Məlumata görə, 2014-cü ilin əvvəlindən bu günə kimi 2000-dən artıq təqaüdçü kredit götürüb. Dövlət Sosial Müdafiə Fondunun (DSMF) 2014-cü ilin əvvəllərindən başlayaraq öz plastik kartlarından nağdsız ödəniş vasitəsi kimi istifadə edən əmək pensiyaçıları üçün tətbiq etdiyi "Pensiya+" layihəsinə maraq artmaqdadır.
İndiyədək 2000 nəfərdən artıq pensiyaçı həmin kreditlərdən yararlanıb. Qeyd edək ki, həmin layihə çərçivəsində Beynəlxalq Banka məxsus bütün pensiya kartlarının sahibləri öz müraciətlərinə əsasən, faizsiz kredit əldə edirlər. "Pensiya+" layihəsinə əsasən, əmək pensiyaçılarını nağdsız ödənişlərdən istifadəyə cəlb etmək üçün onların kartdakı balanslarına aylıq pensiya məbləğindən əlavə kredit şəklində ən azı 100 manat pul "yüklənir".
DSMF-in əmək pensiyaları şöbəsinin müdiri Elşən Məmmədəliyev bildirib ki, daha çox iri supermarketlərdən plastik kartla alış-veriş edən pensiyaçılar bu kreditləri əldə etməkdə maraqlıdır. Belə ki, pensiyaçı kartdakı pensiya məbləği bitdikdən sonra, ehtiyacı olduğu halda, həmin kreditlərdən istifadə edir. Sonrakı aylarda isə kredit müəyyən hissələrlə pensiya məbləğindən çıxılır. Bu xidmətə görə pensiyaçılardan hər hansı xidmət haqqı tutulmur. Pensiyaçı özünü intizamlı apardıqda, yəni krediti vaxtında geri qaytardıqda ona təkrar bir neçə dəfə bu krediti əldə etmək imkanı verilir. İlin sonuna kimi digər banklardan pensiya alan təqaüdçülər də belə kreditləri ala biləcək.
Elşən Məmmədəliyevin sözlərinə görə, bu layihənin reallaşması nəticəsində ümumi pensiya ödənişləri bazarında nağdsız ödənişlərin dövriyyəsi 2 dəfə çoxalıb. Artıq pensiyaçılara kartlardan təkcə alış-veriş məqsədilə deyil, digər sahələr üzrə, məsələn, işıq, qaz, su, telefon haqlarını da nağdsız qaydada ödəmək üçün istifadə etmələri barədə lazımi məlumatlar verilir, bu istiqamətdə təbliğat işi gücləndirilir. Artıq "Pensiya+" layihəsi çərçivəsində təqaüdçülərə alış-verişdən başqa kommunal xərclərini ödəmək imkanı da yaradılıb. Bununla yanaşı, pensiyaçıların POS-terminallardan istifadə ilə bağlı maarifləndirilməsi, onlara plastik kartların çoxfunksiyalı olduğunu geniş şəkildə izah etməyə hələ də ehtiyac var. Pensiyaçılara kartlardan kommunal ödənişlər, ticarət, xidmət və digər sahələrdə istifadəni təşviq etməklə, bu sahədə stimullaşdırıcı addımlar atmaqla qarşıya qoyulan hədəflərə çatmaq mümkündür.
Təqaüdçülərə kredit verilməsi ilə bağlı iqtisadçı-ekspert Natiq Cəfərli bildirdi ki, bu gün ölkədə 1,3 milyon təqaüdçü var: "Əhalinin 7.1 hissəsini təqaüdçülər təşkil edir. Digər ölkələrdə olduğu kimi, Azərbaycan bankları da təqaüdçülərə kredit verməkdə çətinlik çəkir. Çünki banklar tərəfindən təqaüdçülərə kreditin verilməsi böyük risq deməkdir. Hazırda ölkədə fəaliyyət göstərən banklardan cəmi bir neçəsi yaşlı nəslin nümayəndələrinə kredit verir. Verilən kreditin faizi də yüksək olur. Bu səbəbdən təqaüdçülər həmin faizi ödəməkdə çətinlik çəkəcəyini əvvəlcədən bildiyi üçün kredit götürməkdən çəkinir. Təqaüdçülər üçün verilən kreditin faizi aşağı olarsa, əminəm ki, yaşlı nəslin əksəriyyəti banklara müraciət edər. Amma, təəssüflər olsun ki, kredit faizi yüksəkdir".
N.Cəfərli onu da əlavə etdi ki, 2000-dən artıq təqaüdçünün kredit götürməsi sevindiricidir. Çünki bu qədər təqaüdçü kredit faizini ödəyəcəyinə əmin olduğu üçün banka müraciət edib.
