Bu gün polis veteranları cinayətkarlıqla mübarizəyə öz layiqli töhfələrini verirlər. Böyük həyat və xidmət yolu keçən, zəngin təcrübə qazanan veteranlarımızın köməyi ilə neçə-neçə cinayət törətmiş şəxs tutularaq istintaqa verilib, baş verə biləcək hüquqazidd əməllərin qarşısı alınıb.
Uzun illər cinayətkarlıqla mübarizə cəbhəsində "döyüşən”, bu işlərin ağırlığını çiyinlərində daşıyan polis veteranları yeniyetmə və gənclər arasında antinarkotik təbliğatının güclənməsi, dini radikalizmə qarşı mübarizə, azyaşlılar arasında erkən nikah və intihar hallarının qarşısının alınması məqsədilə yerli polis şöbələrinin rəhbərliyi və aidiyyəti xidmətlərin əməkdaşları ilə birgə ayrı-ayrı təhsil müəssisələrində, vətəndaşlarla görüşlər keçirərək hüquqi mövzularda maarifləndirmə işləri aparırlar.
Ötən il ərzində təkcə Qəbələ RPŞ-nin veteranlarının köməyi ilə rayon ərazisində 87 cinayətin açılması təmin edilib. Göstərilən dövr ərzində veteranlar 42 dəfə rayonun müxtəlif təhsil müəssisələrində (orta məktəblərdə, liseylərdə, kolleclərdə və s.), həmçinin, ayrı-ayrı kollektivlərdə vətəndaşlar qarşısında çıxış edib, tövsiyələrini veriblər.
2017-ci il ərzində Ağdaş RPŞ-nin polis veteranları da öz biliklərini gənc əməkdaşlarla bölüşüblər. Belə ki, 130 cinayətin açılmasında polis veteranları yaxından iştirak ediblər.
Geridə qalan il ərzində Şura tərəfindən məktəblərdə və təşkilatlarda 44 dəfə maarifləndirici tədbirlər həyata keçirilib. “Azyaşlı və yeniyetmələr tərəfindən ictimai asayişin və hüquq qaydalarının pozulmasının qarşısının alınması yolları”, “Müəllim, valideyn və şagird münasibətlərində gərginliyin yaranma səbəbləri”, ”Narkomaniyaya və dini ekstremizmə qarşı mübarizə tədbirləri”, “Baş verə biləcək cinayətlərin qarşısının alınmasında və baş vermiş cinayətlərin açılmasında ictimaiyyətin rolu” mövzusunda keçirilən tədbirlərdə polis veteranları çıxış edərək tövsiyələrini veriblər.
Zeyni Hüseynov, DİN Mətbuat Xidmətinin əməkdaşı
