Nurəddin Mehdixanlı: "Rusiya, Türkiyə və Azərbaycanın çəkəcəyi filmdə rol alacağam" Rasim Balayev: "Əvvəllər çəkilmişəm..." Təranə Əlizadə: "Son illər xaricdə filmlərə çəkilən aktyorlarımızın sayı artır"
Azərbaycan aktyorluq məktəbi yarandığı dövrdən indiyə qədər öz nüfuzunu qoruyub saxlaya bilir. Azərbaycan aktyor və aktrisaları öz savadına, istedadına, yüksək ifaçılıq qabiliyyətinə görə heç vaxt xarici aktyorlardan, aktrisalardan geridə qalmayıb, əksinə, onlardan üstün olub. Bəzi aktyor və aktrisaların ən böyük problemi Azərbaycandan kənarda tanınmaqla bağlı olub.
Çox böyük istedada malik böyük aktyorlarımızın çoxunu nəinki Avropada, hətta keçmiş ittifaq respublikalarında və qardaş Türkiyədə, eləcə də İranda tanımırlar. Tanısaydılar, onların istedadını görər və filmlərə dəvət edərdilər. Əlbəttə, Azərbaycan aktyorları hansı ölkənin kinematoqrafları tərəfindən filmə dəvət edilibsə, o filmlərə ancaq müsbət çalarlar gətirib. Vaxtilə Azərbaycan aktyorları keçmiş SSRİ respublikalarında müxtəlif filmlərə çəkilib. Doğrudur, onların əksəriyyəti baş rollara çəkilməsə də, adi epizodik rollarda belə öz istedadını ifadə edə bilib. Budur əsas məsələ. Aktyor və aktrisanın böyüklüyü ondadır ki, ona verilən kiçik rolda özünün istedad və bacarığını tam aça bilsin.
Bu gün Azərbaycan aktyor və aktrisaları xarici ölkələrdə filmlərə dəvət alırmı?
"Mənim özümü filmə çəkmək üçün bir dəfə..."
Akademik Milli Dram Teatrının aktyoru, xalq artisti Nurəddin Mehdixanlı bizimlə söhbətində bildirdi ki, aktyor və aktrisaların Azərbaycandan kənarda filmlərə çəkilməsi olduqca müsbət haldır. Onun sözlərinə görə, xarici ölkələrdə kinoya çəkilmək həm aktyorun yaradıcılıq imkanlarını, istedadını üzə çıxarır, həm də onları tanıdır: "Məni filmə çəkmək üçün bir dəfə Türkiyəyə dəvət etmişdilər. Lakin burada tamaşada oynadığım üçün gedə bilmədim. İndi isə Rusiya, Türkiyə və Azərbaycanın çəkəcəyi filmdə rol alacağam. Artıq sınaq çəkilişləri başa çatıb. Bu qeyri-siyasi filmdir. İnsan taleyindən, daxili aləmindən bəhs edir. Maraqlı bir film olacaq. Hesab edirəm ki, aktyor və aktrisalarımızın xarici ölkələrə, qonşu respublikalara film çəkilişlərinə dəvət edilməsi müsbət haldır. Çünki bu, aktyorların tanınması deməkdir. Bizdə ən böyük problem çox peşəkar, istedadlı aktyorların, aktrisaların xaricdə elə də tanınmamasıdır. Təəssüf ki, bu problem keçən dövrlərdə də olub, bu gün də var. Bu "buzu əritmək" lazımdır ki, aktyor və aktrisalarımız tanınsın. Teatrlar tez-tez xarici ölkələrə qastrollara getməlidir ki, aktyorlarımızı tanısınlar. Sənətkarlarımız təbliğ edilməlidir".
"Dəvət etmirlər..."
Xalq artisti Rasim Balayev "Bakı-Xəbər"ə açıqlamasında bildirdi ki, əvvəllər xaricdə filmlərə çəkilib, son vaxtlar isə dəvət edilməyib: "Mən əvvəllər Azərbaycandan kənarda filmlərə çəkilmişəm. Ancaq son illər dəvət edilmirəm. Ümumiyyətlə, aktyorun xaricdə filmlərə çəkilməsi də lazımdır".
İki teatr aktyoru xarici filmlərdə...
Azərbaycan Dövlət Musiqili Teatrından aldığımız məlumata görə, aktyor Elxan İsmayılov İran filminə dəvət olunub.
Teatrdan bildirdilər ki, aktyor E.İsmayılov artıq çəkilişlərinə start verilən bədii filmdə əsas rollardan birini - Komandir obrazını canlandıracaq. Film İran İslam Respublikasının tanınmış "Günəşfilm" studiyası tərəfindən istehsal olunur. Şərti adı "Sərhəd" olan ("Arpa çayı- ayrılıq nəğməsi") tammmetrajlı bədii filmin quruluşçu rejissoru və ssenari müəllifi İranın ünlü sənətçilərindən biri olan Ali Abdalidir.
