"Mən fəxr edirəm ki, azərbaycanlıyam..."

Tarix: 06.01.2016 / 01:31
Bölmə: Layihə

Azərbaycançılıq dövlətimizin ideologiyasıdır və hər bir Azərbaycan vətəndaşı, dünyanın istənilən yerində yaşayan azərbaycanlı bu uca məfhuma sadiq qalmalı, onun şərtlərinə əməl etməlidir. Azərbaycançılığın və azərbaycanlı olmağın sevincini yaşamaq, bundan qürur duymaq, əlbəttə, çox qiymətli bir hissdir. "Həmişə fəxr etmişəm, bu gün də fəxr edirəm ki, mən azərbaycanlıyam"- ifadəsi bu hissin ən yüksək səviyyədə təzahürüdür, inikasıdır.

Bunu Azərbaycan dövlətinin hamisi, azərbaycançılıq ideologiyasının XX əsrdəki müəlliflərindən biri, mərhum Azərbaycan Prezidenti Heydər Əliyev söyləyib. Politoloqlar bildirir ki, Heydər Əliyev və azərbaycançılıq bir-birini tamamlayan bir vəhdətdir.

"Bakı-Xəbər" qəzetinin baş redaktoru, Azərbaycan Mətbuat Şurasının İdarə Heyətinin üzvü Aydın Quliyev bizimlə söhbətində Heydər Əliyev və azərbaycançılıq mövzusunu şərh edərkən qeyd etdi ki, Heydər Əliyevin dəqiq ifadə etdiyi azərbaycançılıq fəxarətini azı beş istiqamətdə dəyərləndirmək lazımdır. Onun sözlərinə görə, bu, Azərbaycan tarixinə, Azərbaycan mədəniyyətinə, Azərbaycanın milli-mənəvi dəyərlərinə, Azərbaycan dövlətçiliyinə və Azərbaycanın müasir dünya siyasətində tutduğu əhəmiyyətli yerinə bağlılıq kimi xarakterizə oluna bilər. Heydər Əliyevin irəli sürdüyü azərbaycançılıq ideologiyasının geniş səviyyədə yayılması bütün azərbaycanlılar tərəfindən əməl və iş səviyyəsində, vətənpərvərlik, vətənə, xalqa, dövlətə, dövlətçiliyə, dövlət atributlarına münasibətində özünü göstərir.

Qeyd edək ki, bu beş istiqamətin hər biri haqqında ayrıca yazılarımız, mövzular ətrafında söhbətlərimiz olacaq.

Məlum olduğu kimi, ana dilimizin, milli ədəbiyyatımızın, teatr və mətbuatımızın azərbaycançılıq prinsiplərinə, qaydalarına uyğun istiqamətdə inkişaf etməsi, formalaşması Heydər Əliyevin bu sahəyə diqqət və qayğısı ilə bağlıdır. Azərbaycançılıq ideologiyasının Azərbaycandan kənarda yaşayan soydaşlarımız arasında məqsədyönlü şəkildə yayılması da Heydər Əliyevin apardığı milli siyasətlə əlaqədardır. Politoloqlar və tarixçilər qeyd edir ki, qüdrətli dövlət xadimi Heydər Əliyevin "Mən fəxr edirəm ki, azərbaycanlıyam" etirafı azərbaycanlıların dilinin əzbəridir. Mərhum Heydər Əliyev bu qiymətli kəlamı Naxçıvan Muxtar Respublikasının yaradılmasının 75-ci ildönümündə söyləyib.

