Təyyar Bayramov: "Azərbaycan mədəniyyətinin tanıdılması, onun inkişafı baxımından bu tip festivalların keçirilməsi əhəmiyyətlidir"
Ölkəmiz, ənənəvi olaraq, bu il də Beynəlxalq Musiqi Festivalına ev sahibliyi edir. Heydər Əliyev Fondunun təşkilatçılığı, Mədəniyyət və Turizm Nazirliyinin və "Gilan Holdinq"in dəstəyi ilə keçirilən IX Qəbələ Beynəlxalq Musiqi Festivalının iyulun 30-da rəsmi açılış mərasimi olub.
Qəbələ şəhərindəki Heydər Əliyev adına Konqres Mərkəzinin qarşısında quraşdırılan açıq səhnədə keçirilən mərasimdə ölkəmizdə musiqi mədəniyyətinin inkişafında və təbliğində müstəsna rol oynayan Azərbaycan Respublikasının Birinci vitse-prezidenti, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın festival iştirakçılarına təbrik məktubu oxunub. Məktubda deyilir: "Hörmətli festival iştirakçıları, əziz dostlar! Sizi - IX Qəbələ Beynəlxalq Musiqi Festivalının iştirakçılarını ürəkdən salamlayır, festivalın işinə uğurlar diləyir, hər birinizə xoş arzularımı çatdırıram. Əsrlər boyu sivilizasiyalararası dialoqun inkişafına öz töhfəsini verən Azərbaycan tarixən xalqlararası birliyin gücləndirilməsinə səy göstərib. Mədəni-mənəvi inteqrasiyanın səmərəliliyini artıran hər bir layihə bizim üçün çox dəyərlidir. Son illər ölkəmizdə keçirilən beynəlxalq əhəmiyyətli tədbirlər Azərbaycanın təməl prinsiplərinin sülh və humanizm olduğunu bir daha sübut edərək, dilindən, dinindən, etnik mənsubiyyətindən asılı olmayaraq, bütün xalqların nümayəndələrini bir araya toplayır.
Fərəhləndirici haldır ki, nüfuzu ildən-ilə artmaqda olan Qəbələ Beynəlxalq Musiqi Festivalı da mədəniyyətlərarası dialoqa böyük töhfə verən əhəmiyyətli bir tədbir kimi tanınmaqdadır. Ayrı-ayrı ölkələrdən çoxsaylı musiqiçilərin iştirak etdiyi bu dostluq və musiqi bayramı Azərbaycanın dünyada multikulturalizm və tolerantlığın uğurlu modellərindən biri kimi tanıdılması ilə yanaşı, müxtəlif ölkələri təmsil edən musiqiçilərə ünsiyyət və əməkdaşlıq üçün əlverişli şərait yaradaraq, sivilizasiyalararası dialoqun möhkəmləndirilməsinə öz töhfəsini verir".
Maraqlıdır, Qəbələ Musiqi Festivalı Azərbaycan mədəniyyətinin, incəsənətinin dünyada tanıdılmasında nə kimi rol oynayır?
Əməkdar artist, tanınmış xanəndə Təyyar Bayramov "Bakı-Xəbər"ə açıqlamasında qeyd etdi ki, Qəbələdə keçirilən Beynəlxalq Musiqi Festivalı Azərbaycan mədəniyyətinin tanıdılmasında müstəsna rol oynayır: "Məlumat üçün bildirim ki, srağagün Opera və Balet Teatrının kollektivi olaraq "Leyli və Məcnun" tamaşası ilə Qəbələdə keçirilən IX Musiqi Festivalında iştirak etdik. Tamaşa çox uğurlu alındı".
T.Bayramovun fikrincə, bu cür festivalların keçirilməsi çox təqdirəlayiqdir: "Festivalda yerli vətəndaşlarla yanaşı, əcnəbilər də iştirak edir. Nəzərinizə çatdırım ki, festivalda iştirak edənlərin, demək olar ki, əksəriyyəti xarici vətəndaşlardır. IX Beynəlxalq Musiqi Festivalının əhəmiyyəti olduqca böyükdür. Musiqinin tanıtımı və onun rəngarəngliyi baxımından vacibdir. Xaricilər bizim musiqiçilərin ifasına çox maraqla qulaq asırlar".
Xanəndənin sözlərinə görə, Azərbaycan mədəniyyətinin tanıdılması, onun inkişafı baxımından bu tip festivalların keçirilməsi əhəmiyyətlidir. Həmçinin, Azərbaycanın təbliğatı baxımından Musiqi Festivalının keçirilməsi olduqca vacibdir: "Festivalda iştirak edən əcnəbilər Azərbaycan musiqisinə, mədəniyyətinə, bir sözlə, incəsənətinə heyran olurlar. Hələ festival bir neçə gün davam edəcək. Əminəm ki, qarşıdakı günlər ərzində onların mədəniyyətimizlə bağlı heyranlığı daha da artacaq".
Günel CƏLİLOVA
