Çağdaş tarixi romançılıq sahəsində yazıçı-publisist Yunus Oğuzun yazdıqlarının, ədəbi hadisələrinin yeri xüsusidir. "Nadir şah", "Təhmasib şah", "Sultan Alp Arslan", "Əmir Teymur", "Atabəy Eldəniz", "Uçurum", "Cığır" kimi tarixi romanlar yazan Y.Oğuz bununla milli romançılıq tariximizdə əhəmiyyətli rol oynayır.
Yazıçı-publisist Yunus Oğuzun "Cığır" tarixi romanının aktuallığı, gənclər arasında vətənpərvərliyin və 44 günlük Vətən müharibəsinin təbliğı, Azərbaycanın ərazi bütövlüyü və suverenliyinin bərpasının inkişafındakı əhəmiyyəti nəzərə alınaraq Dövlət mükafatına təqdim edilməsi üçün Azərbaycan Respublikasının Elm, Mədəniyyət və Ədəbiyyat üzrə Dövlət Mükafatları Komissiyasına namizədliyi irəli sürülüb. "Cığır" tarixi romanının Dövlət mükafatına layiq görülməsi üçün namizədliyinin irəli sürülməsi Azərbaycan Atatürk Mərkəzi tərəfindən məqsədəuyğun hesab edilib.
Qeyd edək ki, yazıçı-publisist Yunus Oğuzun Şuşa şəhərinin inşa edilməsinin 270 illiyinə və 44 günlük Vətən müharibəsinə ithaf olunmuş "Cığır" tarixi romanında Pənahəli xanın Şuşa qalasını inşa etməsi, Şuşa qalasına gedən cığırın tədqiq edilərək üzə çıxarılması, ermənilərin tarixin müxtəlif dövrlərində Şuşanı, eləcə də Şuşa qalasını ələ keçirmək üçün məkrli planlar qurması, eyni zamanda Qarabağın incisi sayılan Şuşa şəhərinin ermənilər tərəfindən işğal edilməsi hadisələri tarixi xronoloji ardıcılıqla verilib. Romanda yazıçı Aprel döyüşləri və 44 günlük Vətən müharibəsinə gedən yol, həmçinin ərazilərimizin Ali Baş Komandanın rəhbərliyi altında Azərbaycan Silahlı Qüvvələri tərəfindən işğaldan azad edilməsi kimi tarixi anlar, zəfər tarixi də geniş və ətraflı şəkildə oxuculara çatdırılıb. Əsərdə yazıçı Ali Baş Komandanın rəhbərliyi altında Azərbaycan xalqının mərd, mübariz, döyüşkən ruhunu ortaya qoyub və Ali Baş Komandan İlham Əliyev obrazını yaradaraq onun Müzəffər Ordusunun uğurlu əməliyyatı nəticəsində torpaqlarımızın işğaldan azad edildiyini diqqətə çatdırıb.
Qeyd edək ki, "Cığır" romanının Dövlət mükafatına namizədliyi qəbul edilib.
"Cığır"ın Dövlət mükafatına təqdim edilməsinə münasibət bildirən ədəbi simalar bildirirlər ki, Y.Oğuzun bu əsəri Dövlət mükafatına birmənalı olaraq layiq əsərdir və seçim komissiyası bu romana dəyər verəcək.
Vaqif Yusifli: "...Çox müsbət baxıram və çox sevinərəm"
Filologiya elmlər doktoru, tənqidçi Vaqif Yusifli "Bakı-Xəbər"ə açıqlamasında bildirdi ki, "Cığır"ın Dövlət mükafatına təqdim edilməsi onu ürəkdən sevindirir: "Yunus Oğuzun "Cığır" romanının Dövlət mükafatına təqdim edilməsinə, əsərin qeydə alınmasına çox müsbət baxıram və çox sevinərəm.
Yunus Oğuz tarixi romanlar müəllifidir. Azərbaycan ədəbiyyatında tarixi roman ənənəsini dvam etdirir. Arzu edirəm ki, bu yolda daha yeni-yeni əsərlər yazsın".
Əbülfət Mədətoğlu: "Yunus Oğuz da öz layiq olduğunu almalıdır, o Dövlət mükafatını haqq edir"
Şair-publisist, Əməkdar jurnalist Əbülfət Mədətoğlu da bizimlə söhbətində "Cığır" romanının Dövlət mükafatına namizədliyinin qəbul edilməsinə müsbət yanşdığını dedi. Ə.Mədətoğlu bildirdi ki, "Cığır" bütün məziyyətləri ilə bu mükafatı haqq edir: "Azərbaycan ədəbiyyatında öz yeri, dəsti-xətti olan Yunus Oğuz son illərdə bir-birindən maraqlı tarixi romanları ilə gündəmə gəlib. Mən onun yaradıcılığıan yaxından bələdəm, bu təqdimatı və onun namizədliyinin qeydə alınmasını da alqışlayıram. Düşünürəm ki, hər kəs öz layiq olduğunu aldığı kimi, Yunus Oğuz da öz layiq olduğunu almalıdır, o Dövlət mükafatını haqq edir. Sonuncu əsəri də bizim tariximizlə, Qarabağ mücadiləmizlə bağlıdır və bütövlükdə Azərbaycan ədəbiyyatının yeni nümunəsi kimi çox təqdirəlayiqdir. Düşünürəm ki, mükafat komissiyası onu nəzərə alacaq və Yunus Oğuza layiq olduğu mükafatı təqdim edəcək. Bəri başdan onu təbrik edir, uğurlar arzu edirəm".
İradə SARIYEVA
