Minillərdən bizə yadigar qalan xalq musiqisinə dövlət səviyyəsində böyük diqqət və qayğı var. Aşıq sənəti də o qayğının qanadları altında inkişaf edir.
Sovet dövründən başlayaraq indiyə qədər bir sıra ansambl və orkestrlərin tərkibində saz alətini də görürük. Əlbəttə, milli alətimiz olan sazın ansamblların tərkibinə qatılması müsbət işdir. Təbii, bu, sazın geniş miqyasda təbliğini şərtləndirən amildir. Ancaq o da var ki, saz o ansambllarda öz imkanlarını tam olaraq göstərə bilmir. Sözsüz ki, ansambl və orkestrlərdə müxtəlif janrlarda, ayrı-ayrı səpkilərdə yazılan əsərlər, mahnılar səsləndirilir. Sazın imkanları ancaq aşıq havalarının ifası zamanı görünə bilir.
Müslüm Maqomayev adına Azərbaycan Dövlət Filarmoniyası ölkənin gerçək bir musiqi nəfəsliyidir. Filarmoniyada xalq musiqisinin inkişafına xüsusi önəm verilir. Bu musiqi ocağında mahnı və rəqs ansamblı, muğam bölməsi, xalq musiqisinin digər sahələrinə yer ayrılır. Ancaq indiyə qədər Filarmoniyanın nəzdində aşıqlar ansamblı yoxdur. Təklif edərdik ki, Müslüm Maqomayev adına Azərbaycan Dövlət Filarmoniyasında aşıqlar ansamblı yaradılsın. Fikrimizcə, bu ansamblın yaradılması Dövlət Filarmoniyasının özü üçün də yaxşı olardı. Bu baxımdan ki, onlar həm yerli, həm də xarici tamaşaçıların qarşısına fərqli və rəngarəng proqramla çıxa bilər. Saza dövlət tərəfindən ciddi dəstək göstərildiyini, artıq sazın YUNESKO-da öz yerini tutduğunu nəzərə alsaq, bu bizə imkan yaradır arzu edək ki, Filarmoniyada aşıqlar ansamblı da olsun. Bu musiqi ocağının özünün ayrıca bir aşıqlar ansamblının olması eyni zamanda da aşıq sənətinin təbliğinə xidmət edər, bu alətin bizə aid olduğunu təsdiqləyər. Bilirsiz ki, hər xalq özünəməxsus musiqi mədəniyyəti, musiqi alətləri, zəngin folkloru, mənəvi sərvətləri ilə gözəl görünür. Filarmoniyanın nəzdində aşıqlar ansamblının yaradılması həm də aşıqlar üçün iş yerinin olması deməkdir. Artıq bir neçə ildir Azərbaycan Dövlət Mədəniyyət və İncəsənət Universitetində ayrıca aşıq sənəti bölümü fəaliyyət göstərir, Milli Musiqi Konservatoriyasında da saz şöbəsi açılıb. Bundan başqa, ölkənin musiqi kolleclərində və məktəblərində saz sinifləri fəaliyyət göstərir. Hər il xeyli sayda aşıq ali məktəbi bitirir, lakin onların böyük əksəriyyəti işsiz qalır. Yəni onları toya aparan olmasa, məşğuliyyətsiz qalırlar. Ancaq Filarmoniyada aşıqlar ansamblı yaradılsa, bir neçə aşıq işlə təmin oluna bilər.
