"...Məqsədim Azərbaycanın musiqi dəyərlərini digər ölkələrdə tanıtmaqdır"
"Bakı-Xəbər" qəzeti musuqi, elm, təhsil, idman və başqa sahələrdə fərqlənən istedadlı, bacarıqlı, böyük uğurlar qazanan uşaq və gənclərlə bağlı hər zaman yazılar təqdim edib. Öz sahəsində müvəffəqiyətlər qazanan hər bir insanın, mütləq ki, bir uğur hekayəsi var.
Uğurlu həyat hekayəsi olan uşaq və gənclərə həsr olunan silsiləməzin ilk sayında beynəlxalq müsabiqələr laureatı olmuş Azərbaycanın gənc və istedadlı musiqiçilərindən biri, 19 yaşlı Məmmədova Ayşə Zaur qızı haqqında danışacağıq. Ayşə həm vokalçı, həm də fortepianoçu kimi bir sıra yerli və beynəlxalq müsabiqələrə qatılıb və yüksək ödüllər alıb.
Ayşə musiqini, ürəyinin səsini ifadə edən fortepianonu həyatının ən vacib məfhumu hesab edir. Doğuluşdan sahib olduğu istedadın və çəkdiyi zəhmətin, heç bir çətinlikdən qorxayıb irəli getməyi bacarmağının nəticəsidir ki, o, bir musiqiçi kimi böyük uğurlara imza atıb, çoxları üçün əlçatmaz olan səhnələri fəth edib. Ayşə Məmmədova ilə yaxından tanış olaq, onun uğur hekayəsini birgə izləyək.
17 sentyabr 2005-ci ildə Rusiya Federasiyasının Yekaterinburq şəhərinin Sverdlovsk vilayətində dünyaya göz açan Aişə 6 yaşı olanda ailəsi ilə birgə Bakıya köçüb. 2011-ci ildə Bakı şəhəri Nizami rayonu 251 nömrəli tam orta məktəbin birinci sinfinə daxil olub və 2022-ci ildə Bakı şəhəri Suraxanı rayonu Hövsan qəsəbəsi 280 nömrəli tam orta məktəbini bitirib. Orta məktəbdə oxuyarkən çox fəal şagird olub. Fəallıqları nəticəsində "İdeal vətəndaş" qəzetində haqqında məqalə yazılıb və Fəxri Diploma layiq görülüb. Ayşə deyir ki, uşaqlıqdan musiqiyə böyük həvəsi və sevgisi olub. "Uşaqlıqdan fortepianoya həvəsim vardı. Məqsədim gələcəkdə həm vokalçı, həm də pianoçu olmaq idi. Atalar deyib ki, niyyətin hara, mənzilin də ora, ailəmin dəstəyi, müəllimlərimin əməyi, özümün də zəhmətimlə, bacarığımla məqsədlərimə doğru irəlilədim".
Ayşə 2012-ci ildə 33 nömrəli Uşaq Musiqi Məktəbinə fortepiano ixtisası üzrə daxil olur və həmin məktəbi fərqlənmə attestatı ilə 2019-cu ildə bitirir.
Bundan başqa, Ayşə aktyor kimi teatr tamaşalarında da oynayıb, amma aktrisalıq yolunu deyil, fortepianonu seçib. "Musiqi məktəbində oxuduğum illərdə bir çox Respublika müsabiqələrində həm vokal, həm də fortepiano nominasiyası üzrə çıxış etdim və 1-ci yer mükafatına layiq görüldüm. Eləcə də 2012-2013-cü illərdə Akademik Musiqili Teatrında rejissorum Elməddin Dadaşovun rəhbərliyi ilə bir neçə tamaşada da aktyorluq qabiliyyətimlə çıxış etdim. 2020-ci ildə musiqi təhsilimi davam etdirmək üçün Azərbaycan Milli Konservatoriyası nəzdində Musiqi Kollecinə Fortepiano ixtisası üzrə daxil oldum və 2024-cü ildə bu kolleci bitirdim.