Azərbaycançılığın formalaşmasına töhfələr verən klassiklər, böyük şəxsiyyətlər yurdu olan Naxçıvan Heydər Əliyevi də Azərbaycan xalqına bəxş edib. Tarixən Azərbaycan dövlətçiliyinin, təhsilinin, dilinin, mədəniyyətinin, ədəbiyyatının inkişafında Naxçıvan əvəzsiz rol oynayıb. Bu gün də oynamaqdadır. Heydər Əliyevin müstəqil Azərbaycanın ayrılmaz hissəsi olan Naxçıvan Muxtar Respublikasının yaradılmasının 75-ci ildönümündə etdiyi çıxışda "Azərbaycanın hər guşəsi, torpağı hər bir azərbaycanlı üçün əzizdir. Ona görə də Azərbaycanın ayrılmaz hissəsi olan Naxçıvan Muxtar Respublikasının 75-ci ildönümü hər bir azərbaycanlı, bütün Azərbaycan xalqı üçün bayramdır, bizim dövlətimiz üçün bayramdır. Çünki biz burada, Naxçıvanda olan dəyişiklikləri, inkişafı bir daha xatırlayaraq, qeyd edərək, eyni zamanda, Azərbaycanın bütövlükdə inkişafını və Azərbaycan Respublikasının həyatında baş verən dəyişiklikləri nümayiş etdiririk"-deyə bildirib. Azərbaycanın bir əsrdə ikinci dəfə dövlət müstəqilliyi qazanması sözsüz ki, Azərbaycan xalqının azərbaycançılıq məfkurəsinə, ideologiyasına bağlılığı nəticəsində baş verib. Milli özünüdərk anlayışından, azərbaycançılıqdan uzaq olan bir xalq dövlətinin müstəqil olmasını istəyərdimi? Təbii ki, bu məsələ belə, xalqı ümumiyyətlə maraqlandırmazdı. Amma tarix göstərdi ki, Azərbaycan xalqının milli ruhu istənilən tarixi şəraitdə sağlam qalıb. Xalqımız öz iradəsini ortaya qoyaraq məmləkətimizin müstəqil olmasına qərar verdi. Heydər Əliyev də həmişə öz çıxışlarında, sovet dövründə belə, daxilən milli məfkurəyə, azərbaycançılığa sadiq olduğunu açıqlayıb: "Biz müstəqillik əldə etmişik. Müstəqil Azərbaycan dövləti öz həyatını, bütün işlərini sərbəst, azad surətdə özü qurur və Azərbaycanın müstəqilliyi dövründə Naxçıvan Muxtar Respublikasının 75-ci ildönümünü keçirmək mənim üçün şübhəsiz ki, bütün keçmiş zamanlara nisbətən çox əzizdir, qiymətlidir. Biz bu təntənəli yubileyi Azərbaycanın öz dövlət müstəqilliyini elan etməsi, dövlət müstəqilliyini bərpa etməsi ilə əlaqədar 1991-ci il oktyabrın 18-də Konstitusiya Aktının qəbul olunması günü ərəfəsində keçiririk. Yəni 18 oktyabr günü də bizim üçün bayramdır, bu gün də bizim üçün bayramdır. Bu bayramların çox gözəl vəhdəti vardır. Mən bu gün söylədim ki, naxçıvanlılar, Naxçıvan əhalisi azadlığa, müstəqilliyə, sərbəstliyə daha da çox can atanlardan olublar. Ona görə də Azərbaycanın dövlət müstəqilliyinin əldə olunması, - baxmayaraq ki, o vaxt artıq Naxçıvanda müstəqillik əldə edilmişdi, - bütün Azərbaycan xalqı kimi, naxçıvanlılar üçün də tarixi hadisədir və çox qiymətlidir... Bütün dünyaya məlumdur ki, Azərbaycan zəngin təbii sərvətlərə, yüksək elmə, mədəniyyətə, təhsilə, tərəqqiyə malik olan bir ölkədir. Ona görə də bizim öz vətənimizlə, doğma Azərbaycanla fəxr etməyə haqqımız vardır. Mən fəxr edirəm ki, azərbaycanlıyam. Mən fəxr edirəm ki, Azərbaycan torpağı mənim doğma torpağımdır. Mən fəxr edirəm ki, mənim doğma ana dilim, Azərbaycan dilim var. Mən fəxr edirəm ki, müstəqil, azad, qüdrətli Azərbaycan dövləti var".

"Mən fəxr edirəm ki, azərbaycanlıyam" deyən Heydər Əliyev Azərbaycan xalqının şərəfini, Azərbaycanın dövlət müstəqilliyini və demokratik inkişafını, Azərbaycan millətinin və Azərbaycan dilinin böyüklüyünü, şirinliyini ən uca məqamlardan dilə gətirib: "Yaşasın, yaşasın və yüz illərlə yaşasın müstəqil, azad, demokratik Azərbaycan!".

