Şəhidləri ölməz, əbədiyaşar edən amillərdən biri onların Vətən qarşısında öz borclarını təmənnasız yerinə yetirmələridir. Vətən də canını ona vəda edən, qanını torpağına qatan oğulları heç zaman unutmur.
Mədəniyyət Nazirliyi Respublika Xatirə Kitabı Redaksiyası uzun illərdir ki, Vətən şəhidlərinin solmaz xatirəsini əbədliləşdirməklə, kitablaşdırmaqla, filmləşdirməklə məşğul olur. Respublika Xatirə Kitabının iyirmiyə yaxın cildi çap olunub və bu cildlərin hər biri də bir canlı əsərdir. Elə filmlər də. İndiyə kimi Redaksiya "Vətən daşı... və ya 44 günün dastanı" adlı layihə əsasında 8 şəhid haqqında dəyərli filmlər çəkib və onlardan 4-ü əvvəlki dövrlərdə təqdim edilib, yeni çəkilən 4-ü isə dekabrın 20-də Nizami Kino Mərkəzinin böyük zalında təqdim olundu. Respublikanın nüfuzlu şəxslərinin, millət vəkillərinin, ictimai-siyasi xadimlərin, ədəbiyyat, sənət adamlarının, media kapitanlarının, dövlət qurumlarının, ictimai təşkilatların təmsilçilərinin, hərbiçilərin, müharibə veteranlarının, şəhid ailələrinin qatıldığı təqdimat mərasimi sözün həqiqi mənasında şəhidlərimizin müqəddəs ruhuna layiq tədbir oldu.
Layihə müəllifi və direktoru Xatirə Kitabı Redaksiyasının baş redaktoru Nəzakət Məmmədova, ssenari müəllifi və rejissoru Vüsal Nuru olan "Vətən daşı... və ya 44 günün dastanı" adlı layihə əsasında çəkilmiş növbəti 4 film Vətən müharibəsində şəhid olmuş Murad Əsədov, Dəyanət Əliyev, Toğrul Abbasov və Məhəbbət Quliyevin şərəfli həyat və döyüş yolunu özündə əks etdirir. Filmlərin nümayişindən əvvəl ölkənin tanınmış simaları Respublika Xatirə Kitabı Redaksiyasının fəaliyyəti gördüyü işlərlə bağlı danışdılar, maraqlı fikirlər, təşəbbüslər səsləndirdilər.
Respublika Xatirə Kitabının iyirmiyə yaxın cildi çap olunub
Tədbirin aparıcısı, sənətşünaslıq üzrə fəlsəfə doktoru, aktrisa Zülfiyyə Eldarqızı tədbir iştirakçılarını salamladı. Azərbaycanın dövlət himni səsləndirildi, şəhidlərin xatirəsi bir dəqiqəlik sükutla yad edildi. Şəhidlərin xatirəsi işığında çıxış edən aparıcı bildirdi ki, müasir Azərbaycan dövlətinin qurucusu və memarı, ümummilli lider Heydər Əliyevin təşəbbüsü ilə yaradılmış və onun xeyir-duası ilə fəaliyyətə başlamış Respublika Xatirə Kitabı Redaksiyası müharibə ağrılarını özündə geniş əks etdirən ensiklopedik tarixi salnamədir. Redaksiya barədə məlumat verən aparıcı vurğuladı ki, bu kitab hazırda da tarixi bir hadisə kimi səciyyələnir və insanın tarixləşən həyatını özündə ehtiva edir.