Musiqi kollecində təhsil aldığım illər ərzində 2022-ci ildə Qazaxıstanda keçirilən Astana Stars "Divertisment" adlı Beynəlxalq müsabiqəsində Fortepiano nominasiyası üzrə 1-ci yer mükafatına layiq görüldüm. Həmin ildə "Art Olimpia Ümid 2022" müsabiqəsində və bu kimi digər müsabiqələrdə fortepiano nominasiyası üzrə iştirak edərək 1-ci yer mükafatına layiq görüldüm. 2022 və 2023-cü illərdə Ümumilli Lider Heydər Əliyevin anadan olması münasibətilə keçirilən "Sən elə bir zirvəsən" adlı Respublika müsabiqəsində vokal nominasiyası üzrə hər iki ildə də 1-ci yer mükafatlarına layiq
görülmüşəm. 2023-cü ildə keçirilmiş "Azərbaycan Vokalçıları" adlı III Beynəlxalq Festivalında solo vokalist kimi çıxış etmişəm. Elə həmən ildə Nəsimi rayonunun ictimai-siyasi həyatında fəal iştirakıma görə Yeni Azərbaycan Partiyası tərəfindən fəxri mükafatlara layiq görülmüşəm. Eləcə də müsabiqələr və dövlət tədbirlərində fəal iştirakıma görə 2024-cü il Nəsimi Rayon İcra Hakimiyyətinin " 2 Fevral Gənclər Günü" adlı diplomu ilə təltif olunmuşam. Həmçinin göstərdiyim bütün fəallıqlar nəticəsində 2024-cü ildə "Azərbaycan Müəllimi" qəzetində haqqımda məqalə çap olunub".
Ayşə Azərbaycan Milli Konservatoriyası nəzdində Musiqi Kollecini böyük uğurla başa vurub, Bakı Musiqi Akademiyasının İnstrumental ifaçılıq ixtisasına (fortepiano üzrə) daxil olub. Hazırda birinci kurs tələbisdir. Ayşənin musiqiyə bağlılığı o qədər möhkəmdir ki, o özünü başqa bir sahədə görmür. Deyir ki, ana südü ilə qanına, canına hopmuş musuqini yalnız yüksək səviyyədə təmsil və təbliğ etməkdir arzusu. "Bu sahəni seçməkdə hər zaman qürur hissi keçirmişəm. Orta məktəbdə oxuduğum illərdə nə qədər fərqli ixtisaslara yönləndirilsəm də, musiqidən ürəyim dönmədi. Yaxşı oxuduğum üçün müəllimlərim mənim hüquq, tarix və
jurnalistka sahələrində çox böyük uğurlar qazana biləcəyimi deyirdilər. Düzdür, bu ixtisaslar da yaxşıdır, amma mən özümü musiqidə tapmışam. Mənim bu sənətə gəlməyimdə bacımın çox böyük rolu olub. Hələ mən 6 yaşımdaykən bacım musiqi məktəbinə gedərək, mənimlə orada
öyrəndiklərini paylaşır və mənim bu sənətə olan sevgim daha da artırdı. Ailəm də hər zaman mənə dəstək olub. Onların dəstəyi mənim üçün həmişə çox əhəmiyyətlidir. Ailənin dəstəyi insanın məqsədlərinə çatması üçün çox mühümdür. Bilirsən ki, arxanda dağ kimi dayanan sarsılmaz bir gücün var.
Bundan əlavə, həm musiqi məktəbində, həm də kollecdə oxuduğum müddətdə bütün müəllimlərimin mənim üzərimdə çox əməyi olub və mənə daima inanıblar. İnam böyük məfhumdur, sənə inanan olmasa, hardasa özünə güvənin o qədər də tam olmaz. Mənə ailəm də, müəllimlərim də həmişə güvəndilər, dəstək oldular. Beləliklə mən də bu sahədə özümü daha çox inkişaf etdirərək, xalqımızın ən görkəmli musiqiçilərindən olmaq istəyirəm. Musiqi sahəsində əsas ixtisasım fortepiano olsa da, vokalçılıq və bəstəkarlıqla da məşğul oluram. Belə ki, bəstələdiyim bir neçə əsər var, onların üzərində işləyirəm və hər dəfə bu alətdə ifa etdikdə sanki başqa bir aləmdə oluram. Musiqi artıq mənim həyatımın bir parçası deyil, bütün həyatımdır. Onsuz özümü təsəvvür edə bilmirəm. Nə qədər çətin olsa da, bu sahədə olmaqdan çox qürur hissi yaşayıram. Sözsüz ki, bu illər ərzində çətinliklər yaşamışam. Lakin özümə və sənətimə olan sevgim
və inamım nəticəsində çətinliklərə qalib gəlmişəm. Və bundan sonra da məqsədim bu sahədə davam edərək, Azərbaycanın musiqi dəyərlərini digər ölkədə tanıtmaqdır".
Ayşə Məmmədova böyük bir yola çıxıb, indiyə qədər onu böyük uğurlara, nailiyyətlərə qovuşduran musiqi bundan sonrakı həyatında da ona yol yoldaşı olacaq. Ayşə özünü bütövlükdə musiqiyə həsr etmək istəyir, vokalçı kimi, pianoçu kimi, bəstəkar kimi Azərbaycan musiqisini bütün dünyada təmsil etmək, tanıtmaq niyyətindədir.
Çətinliklərdən adlayıb öz məqsədinə nail olan hər bir insanın həyat yolu özlərindən sonra gələnlərə bir nümunədir...
İradə SARIYEVA
