Xəbər verildiyi kimi, bu günlərdə Fövqəladə Hallar Nazirliyinin (FHN) Tikintidə Təhlükəsizliyə Nəzarət Dövlət Agentliyi və Almaniya İnşaat Texnologiyaları İnstitutunun birgə təşkilatçılığı ilə "Avropa İttifaqının (Aİ) tikinti standartlarına keçid sahəsində Azərbaycan Respublikası Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinə dəstəyin göstərilməsi" layihəsinin təqdimat mərasimi keçirilib.
Mərasim zamanı qeyd olunub ki, layihəyə əsasən, artıq Azərbaycanda Avropa İttifaqının tikinti standartları tətbiq ediləcək. Hazırlanan "Tvininq" layihəsi Avropa İttifaqının tikinti standartlarına keçidin təmin edilməsini, inşaatda təhlükəsizliyi yüksəltməyi nəzərdə tutur.
Məlumat üçün qeyd edək ki, layihədə iştirak etmək üçün Avropa İttifaqının 5 ölkəsi - Almaniya, Avstriya, Böyük Britaniya, Sloveniya və Latviya təkliflərlə çıxış edib. Nəticədə "Tvininq" layihəsi üzrə tərəfdaş ölkə olaraq Almaniya, inzibati tərtibedici orqan isə Almaniyanın İnşaat Texnologiyaları İnstitutu seçilib.
Ekspertlər yeni standartların tətbiqinin ölkəmizdə mövcud tikinti sahəsində müsbət dəyişikliklərə səbəb olacağını bildirir. Xatırladaq ki bir neçə gün əvvəl Dövlət Əmək Müfəttişliyi Xidməti tərəfindən iş yerlərində əmək qanunvericiliyinə, habelə əməyin mühafizəsi qaydalarına əməl olunması vəziyyətinin yerindəcə araşdırılması məqsədilə növbəti monitorinqlər aparılmışdı. Yoxlamalar zamanı bir neçə tikinti şirkətlərinin fəaliyyəti dayandırıldı. Səbəb bu tikinti obyektlərində çalışan işçilərin həyat və sağlamlığı üçün təhlükəli olan, bədbəxt hadisələrin başvermə risqinin qarşısının alınması üçün zəruri tədbirlərin görülməməsi, əməyin mühafizəsi qaydaları və normalarının ciddi şəkildə pozulması olub.
Əmlak məsələləri sahəsi üzrə ekspert Ramil Osmanovun sözlərinə görə, Azərbaycanda mövcud tikinti təhlükəsizliyi standartları heç də Avropa standartlarından geri qalmır. Sadəcə olaraq, bu normaların tətbiqinə nəzarəti gücləndirmək lazımdır: "Söhbət tikintidə təhlükəsizlikdən gedirsə, Avropa tələbləri elə ölkəmizdə də mövcuddur. Mövcud normalar var ki, təhlükəsizlik məsələləri orada geniş şəkildə öz əksini tapıb. Sadəcə olaraq, bu normaların tətbiqinə nəzarəti gücləndirmək lazımdır. Burda işçilərin lazımi avadanlıqlardan istifadə etməsi, lazımi geyimlərlə təmin olunması, digər təhlükəsizlik qaydalarının yerinə yetirilməsi, işçilərin normal iş rejiminə əməl olunması və s. tələblər mövcuddur. Sadəcə olaraq, onların icrası məsələsi var".