Azərbaycan Aşıqlar Birliyinin (AAB) katibi, tanınmış jurnalist Musa Nəbioğlu (Çobanov) bizimlə söhbətində irəli sürdüyümüz ideyaya müsbət yanaşdığını dedi. O, "Bakı-Xəbər"ə açıqlamasında bildirdi ki, sözügedən məsələ AAB-ı da maraqlandırır. Yəni aşıqların işsiz qalması məsələsinin həlli yolları Birliyi də düşündürür: "Biz də düşünürük ki, ya Dövlət Filarmoniyasının, ya da televiziyaların nəzdində bir aşıqlar ansamblı olsun. Yaxşı olardı ki, bu, Filarmoniyanın nəzdində yaradılsın. Aşıq sənəti dövlətin qayğı göstərdiyi bir sənətdir. Hesab edirəm ki, bu ansamblın yaradılması çox yaxşı olardı. Bu həm sazın təbliği, həm də bir neçə aşığa iş yeri açılması baxımından gözəl iş sayılardı. Bilirsiz ki, Dövlət Filarmoniyası tez-tez qastrollara gedir, xarici tamaşaçılarla ünsiyyətdə olur. Qastrollara apardıqları ansambllar içində aşıqlar ansamblının da olması müsbət olardı".
M.Nəbioğlunun sözlərinə görə, bu gün Azərbaycanda ansamblla işləməyə layiq olan aşıqlar çoxdur. Bu aşıqların Filarmoniyanın tərkibində sazı ləyaqətlə təmsil edəcəklərinə inandığını deyən M.Nəbioğlu hesab edir ki, bu məsələ reallaşsa, bu işin əvəzi olmaz: "Bilirsiz ki, aşıqlar ansambl şəklində həmişə çıxış ediblər. Demək istəyirəm ki, bu sahədə onların təcrübəsi var. Səhv etmirəmsə keçən əsrin 30-cu illərində aşıq İslam Yusifovun yaratdığı aşıqlar xoru Gəncə Filarmoniyasının nəzdində fəaliyyət göstərib. Aşıqlar ansamblı yaranarsa, bundan həm dövlətimiz, həm də xalqımız qazanar".
Azərbaycan Milli Elmlər Akademiyasının (AMEA) N.Gəncəvi adına Ədəbiyyat İnstitutunun direktor müavini, AAB-ın katibi, görkəmli alim, professor Məhərrəm Qasımlı "Bakı-Xəbər"ə bildirdi ki, aşıqlar ansamblının yaradılması ilə bağlı təklifi bəyənir: "Bu çox yaxşı olardı. Əslində, Filarmoniyanın nəzdində belə bir ansambl olarsa, bunun bizə faydası böyükdür. Deyim ki, vaxtilə Azərbaycanda aşıqlar ansamblı olub. Bu gün Gədəbəydə aşıq İsfəndiyar Rüstəmovun rəhbərliyi ilə aşıqlar ansamblı fəaliyyət göstərir. Ancaq belə bir ansambl Filarmoniyanın da nəzdində olmalıdır. Yəqin məlumatınız olar, aşıq İslam Yusifovun rəhbərliyi ilə keçən əsrin 30-cu illərində Gəncə Filarmoniyasının nəzdində aşıqlar xoru vardı. 1939-cu ildə Moskvada keçirilən Azərbaycan mədəniyyəti, incəsənəti günlərində məzmunlu çıxışına, təqdim etdiyi rəngarəng proqrama, ifalara görə aşıq İslam Yusifova dövlət əməkdar incəsənət xadimi fəxri adı verdi. Aşıqların önə çıxarılması, onların ictimaiyyət tərəfindən tanıdılması, aşıq sənətinə cəmiyyətin diqqətinin cəlb edilməsi üçün bu lazımdır. Türk dövlətlərinin bir çoxunda rəsmi aşıqlar ansamblları var. Türkmənistanda, Özbəkistanda, Qazaxıstanda baxşılar, akınlar ansamblları var. Onlar geniş şəkildə fəaliyyət göstərir. Bizim Filarmoniyanın nəzdində də aşıqlar ansamblı olsa, yaxşı olardı. Aşıqlarımız işlə təmin olunardı".
"Bakı-Xəbər" qəzeti bu vacib məsələni ictimailəşdirdi, qərar vermək isə Mədəniyyət və Turizm Nazirliyinin, Azərbaycan Dövlət Filarmoniyasının, başqa əlaqədar qurumların öhdəsinə düşür.