Qeyd edildi ki, bu kitabda, əsasən İkinci Dünya müharibəsində, Əfqanıstan döyüşlərində, 20 Yanvar faciəsində, Xocalı soyqırımında, Qarabağ müharibəsi zamanı torpaqlarımızın azadlığı uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli qəhrəmanlarımız haqqında əhatəli materiallar dərc edilir, cəmiyyət üçün faydalı iş görülür. Respublika Xatirə Kitabının iyirmiyə yaxın cildi çap olunub. Hər cild ötən tarixdən səs-soraq verir, sanki insanla danışır. Əbəs yerə deyil ki, Respublika Xatirə Kitabını yaddaşımızın abidəsi adlandırırıq. Xatirə kitablarının nəşri həm də ona dəlalət edir ki, "Heç kim unudulmur, heç nə yaddan çıxmır!".
Xalqımıza böyük Zəfər bəxş edən oğullarımızın adlarının əbədiləşdirilməsi Respublika Xatirə Kitabı Redaksiyasının ümdə işidir və redaksiya bu prosesi daim öz üzərində bir məsuliyyət kimi hiss etmiş, bu istiqamətdə araşdırma işləri aparmış və bu ənənəni hazırda da davam etdirməkdədir.
"Şəhidlər ölməz, Vətən bölünməz!"
Respublika Xatirə Kitabının iyirmiyə yaxın cildi çap olunub. Hər cild ötən tarixdən səs-soraq verir, sanki insanla danışır. Əbəs yerə deyil ki, Respublika Xatirə Kitabını yaddaşımızın abidəsi adlandırırlar. Xatirə kitablarının nəşri həm də ona dəlalət edir ki, heç kim unudulmur, heç nə yaddan çıxmır!.
Aparıcı qeyd etdi ki, xalqımıza böyük Zəfər bəxş edən oğullarımızın adlarının əbədiləşdirilməsi Respublika Xatirə Kitabı redaksiyasının ümdə işidir və redaksiya bu prosesi daim öz üzərində bir məsuliyyət kimi hiss edir, bu istiqamətdə araşdırma işləri aparır və bu ənənəni hazırda da davam etdirməkdədir. Respublika Xatirə Kitabı Redaksiyası "Bakı-Xəbər" qəzeti ilə birgə layihə əsasında "Şəhidlər ölməz, Vətən bölünməz!" seriyasından bir neçə kitab dərc edib və bu kimi kitabların hazırlanması istiqamətində növbəti işlər görülür. O vurğuladı ki, gənc nəslin vətənpərvərlik ruhunda böyüməsi istiqamətində bu kimi filmlər böyük əhəmiyyət kəsb edir.
"Xatirə Kitabı öz üzərinə düşən missiyanı..."
Aparıcı Redaksiyanın fəaliyyəti ilə bağlı geniş məlumat verdikdən sonra sözü millət vəkili Aydın Hüseynova verdi. Respublika Xatirə Kitabı Redaksiyasının fəaliyyətini təqdir edən A.Hüseynov bildirdi ki, bu redaksiyanın ülu öndər tərəfindən yaradılmasının xüsusi əhəmiyyəti var: "Hesab edirəm ki, Xatirə Kitabı öz üzərinə düşən missiyanı, ən başlıcası isə ulu öndər Heydər Əliyevin tapşırıqlarını, tövsiyələrini çox böyük uğurla həyata keçirir. Qarşılarına qoyulan məqsədləri çox gözəl şəkildə yerinə yetirə bilirlər. Buna görə Xatirə Kitabı Redaksiyasının rəhbərliyinə, kollektivinə təşəkkür edirəm".
Redaksiyanın həyata keçirdiyi layihələri təqdir etdiyini bildirməklə yanaşı qeyd etdi ki, görülən işlər şəhidlərin adlarının əbədiləşdirilməsi istiqamətində mühüm əhəmiyyət kəsb edir. Şəhid ailələrinə hörmətini ifadə edən millət vəkili qeyd etdi ki, şəhidlərə həsr edilən tədbirdə iştirak etməklə qürur duyur.
Millət vəkilinin cıxışından sonra aparıcı bildirdi ki, Xatirə Kitabı yeni kitablar, yeni layihələr istiqamətində işləyir və gələcəkdə yeni örnəklər təqdim ediləcək.
