Xəyalə Rais: "Görünən dağın bələdçiyə ehtiyacı yoxdur"
Bir vaxtlar bəzi şou müğənnilərin özləri, indi isə övladları gündəmə əxlaqdan kənar davranışlarla gəlir. Bəzilərinin göstərdiyi hərəkət şou olsa belə, onun ictimai əxlaq qaydalarına uyğun gəlmədiyi məlumdur.
Müğənni Roza Zərgərlinin oğlunun mətbuatda yayılan görüntüləri bu qəbildəndir. Belə ki, müğənni Roza Zərgərlinin böyük oğlu, aktyor Corc Qafarov sosial media hesabında hər kəsi təəccübləndirən paylaşım edib. O, qaradərili rəqqasə ilə klublardan birində olan rəqsini izləyiciləri ilə bölüşüb.
Rəqqasənin C.Qafarovla erotik rəqsi isə birmənalı qarşılanmayıb.
Corc gələn tənqidlərə "Bu sadəcə rəqsdir, qorxulu heç nə yoxdur" -, deyə cavab verib.
Qeyd edilənə görə, Corc Qafarov Roza Zərgərlinin övladlığa götürdüyü oğludur. Müğənni, həmçinin, Corcun qardaşı Jerar Qafarovu və Natəvan adlı bir qızı himayəsinə götürüb.
Onu da bildirək ki, C.Qafarov 2019-cu ildə Qaraçuxur bələdiyyəsinin üzvü olub. Bundan başqa, Sosial Xidmət Agentliyinin xətti ilə o, dövlətdən ev də hədiyyə alıb. Dövlətdən ev hədiyyə alan Corc bu gün barlarda həyat sürür. Halbuki, o bu yolu tutmalı deyildi, dövlətin maraqlarına xidmət edən davranışlar göstərməli idi.
Qeyd ediliyi kimi, C.Qafarovun paylaşdığı video ciddi narazlıqla qarşılanıb və sərt tənqidlərə məruz qalıb.
C.Qafarovun bu əxlaqdan kənar paylaşımına sərt reaksiya verənlərdən biri də hərbi ekspert Ədalət Verdiyevdir. Ə.Verdiyev Feysbuk sosial şəbəkə hesabında belə bir status yazıb: "Şəhid ailələrinin ev təminatı başa çatmadığı halda, hər gün gecə barlarında əxlaqsız qızlara böyük vəsaitlər xərcləyən Roza oğlu Corc və onun qardaşı nəyə görə Sosial Xidmətlər Agentliyi sayəsində Azərbaycan dövlətindən hədiyyə olaraq ev almalı idilər? Əxlaqsızlıq nümunəsi olan videonu paylaşmaga tərbiyəm yol vermir. Maraqlanmaq istəyən hüquq-mühafizə orqanlarına videonu göndərə bilərəm".
"...Onun oğluna dövlət hesabına ev verilir, o da gecə barlarında min-bir hoqqadan çıxır və sonra da etdiklərini yayıb ictimailəşirir ki, mən bu işlə məşğulam"
Moderator.az saytının baş redaktoru, Sənətşünas Xəyalə Rais də, Corcun paylaşımını əxlaqdan kənar hesab edir. Onun fkrincə də, əxlaqsız qızlarla gecə barlarında həyat sürən, davranışlarını da çəkinmədən ictimailəşdirən bir adam nə üçün dövlətdən bu qədər imtiyazlar əldə etməlidir, ev almalıdır, bələdiyyə üzvü seçilməlidir? "Corc Qafarovun davraışlarını kəskin pisləyirəm. Bu adam dövlətdən havayı ev alıb, nə vaxsa hətta onu bələdiyyə üzvü də seçiblər, laqiq olmadığı mərtəbəyə qaldırıblar. O da etimadı doğrultmayıb. Amma təcrübə göstərir ki, himayədarlıqla bu kimi imtiyaza, hədiyyəyə nail olanlar sonda bu cür əyri yol tuturlar. Çünki elə bilirlər ki, nə istəsələr edə bilərlər... Amma elə deyil.
Belələri asanlıqla ev ala bilir, amma illərlə çalışıb əziyyət çəkən sənətkarlar ev üzünə həsrət qalıblar. Onları heç saya salan yoxdur.
Sizə adi bir misal çəkim. Ötən il Yazıçılar Birliyinin təşəbbüsü ilə bəzi yazıçılar evlə təmin edildi. O zaman tanınmış yazıçı, tərcüməçi Sevil Gültən bununla bağlı haqlı olaraq etirazını bildirdi ki, illərdir kirayədə yaşayır, iki atasız qız övladı böyüdür və evə daha çox ehtiyacı var. Ömrünü ədəbiyyata həsr etmiş imkansız bir yazıçı Yazıçılar Birliyindən ev ala bilmədi, amma hər cür imkanı olan müğənnilər iki gün məşhur olub üçüncü gün evlə təmin olunurlar. Onun kimilər evlə təmin olunursa, təbii ki, ədalətə, qanunlara insanın inamı itir. Bu cür insanlara hədiyyələr verərək, onları dəstəkləyərək əslində cəmiyyətin kökünü baltalayırıq.
Yetişən nəsil də Roza kimi sənətçi olmağa can atacaq. Onun ev almağa imkanımı yoxdur? Nəyə lazım idi? Onun əvəzinə illərdir zirzəmilərdə yaşayan, həyatını bu ölkənin musiqisi, mədəniyyətinə həsr etmiş sənətkarlara ev versəydilər olmazdımı? Əlbəttə olardı, amma onların yaxşı arxaları, dayaqları yoxdur. Görünən dağın bələdçiyə ehtiyacı yoxdur. Hər kəs Roza Zərgərlinin necə yaşadığını da, neçə evi olduğunu da bilir. Amma...amma onun oğluna dövlət hesabına ev verilir, o da gecə barlarında min-bir hoqqadan çıxır və sonra da etdiklərini yayıb ictimailəşirir ki, mən bu işlə məşğulam. Guya sənət göstərir, guya rəqs edir. Rəqs etmisən, bunu niyə göstərirsən? Niyə ürək bulandırırsan?"-deyə qeyd edən X.Rais bildirdi ki, Roza Zərgərlinin oğlu hazıra nazir olduğu üçün heç nəyə dəyər vermir. O hesab edir ki, bütün hallarda onun davranışı əxlaq qaydalarına ziddir.
Leyla QARAXANLI
