Azərbaycan Milli Konservatoriyası ilə Təhsil Nazirliyi arasında qalmaqal yaradığı barədə məlumatlar yayılıb. İddialara görə, qalmaqala səbəb Təhsil Nazirliyinin Asəf Zeynallı adına Musiqi Kollecində xanəndəlik proqramını dəyişmək istəməsidir.
Qeyd edilənə görə, Təhsil Nazirliyi Asəf Zeynallı adına Musiqi Kollecində xanəndəlik kursunun 3 ildən 2 ilə endirilməsi ilə bağlı qərar qəbul edilib. Bu da həmin kollecdə narazılıqla qarşılanır ki, iki ilə xanəndə yetişdirmək çox çətindir, bir xanəndənin yetişməsi üçün azı 3 il vaxt lazımdır. İddialara görə, Nazirliyin yeni tərtib etdiyi tədris proqramı xanəndə yetişdirməyə kifayət etmir
Qeyd edək ki, Asəf Zeynallı adına Musiqi Kolleci də Milli Konservatoriyanın nəzdində fəaliyyət göstərir.
Qəzənfər Abbasov: “Biz hökümətin qərarına qarşı...”
Məsələ ilə bağlı Əməkdar müəllim, tanınmış xanəndə Qəzənfər Abbasov mətbuata bildirib ki, Təhsil Nazirliyi Asəf Zeynallı adına Musiqi Kollecində xanəndəlik proqramını dəyişmək istəyir. “Hamınızın diqqətini bir məsələyə yönəltmək məcburiyyətindəyəm. Azərbaycan Milli Konservatoriyasının tərkibində Musiqi Kollecində (A.Zeynalı) xanəndəlik ixtisasının 2 il tədris olunmasını tələb edirlər. Bunu kimlər bu vəziyyətə gətirir? Səbəb nədir? 4 ilə öyrənə bilməyən tələbə 2 ilə necə öyrənsin muğamlarımızı? Bu, milli musiqimizə düşmənçilikdir”- deyə bildirib.
Qəzənfər Abbasov deyib ki, muğamları tam öyrənmək üçün uzun illər tələb olunur: “10 ildən artıqdır ki, kollecdə 3 illik təhsil tətbiq edilib. İndi isə 2 illik təhsil tələb edirlər. İstəyirlər, muğamı bir az da bəsitləşdirsinlər. Məndən tələb edirlər ki, 2 illik proqram tut, mən də etiraz edirəm ki, 2 ilə muğam təhsili olmaz”.
Asəf Zeynallı adına Musiqi Kollecinin Xalq Çalğı Alətləri Şöbəsinin müdiri Yaqub Manafov Təhsil Nazirliyinin Asəf Zeynallı adına Musiqi Kollecində xanəndəlik kursunun 3 ildən 2 ilə endirilməsi ilə bağlı qərarına etiraz edib: “Xanəndəlik kursu üzrə yeni təyin edilən proqramla tələbələr heç nə öyrənə bilməyəcək. İki ilə muğam öyrənmək olar? Xanəndəlik kursu ən azı 3 il olmalıdır”.
Təhsil Nazirliyinin yeni tərtib etdiyi proqramın dəyişdirilməsi istiqamətində Asəf Zeynallı adına Musiqi Kolleci hansı addımlar atacaq?
Nazirliyin bu qərarını lk olaraq ictimailəşdirən və ona narazılığını bildirən Q.Abbasovla əlaqə saxladıq. Q.Abbasov bizimlə söhbətində bildirdi ki, artıq bu məsələyə nöqtə qoyulub: “Mən bu barədə danışmaq istəmirəm, bu məsələyə nöqtə qoymuşam. Hökumət məsləhət görübsə, belə də olsun. Biz hökümətin qərarına qarşı çıxa bilmərik”.
Gülzar Hətəmzadə: “Təhsil Nazirliyi tərəfindən hazırlanan proqramın meydana çıxmasında bizim də iştirakımız olub”
Asəf Zeynallı adına Musiqi Kollecinin direktor müavini Gülzar Hətəmzadə isə “Bakı-Xəbər”ə bildirdi ki, nazirliklə konservatoriya arasında heç bir qarşıdurma yaranmayıb, deyilənlərin heç biri həqiqəti əks etdirmir. G.Hətəmzadə bildirdi ki, Musiqi Kolleci subbakalavr hazırlayır və 9 illik təhsil bazasından kollecə qəbul olanlar 3, 11 illik tədris bazasından qəbul olanlar isə 2 il muğam dərsi alır. Bunun olduqca normal hal olduğunu deyən G.Hətəmzadənin sözlərinə görə, nazirliyin hazırlayıb təqdim etdiyi yeni proqram heç bir fikir ayrılığı yarada bilməz: “Təhsil Nazirliyi tərəfindən hazırlanan proqramın meydana çıxmasında bizim də iştirakımız olub. Hazırlanan yeni proqram tamamilə tələbələrin xeyrinədir. Onlar buranı subbakalavr kimi bitirirlər, sonra konservatoriyada bakalavr, magistr kimi təhsil alırlar. Yeni proqram əsasında çox gözəl, savadlı muğam ifaçıları, xanəndələr hazırlanır. İndi daha yaxşıdır, proqram yüngülləşdirilib. Tələbələrin təhsili yarımçıq qalmır ki, onlar təhsillərini davam etdirirlər. Hər hansı bir narazılığa əsas yoxdur, yeni proqram tamamilə mükəmməldir və subbakalavrlar üçündür. Çox rahatdır. Proqarmdan heç bir narazılıq ola bilməz”.
İradə SARIYEVA