"Respublika Xatirə Kitabının timsalında şəhidlərimizin xatirəsinin əbədiləşdirilməsi bütün başqa ölkələrin təcrübəsindən fərqlidir"
Z.Eldarqızı qeyd etdi ki, Respublika Xatirə Kitabı redaksiyası "Bakı-Xəbər" qəzeti ilə birgə layihə əsasında "Şəhidlər ölməz, Vətən bölünməz!" seriyasından bir neçə kitab dərc edib və bu kimi kitabların hazırlanması istiqamətində növbəti işlər görülür. Sonra isə Azərbaycan Mətbuat Şurasının İdarə heyətinin üzvü, "Bakı-Xəbər" media qrupunun rəhbəri Aydın Quliyevə söz verdi. Çox maraqlı fikir və təkliflərlə çıxış edən A.Quliyev "Bizim cəmiyyətimiz hələ yaşayır, döyüşür, vuruşur və şəhidlərin xatirəsini belə əziz tutursa, yaşatmaq fikrindədirsə, onun üçün vaxt sərf etməkdən qızırqalanmırsa, demək bu millət həqiqətən də məğlubedilməzdir. Bu gün Xatirə Kitabı Redaksiyanın ərsəyə gətirdiyi sənədli filmlərin təqdimatına yığışmışıq. Bütün bunlar hamısı Respublika Xatirə Kitabının çiynində daşıdığı böyük tarixi missiyanın hissələridir. Bu missiya həqiqətən də böyük missiyadır. Bilirsiz ki, dünyanın bütün ölkələrində dövlətlər vətən uğurunda həlak olan və qəhrəman hesab etdikləri insanların xatirəsini müxtəlif formalarda əbədiləşdirirlər, heykəllər qoyurlar, əsərlər yazırlar və sair. Amma bunun Xatirə Kitabı olaraq bir missiya daşıyan təşkilatın yaradılması formasında əbədiləşdirilməsi unikal bir Azərbaycan təcrübəsidir. Xatirə Kitabını yaratmaq və onun fəaliyyəti ilə şəhidlərin xatirəsini əbədiləşdirmək rəhmətlik Heydər Əliyevin unikal tapıntılarından biri idi. Respublika Xatirə Kitabının timsalında şəhidlərimizin xatirəsinin əbədiləşdirilməsi bütün başqa ölkələrin təcrübəsindən fərqlidir"-deyə bildirdi.
A.Quliyev qeyd etdi ki, şəhidlərin xatirəsinin əbədiləşdirilməsi ilə təkcə Xatirə Kitabı məşğul olmur, bütün dövlət qurumları məşğul olur və başda ölkə başçısı olmaqla şəhidlərimizin xatirəsini əbədiləşdirmək işi ölkəmizdə fasiləsiz, davamlı bir prosesə çevirilib. "Respublika Xatirə Kitabının həyata keçirdiyi missiyanın özəl xüsusiyyətlərindən biri də bundan ibarətdir ki, İkinci Dünya müharibəsində, Əfqanıstan döyüşlərində, 20 Yanvar faciəsində, Xocalı soyqırımında, I və II Qarabağ müharibələri zamanı həlak olanların xatirəsi əbədiləşdirilir. İndiyə qədər neçə-neçə cildlik kitablar buraxılıb, bunlar hamısı dəyəri əsərlərdir". A.Quliyev təklif etdi ki, Xatirə Kitabı Redaksiyasının ayrıca bir ofislə təmin olunması, fəaliyyətinin genişləndirilməsi, buraxılan kitablarının sayının artırılması, o nəşrlərin Azərbaycanda, o cümlədən də diasporun xətti ilə xaricdə yaşayan azərbaycanlılar arasında yayılması, müxtəlif xarici dillərə tərcümə edilib təqdim edilməsi arzuediləndir.
