"Müasir dövrün tanınmış tarixi romançısı, kifayət qədər bədii tarixi əsərlərin müəllifi, yazıçı-publisist Yunus Oğuzun kitablarını oxuduqca, onun bu sahədə özünəməxsus yer tutduğu danılmaz fakt kimi yaddaşımda yer alır.Bu yaxınlarda Yunus müəllimin "Cığır" adlı tarixi romanını məmnunluqla oxumuşam." Bu sözləri Olaylar.az-a Birinci Qarabağ müharibəsi veteranı, yazıçı-publisist Ramin Məmmədov Yunus Oğuzun "Cığır" tarixi romanının Dövlət mükafatına layiq görülməsi üçün Azərbaycan Atatürk Mərkəzi tərəfindən namizədliyinin irəli sürülməsinə münasibət bildirərkən deyib: "İlk növbədə diqqətimi çəkən o oldu ki, əsər haqqında Nizami Cəfərov, Azər Turan kimi görkəmli alimlər, tənqidçi-ədəbiyyatşünaslar, filologiya elmləri üzrə fəlsəfə doktoru, söz sərrafı Elnarə Qaragözova və başqa nüfuzlu qələm sahibləri yüksək fikir söyləyiblər. Hesab edirəm ki, XIX əsrin sonu, XX əsrin əvvəllərində ermənilərin xalqımıza qarşı törətdiyi cinayətləri aşkarlamaqda, öyrənməkdə bu gün bizə M.S.Ordubadinin, Y.V.Çəmənzəminlinin, Ö.F.Nemanzadənin və başqa ədiblərimizin əsərləri kömək etdiyi kimi, Yunus Oğuzun "Cığır" romanı da yüzillər sonrakı nəsillərə bizim zəmanədə baş vermiş erməni vandalizmini, bədnam qonşularımızın xalqımıza qarşı həyata keçirdiyi soyqırım, işğalçılıq... aktlarını, siyasətini öyrənməkdə, təbliğ etməkdə tutarlı mənbə və uğurlu nəşr rolunu oynayacaqdır. Yunus müəllimin əsərlərinin, xüsusilə də "Cığır" romanının üstünlükləri çoxdur. İlk növbədə diqqəti çəkən odur ki, müəllif əsəri qələmə almazdan öncə, necə deyərlər, zəhmət çəkir, ciddi araşdırma aparır və hadisələri, faktları dəqiq öyrənir, ona görə də mövzu üzrə oxucu üçün qaranlıq yer qalmır. Xeyli sayda tarixi simaların adlarının çəkildiyi, müxtəlif dəlillərin, hadisələrin bədii obrazlarla təqdim edildiyi "Cığır"da haşiyələrin çıxılması da ayrı-ayrı dövrlərdə yaşamış məşhur şəxslərin, maraqlı nümunələrin zaman və məkan baxımından mənimsənilməsi üzrə yaxşı yanaşmadır.Kitabın məziyyətlərindən biri kimi qeyd etmək yerinə düşər ki, müəllif əsəri sadə xalq dilində işlədilən sözlərdən daha çox istifadə etməklə və bütün təbəqəli oxucular üçün başa düşülən üslubda qələmə almışdır. Toplunu mütaliə etdikcə, səhifələri oxuyub vərəqləri bir-bir aşırdıqca, elə təsəvvür yaranır ki, sanki müəllif öz oxucusu ilə üz-üzə oturub hadisələri səmimi, səbrlə nağıl edir. O, oxucusunu yormur, intizarda saxlamır. Erməni vəhşiliklərinin təşkilatçılarının, Ermənistana müasir dövrdə rəhbərlik edənlərin və başqa daşnak canilərinin məkrli niyyətləri, çirkin məqsədləri, məşəqqətli cinayətləri də "Cığır"da layiqincə izlənilir və ustalıqla göstərilir.Bir çox mühüm hadisələrə olduğu kimi, Tovuz döyüşlərinə, bu döyüşlərin əsas qəhrəmanı, şəhid general-mayor Polad Həşimova romanda çoxsaylı səhifələrin ayrılması da əsərin ciddiliyindən xədər verir.Düşünürəm ki, belə bir sanballı, şöhrətli bədii əsər, özü də ən aktual məsələni, Qarabağ müharibələrinin, digər taleyüklü problemlərimizin sənədli bədii vasitələrlə və peşəkarlıqla təsvir olunmuş kitab dövlətimiz tərəfdən də öz layiqli qiymətini alacaqdır."