Heydər Əliyevin bu səslənişi minlərlə azərbaycanlını azərbaycançılıq ətrafında yumruq kimi birləşdirdi. "Mən fəxr edirəm ki, azərbaycanlıyam" neçə-neçə tədbirə, yığıncağa, bilik yarışmasına, kitaba, yazı müsabiqəsinə deviz kimi seçilib. Bu deviz altında müxtəlif idman yarışları, inşa-yazı müsabiqələri, konsert proqramları təşkil olunur.

Mərhum Prezident Heydər Əliyevin xatirəsinə həsr edilən bu tədbirlərdə vətənpərvərlik, azərbaycançılıq istiqamətində söhbətlər aparılır.

Bu gün "Mən fəxr edirəm ki, azərbaycanlıyam"- hər bir azərbaycanlının devizinə çevrilib. Uşaq və gənclərimiz bu ruhda tərbiyələndirilir. Hər bir təhsil müəssisəsində, elm və mədəniyyət ocağında azərbaycanlı olmaq sevgisi aşılanır yeniyetmələrə, gələcəyimiz olan balalarımıza.

Heydər Əliyev irsini araşdıran tədqiqatçılar qeyd edir ki, burada əsas xətt azərbaycançılıq və bu ali məfhumun təbliği təşkil edir. "Bakı-Xəbər" qəzetinin baş redaktoru Aydın Quliyevin sözlərincə desək, Heydər Əliyevin azərbaycançılıq fəxarətini ifadə edən bu fikirlər çoxşaxəlidir. Bu ideologiyanı təşviq etmək, gənclərdə Vətənə məhəbbət və hörmət hissi aşılamaq, azərbaycançılıq ideologiyasını yaymaq işi günü-gündən daha da genişləndirilməlidir.

Qürurverici haldır ki, "Mən fəxr edirəm ki, azərbaycanlıyam" ifadəsi yaradıcı adamların da könlünə ilham verib, onların yaradıcılığında yeni dəst-xətt yaradıb. Elə bir sahə yoxdur ki, orada bu ali kəlmənin təsiri hiss edilməsin. Bu gün Azərbaycanda Azərbaycan ideologiyasının daha geniş səviyyədə təbliğ edilməsi üçün böyük bir hərəkata başlanıb.

"Mən fəxr edirəm ki, azərbaycanlıyam" ifadəsi yalnız quru bir şüar deyil, o özündə dərin məna əks etdirən, ətrafında milyonları birləşdirən bir səslənişdir, haraydır. Bakıda, bölgələrdə xalqımızı sevənlər, ona varlığı kimi baxanlar bu kəlamı özlərinə işıqlı yol kimi qəbul edir.