Digər məlumata görə isə, Azərbaycan Dövlət Gənc Tamaşaçılar Teatrının aktyoru İlham Əsədov "Belarusfilm"dən filmə çəkiləcək. Teatrdan aldığımız məlumata görə, aktyor kriminal janrda ekranlaşdırılacaq filmdə həbsxana nəzarətçisi obrazını canlandıracaq. Teatrdan bildirdilər ki, İ.Əsədov yaradıcı heyətlə bağladığı müqaviləyə əsasən film haqqında ətraflı məlumat verməsə də, diqqətə çatdırıb ki, bu il avqustun 5-dən çəkilişləri başlanacaq ekran əsərinin 2018-ci ilin mayında nümayiş etdirilməsi planlaşdırılır.
Xaricdə filmə çəkilən aktrisalardan biri də xalq artisti Amaliya Pənahovadır. Məlum olduğu kimi, aktrisa Rusiyada "Jasmin" serialına çəkilib.
Qeyd edək ki, indiyə qədər xalq artistləri Həmidə Ömərova, Fuad Poladov, aktrisa Xalidə Quliyeva və başqaları İranda çəkilən filmlərdə rol alıb.
"Azərbaycanda güclü aktyor məktəbi olmasına baxmayaraq..."
Sənətşünas Təranə Əlizadə bizimlə söhbətində qeyd etdi ki, Azərbaycan aktyor və aktrisalarının mütəmadi olaraq xarici ölkələrdə çəkilən filmlərə dəvət edilməməsinin səbəbi onların təbliğatının zəif olmasıdır: "Azərbaycan aktyorları öz sənətlərini yaxşı bilir, savadlı olduqları qədər də istedadlıdırlar. Bizim aktyorlar əsl məktəb keçir. Başqa ölkələrin aktyorlarına baxsaq görərik ki, məşhur olsalar da, heç onların çoxunun orta məktəb təhsili belə düzəməlli deyil. Onlar ona görə məşhurdur ki, təbliğatı çox güclüdür. Azərbaycanda güclü aktyor məktəbi olmasına baxmayaraq, sovet dövründə həmişə qonşu respublikalardan aktyorlar dəvət edib onlara əsasən baş rolları həvalə edirdilər. Nə qədər filmlərimizdə xarici aktyor və aktrisaları çəkiblər. Halbuki, buna heç ehtiyac da yox idi. Çünki özümüzün aktyorlarımız daha istedadlıdır. Amma sovet illərində bizim aktyor və aktrisaları çox nadir hallarda Azərbaycandan kənarda filmə çəkirdilər. Son illər xaricdə filmlərə çəkilən aktyorlarımızın sayı artır. Düzdür, onlar çox deyil. Əlbəttə, o filmlərə çəkilən aktyorlarımız həm də xaricilərlə işləmək təcrübəsi qazanır. R.Balayev, F.Poladov, H.Ömərova kimi görkəmli sənətkarlarımız İran, Türkiyə filmlərində gözəl obrazlar yaradıb. Onların oyunu xarici rejissorları həqiqətən də heyran edib. Onlar çox təəccüblənirlər ki, sizin kimi böyük aktyorlar nə üçün ölkənizdən kənarda elə də çox tanınmır. Bir sıra ölkələrdə o cür sənətkarlar olsaydı, indi onları bütün dünya tanıyırdı. Aktyor və aktrisalarımız təbliğ olunmalıdır ki, onları dünyada yaxşı tanıyıb filmlərə dəvət etsinlər. Onların filmlərə çəkilməsi həm məşhurlaşması, həm də gəlir əldə etməsi deməkdir. Düşünürəm ki, bunun üçün istedadlı, kino qaydalarını bilən prodüsserlər lazımdır. O prodüsserlər aktyor və aktrisalarımızın xarici ölkələrdə çəkilməsinin reallaşmasına kömək etməlidir. Məncə, bu olarsa, aktyor və aktrisalarımız tez-tez xaricdə çəkilər".
T.Əlizadənin sözlərinə görə, bəzən elə də məşhur olmayan gənc aktrisalar yalandan deyirlər ki, guya onları xaricdə filmə çəkməyə dəvət edirlər, lakin filmdə erotik səhnələr olduğu üçün çəkilməkdən imtina edirlər: "Bəzi modellər, aktrisalar yalandan deyir ki, onlar xaricdə çəkilən filmlərə dəvət alır. Guya onları erotik filmlərə çəkmək istədikləri üçün çəkilməkdən boyun qaçırırlar. Özlərini bu cür gündəmə gətirmək istəyənlər istedadsız adamlardır. Xaricə Azərbaycanın güclü sənətkarlarını dəvət edirlər ki, ortaya əsl aktyor oyunu çıxarsınlar. Bu filmlərin uğur qazanmasında onlara çəkilən azərbaycanlı aktyor və aktrisaların rolu az deyil".
İradə SARIYEVA
