyük bir epoxanı yaşadır” - deyə bildirən Ə.Çingizoğlunun sözlərinə görə, bəşəriyyətin ikinci atası sayılan Nuh Peyğəmbərin məzarüstü türbəsinin burada olması, bu məkanda Nuh Peyğəmbərə abidə ucaldılması çox mühüm göstəricilərdir. Ə.Çüngizoğlu qeyd etdi ki, “Qurani-Kərim”də adı keçən Əshabi-Kəhf ziyarətgahı, imam övladlarının dəfn olunduğu imamzadələr, pirlər, məscidlər Naxçıvanda islami dəyərlərin illərlə qorunaraq günümüzədək gəlib çatmasının nişanələrindən biridir. “ Azərbaycan islam dinini qəbul etdikdən sonra bütün bölgələrimizdə, o cümlədən Naxçıvanda abidələrin əksəriyyətində Qurandan ayələr əks olunub. Ümumilikdə, bölgədə islam mədəniyyətinin izlərini yaşadan abidələr, həmçinin, mədrəsələr, təkyələr, xanəgahlar, qədim tarixə malik məscidlər çoxluq təşkil edir ki, bu da Naxçıvanı İslam dünyasının müqəddəs və tarixi məkanı kimi səciyyələndirir” - deyə Ə.Çingizoğlu bildirdi.
İradə SARIYEVA
