Elmira Əzizxanlı: "Cəfər Cabbarlının adı kinostudiyadan götürülməyib, sadəcə..."
1920-ci ildə "Azərbaycan XMK-nın İncəsənət Şöbəsi" adı altında təsis olunan Azərbaycan Dövlət Kinostudiyasına Azərbaycan SSR Nazirlər Sovetinin 20 aprel 1959-cu il tarixli qərarı ilə Cəfər Cabbarlının adı verililib.
1960-cı il aprelin 20-dən Kinostudiya dramaturqun adını daşıyır. Kinostudiyanın yeni binasının əsası 1951-ci ildə qoyulub və 15 ildən sonra hazır olub. 1966-cı ildə bu binada artıq kino istehsalına başlanılıb.
Qeyd edək ki, Mədəniyyət Nazirliyinin 22.08.1958 tarixli əmrinə əsasən, yəni 1958-ci ildə kinostudiya "Azərbaycanfilm" kinostudiyası adlanıb, sonra Cabbarlının adını daşıyıb.
Cəfər Cabbarlının nəvəsi, Cəfər Cabbarlının ev muzeyinin direktoru Qəmər Bağırova (Seyfəddinqızı) mətbuata bildirib ki, babasının adının bu gün "Azərbaycanfilm" kinostudiyası ilə bağlılığı belə qalmayıb. "Cabbarlının kino fəaliyyətini nəzərə alıb, əlbəttə ki, o vaxt kinostudiyaya Cəfər Cabbarlının adı verilib. Bu kişinin adı kinostudiyaya elə-belədən verilməyib. Çox təəssüflər olsun ki, son vaxtlarda Cabbarlının adını biz orada görmürük! Sadəcə "Azərbaycanfilm" kinostudiyası gedir. Mən maraqlanıb soruşdum ki, həqiqətən belə bir rəsmi xəbərdarlıq olubmu ki, sizə Cəfər Cabbarlının adını oradan siləsiz?! Dedilər ki, xeyr, belə bir xəbərdarlıq yoxdur, sadəcə görünür ki, Cabbarlı adı onlara mane olur. Ona görə də belə lazım biliblər. Əgər bu kişinin adı rəsmi götürülməyibsə, niyə adını çəkmirsiz?" - görkəmli ədibin nəvəsi deyib.
Cəfər Cabbarlının nəvəsinin dedikləri həqiqətən də düşündürücüdür. Ailənin etirazı cəmiyyətdə də müzakirə yaradıb və insanlar Cabbarlının adının kinostudiyanın təqdimatında işlədilməməsindən narazılıq edirlər. Deyirlər ki, Cabbarlı Azərbaycan Kino sənəti üçün çox böyük, inqilabi işlər görüb və onun adı hər zaman uca tutulmalıdır.
Böyük ədibin adı "Azərbaycanfilmin" təqdimatında niyə istifadə olunmur? Nə üçün kinostudiyanın adı Cəfər Cabbarlı adına "Azərbaycanfilm" Kinostudiyası kimi qeyd edilmir? Bəlkə, doğrudan da onun adı götürülüb?
"Cabbarlının adını götürmək barədə düşünməmişik belə"
Məsələni araşdırmaq üçün "Azərbaycanfilm" Kinostudiyası ilə əlaqə saxladıq. Kinostudiyanın marketinq şöbəsinin rəhbəri Elmira Əzizxanlı "Bakı-Xəbər"ə bildirdi ki, yayılan iddiallar həqiqəti əks etdirmir, yalandır: "Cəfər Cabbarlının adı kinostudiyadan götürülməyib, sadəcə qısaltma kimi
"Azərbaycanfilm" istifadə olunur. Rəsmi sənədlərdə də Cəfər Cabbarlı adına "Azərbaycanfilm" kinostudiyası gedir. Şifahi dildə əsasən o qədər uzun ad işlətmirik. Bir də, məqalədə bir dəfə uzun adı yazılır, sonrasında "Azərbaycanfilm" deyilir. Siz, məsələn, R.Hüseynov adına 49 nömrəli məktəbə hər dəfə uzun adla xitab etməzsiniz ki? "49"deyib cümlənizi qurarsınız. Bu da eyni məntiq. Cəfər Cabbarlının adını götürmək barədə düşünməmişik belə. Cəfər Cabbarlının heykəli də girişdədir. Bizimlə xəbəri dəqiqləşdirdiyiniz üçün təşəkkür edirik".
İradə SARIYEVA