"...Heç zaman öz şəhidlərimizi unutmuruq"
Müdafiə Nazirliyinin Şəxsi Heyət Baş İdarəsinin Qadınlar və hərbi qulluqçuların ailələri ilə iş üzrə şöbəsinin müdiri Zümrüd Səmədova da çıxışında tədbir iştirakşılarını Müdafiə Nazirliyi rəhbərliyi adından salamladı və qeyd etdi ki, Müdafiə Nazirliyi daim şəhid ailələrini diqqətdə saxlayır, onlara həssas münasibət bəsləyir. Respublika Xatirə Kitabı Redaksiyasının gördüyü misilsiz işləri xüsusi dəyərləndirən Z.Səmədova "Mənim üçün şəhidlərlə bağlı hər bir tədbir dəyərlidir. Biz fədakar və xoşbəxt xoşbəxt millətik, çünki heç zaman öz şəhidlərimizi unutmuruq"-deyə bildirdi.
Natiqlərin çıxışından sonra Vətən müharibəsində şəhid olmuş Murad Əsədov, Dəyanət Əliyev, Toğrul Abbasov və Məhəbbət Quliyevin şərəfli həyat və döyüş yolunu özündə əks etdirən filmlər nümayiş olundu.
Bu filmlərdə nakam, lakin qəhrəman, cəsur Azərbaycan oğullarının həyatı, döyüş yolu vərəqlənir, həyat yoldaşına "birdən şəhid olaram, başınızı aşağı dikməyin" vəsiyyətini edən Dəyanət Əliyevin övladlarının, həyat yoldaşının, anasının, qardaşının ağlayan ürəyi, əyilməyən qüruru danışdı, bəy gərdəyinə girməyən Məhəbbət Quliyevin, həyatsevər, vətənsevər Murad Əsədovun və Toğrul Abbasovun qısa, eyni zamanda zəngin həyatı, döyüş yolu əzizlərinin dilindən səsləndi. Şəhidlərin ata-anası, qardaş-bacısı, yaxınları kimi bu həyat dastanları, kədər biçimli qəhrəmanlıq epopeyaları hər birimizi ağlatdı, həm də qürurlandırdı...
"Bu filmlərdə vətən daşından vətəndalığa gedən yolu göstərməyə çalışdıq"
Filmlərin ssenari müəllifi və rejissoru Vüsal Nuru "Biz şəhidimizi nə qədər seviriksə, Vətənimizi də o qədər sevirik, Vətənimizi nə qədər seviriksə, şəhidimizi də o qədər sevirik. Şəhidlərimizin vətənin daşına çevirilməsi o daşın müqəddəsləşdirilməsidir. Bu filmlərdə vətən daşından vətəndaşlığa gedən yolu göstərməyə çalışdıq"-deyə bildirdi.
Şəhid atası Əmirsoltan Abdullayev də çıxış etdi və Xatirə Kitabının həyata keçirdiyi misilsiz işlərin şəhidlərin xatirəsinə böyük töhfə olduğunu bildirdi.
"Şəhdilər ölmürlər, onların ruhları əbədiyaşardır"
Tədbirin sonunda Xatirə Kitabı Redaksiyasının baş redaktoru Nəzakət Məmmədova çıxış edərək bütün iştirakçılara təşəkkürünü bildirdi. "Şəhdilər ölmürlər, onların ruhları əbədiyaşardır. Bu dünya yaxşılarındır, fədakarlarındır. O oğullar Vətənə etdikləri yaxılıqları ilə şəhidlik zirvəsinə çatdılar. Bu gün burada onları yad edirik. Bilirsiz ki, şəhid anaları ilə mütəmadi görüşlər keçirirəm, hər gün qapımızı şəhid anaları açır. Bütün sullara cavab tapmaq olar, amma şəhid analarının gözlərindəki suallara cavab tapmaq mümkünsüzdür"-deyə N.Məmmədova qeyd etdi.
İradə SARIYEVA