Tarixçilər qeyd edir ki, Heydər Əliyevin illər əvvəl səsləndirdiyi bu ifadə nəinki azərbaycanlıların, hətta etnik toplumların da həyat tərzinə daxil olub. Azərbaycanda yaşayan hər bir xalqın vətəninin Azərbaycan olduğunu deyən tarixçilər bildirir ki, milliyyətindən, dinindən asılı olmayaraq, hər bir Azərbaycan vətəndaşı bu ideologiyaya sadiq olmağa çalışır. Onu da vurğulayaq ki, hətta müxtəlif səbəblərdən Azərbaycandan köçən qeyri-azərbaycanlılar da yaşadıqları ölkələrdə azərbaycançılıq ideologiyasına sadiq olduqlarını qeyd edirlər. Bu da faktdır ki, qeyri-azərbaycanlılar da Heydər Əliyevin dövlətçilik siyasətini bəyənib həmişə. Təbii ki, Azərbaycan hamımızın vətənidir. Azərbaycançılıq da hər birimizin səcdə etdiyimiz bir dünyadır. Azərbaycanda doğulub boya-başa çatan millətlərin nümayəndələri də Azərbaycan sevdalı insanlardır. Heydər Əliyev bu torpağı Azərbaycan türklərilə yanaşı, etnik qrupların da ana vətəni sayıb. Bu hal da var ki, bu gün qeyri-türklər də vətəndaşlıq etibarilə və mənəvi cəhətdən özlərini azərbaycanlı sayır. Azərbaycançılıq ideologiyasının yaşı qədimdir. Sovet dövründə də azərbaycançılar vardı, indi də var. O vaxt həqiqi Azərbaycan tarixinin yazılması uğrunda mübarizə aparanlar az deyildi. Heydər Əliyevin azərbaycançılıqla bağlı gördüyü işlər əvəzsizdir. Kim hara gedirsə, nə isə bir iş görürsə, bunu Azərbaycana sevgilə edir. Heydər Əliyevin ana dili siyasəti çox təqdir olunası bir siyasət olub. O, Azərbaycana rəhbərlik etdiyi dövrdə Azərbaycan dilinin inkişafı ilə bağlı böyük işlər görüb. Anadilli məktəblərin çoxaldılması, ana dilində dərslərin keyfiyyətinin artırılması və s. onun xidmətləri nəticəsində baş verdi. Azərbaycan dilinin yüksək zirvəyə qaldırılması, bu dildə yazıb-yaradan insanların qiymətləndirilməsi Heydər Əliyev tərəfindən həyata keçirilib. Azərbaycançılığın keşiyində duran nə qədər insan mərhum Prezidentin hörmətini qazanıb. Azərbaycançılıq vahid bir ideologiya kimi daha da inkişaf etməli, dünyadakı azərbaycanlıları əhatə etməlidir. Hər bir Azərbaycan vətəndaşı bu ideologiyanı özünə mayak bilməlidir. Bəli, fəxr edirik ki, Azərbaycan vətəndaşıyıq. Azərbaycançılıq hər bir vətəndaşın əməlində, gördüyü işlərdə, vətənə, xalqa sədaqətində özünü ifadə etməlidir.

İradə SARIYEVA

Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.

DİGƏR XƏBƏRLƏR

Tarix: 24.08.2016 / 01:18

Bölgələrimizdə multikulturalizm tədbirləri azərbaycançılığın əyani nümayiş forması kimi...

Tarix: 19.08.2016 / 02:28

Təsviri incəsənət tariximizin örnəkləri azərbaycançılıq nümunələri kimi...

Tarix: 18.08.2016 / 01:39

Təsviri incəsənət tariximizin örnəkləri azərbaycançılıq nümunələri kimi...

Tarix: 16.08.2016 / 15:36

Alimlərimizin multikulturalizm - mədəni müxtəlifliyin problemlərinin tədqiqinə azərbaycançılıq müstəvisində metodoloji yanaşmaları...

Tarix: 11.08.2016 / 01:34

Azərbaycançılığın ayrılmaz istiqaməti olan multikulturalizm Azərbaycanda dönməz həyat tərzinə çevrilib

Tarix: 10.08.2016 / 01:11

Azərbaycançılığın ayrılmaz parçası olan multikulturalizm Azərbaycanda həyat tərzidir...

Tarix: 09.08.2016 / 17:07

Mirzə Fətəli Axundovun fəlsəfi baxışları və Azərbaycan tolerantlıq tarixində onun yeri...

Tarix: 06.08.2016 / 01:49

Mirzə Fətəli Axundovun fəlsəfi baxışlarının Azərbaycan tolerantlığında yeri...

Tarix: 05.08.2016 / 01:42

Mirzə Fətəli Axundovun fəlsəfi baxışlarının Azərbaycan tolerantlığında yeri...

Tarix: 04.08.2016 / 01:29

Azərbaycan kinosu və azərbaycançılıq təbliğatı...

Tarix: 03.08.2016 / 02:14

Azərbaycan kinosu və azərbaycançılıq...

Tarix: 02.08.2016 / 02:00

Aşıq sənəti - azərbaycançılığın mühüm ifadə formalarından biri kimi...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 08.12.2025 / 15:09

Qərbi Azərbaycanlıların qayıdışı MİLLİ İDEYADAN beynəlxalq platformaya çevrilir...

Tarix: 05.12.2025 / 21:50

Qərbi azərbaycanlıların qayıdışı üçün səylər sürətləndirildi...

Tarix: 05.12.2025 / 20:56

Azərbaycan, Türkiyə, ABŞ və Pakistan birgə hərbi təlimdə - Ermənistan niyə vahimələnib...

77 min yeni iş yerinin 92 faizini özəl sektor açıb...