Türkiyənin xoşbəxtlik sahili adlandırılan Egey bölgəsi, hər zövqə uyğun müxtəlif marşrutlar təklif edən cənnətdir. Bu marşrutlar, gözəl sahillər, antik şəhərlər, tarixi kəndlər və ləzzətli Egey mətbəxi ilə hər zövqə uyğun gəlir. Regionda velosiped sürmə imkanları təkcə marşrutlarla məhdudlaşmır. Velosipedlərə uyğun yaşayış yerləri, təhlükəsiz parkinq sahələri, velosipedlərin təmizlənməsi və təmiri xidmətləri kimi bir çox imkanlar təklif edərək rahat səyahət imkanı yaradır. Beləliklə, velosipedinizi götürün və heyrətamiz bölgəni iki təkərlə kəşf edin! Bölgədəki ən məşhur velosiped marşrutlarından bəzilərinə daha yaxından nəzər salaq.
Tarix və təbii gözəlliklər arasında velosiped səyahəti: EuroVelo 8
Türkiyə, bütün Avropanı uzun məsafəli velosiped marşrutları ilə birləşdirən EuroVelo şəbəkəsinə ilk dəfə EuroVelo 8 ilə daxil olub. Aralıq dənizi marşrutu kimi də tanınan EuroVelo 8 5900 km uzunluğundadır və 11 ölkədən keçir. Marşrutun təxminən 500 kilometri Türkiyənin üçüncü böyük şəhəri İzmirdən keçir. Dikili limanından şəhərə daxil olan marşrutun ilk dayanacağı qədim Perqamon şəhəridir. Marşrut İzmir Quş Cənnətindən başlayaraq, Karşıyaka, Alsancak, Seferihisar, Sığacık, Urla və Alaçatıdan keçir və qədim Efes şəhərində sona çatır. YUNESKO-nun Dünya İrsi siyahısına daxil edilmiş iki yer olan Perqamon və Efes ilə yanaşı, velosipedçilər marşrut boyunca bir çox kənddə, kurort zonalarında və Seferihisarda dayanıb istirahət də edə bilərlər. Gediz Deltasındakı Quş Cənnətində flaminqoları seyr edə, Karşıyaka və Alsancak sahillərinin möhtəşəm mənzərələrindən həzz ala, Urla Üzümlük Yolu üzərindəki yerli şərab zavodlarına baş çəkə və hətta Alaçatıda külək sörfinqi ilə məşğul ola bilərsiniz.
Marmaris dağ velosiped yollarında zirvələri fəth edin
Daha macəra dolu bir velosiped yolu Muğladadır. Marmaris dağ velosiped marşrutları, enişli-yoxuşlu ərazilər və həyəcan verici enişlər axtaran velosipedçilər üçün hazırlanıb. Bu marşrutlar sərt relyefi ilə ekstrim həvəskarı olan velosürücülər üçün nəzərdə tutulub. Onlar Marmaris ətrafındakı şam meşələri və dağlıq mənzərələr arasından dolanır, yamyaşıl meşələrin, körfəzlərin, balıqçı kəndlərinin və Egey dənizinin firuzəyi sularının heyrətamiz mənzərələrini kəşf edə bilərlər. Məsələn, Marmaris-Çamlıbel-Gökbel marşrutu, velosipedçilərə yüksəkliklərdə səssizliyin və təmiz havanın dadını çıxarmağa imkan verəcək. Digər tərəfdən, Marmaris-Karacasöğüt marşrutu Amnistos antik şəhərindən başlayır və orqanik kənd təsərrüfatının inkişaf etdiyi Yeşilbelde kəndindən keçir. Karacasöğüt də mavi kruiz məkanıdır. Marmaris-İngilis Limanı marşrutunun son dayanacağı, İngilis Limanı, Alman donanmasından qaçan İngilis sualtı qayıqlarının İkinci Dünya Müharibəsində sığındıqları yer idi. Bölgədəki ən çətin dağ velosipedi yolu Səlimiyə-Orhaniye-Bayırdır. Başlanğıc nöqtəsi balıqçıların məhəlləsi olan Səlimiyədir və velosipedçilər 58 kilometrlik marşrutda 1285 metr yüksəkliyə qalxırlar. Bu məşhur marşrutlara əlavə olaraq, Marmaris və ətrafında daha çətin yollar da mövcuddur. Qısa İçmələr-Camiyani marşrutundan dağlıq Marmaris-Bördübet Yedi Adalar və Çanlı-Karaca marşrutuna qədər, çimərlik və sakit yolları birləşdirən, adrenalin axtaranlar üçün müxtəlif seçimlər var.
Köyceğiz-Ortaca-Dalamandakı eko marşrutlar
Köyceğizdə beş, Ortaca və Dalamanda isə dörd və beş marşrut olmaqla, hər biri qırmızı istiqamət nişanları ilə işarələnmiş 30 km-lik yollar mövcuddur. Bu marşrutlar, hər kəsin maraq və səviyyəsinə uyğun seçim etməsinə imkan tanıyır. Eko marşrutlar gözəlliklərlə əhatə olunub. Köyceğiz gölü, Alagöl, Sülüklü gölü, Sülüngür gölü və İztuzu gölü kimi bataqlıq ərazilər bölgənin bioçeşidliliyini nümayiş etdirir. Kocagöl və Gökçeova Gölü, ziyarətçilərə sakit bir atmosfer təqdim edir. Yuvarlakçay və Kəpəz kanyonları heyrətamiz mənzərələr təqdim edir, Çiçəkbaba, Çal və Ölemez dağları isə təbiətin müxtəlif aspektlərini kəşf etmək üçün mükəmməl imkanlar yaradır. Velosipedçilər, şam ağacları arasında təmiz havada nəfəs alaraq, firuzəyi göl sularında sərinlənərkən, marşrut boyunca dəniz tısbağaları, Likiya salamandrları və İzmir kral balıqları kimi nadir növləri də görə bilərlər. Eyni zamanda, Kaunos, Pisilis, Lydae, Oktapolis, Telmessos və Kibyra kimi qədim şəhərləri ziyarət edərək, bu bölgələrin tarixi və mədəni irsini daha yaxından öyrənmək imkanı əldə edəcəklər. Köyceğiz, Ortaca və Dalaman bölgələrindəki eko marşrutlar, təbiəti, tarixi və mədəniyyəti bir araya gətirərək, unudulmaz bir təcrübə təqdim edir.
SAMİRƏ
