Çingiz İsmayılov: “Satışa çıxarılan məhsulların keyfiyyətinin yüksək olması və təqdim olunan malların geniş coğrafiyası alıcıların diqqətini çəkir”
Bakı inkişaf etmiş ölkələrdə uğurla sınaqdan çıxarılmış alış-veriş festivalına evsahibliyi edir. Paytaxtımızda ikinci Şopinq Festivalı keçirilir. Məlumat üçün bildirək ki, ilk Şopinq Festivalı bu ilin 10 aprel-10 may tarixlərində baş tutub.
Prezident İlham Əliyevin 2016-cı il 1 sentyabr tarixli “Azərbaycan Respublikasında turizmin inkişafı ilə bağlı əlavə tədbirlər haqqında” Sərəncamına əsasən, keçirilən festivalın təşkilatçılığı Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib. Bakı Şopinq Festivalının təşkil olunması ölkə başçısının 2016-cı il 6 dekabr tarixli Fərmanı ilə təsdiq edilmiş “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”ndə də öz əksini tapıb.
Onu da qeyd edək ki, birinci Bakı Şopinq Festivalı uğurla yekunlaşmışdı. Hazırda davam edən ticarət bayramı oktyabrın 15-də başlayıb və noyabrın 15-nə qədər davam edəcək.
II Bakı Şopinq Festivalına müxtəlif ölkələrin media vasitələri də maraq göstərir, bu barədə yazılar, informasiyalar dərc edilir. Bakıda keçirilən Şopinq Festivalının əhəmiyyəti barədə dünyanın dörd bir tərəfində yaşayan insanlar öz fikirlərini bildirirlər. Çalışdığı sahədən asılı olmayaraq, insanlar ticarət bayramına böyük maraq göstərirlər.
Məlumat üçün bildirək ki, bu günə kimi bir çox ölkələrdə Şopinq Festivalı keçirilib. Dubay, İstanbul, Moskva və digər iri şəhərlərdə şopinq festivalları keçirilib. Tanınmış bloger, marketoloq və digər peşəkar şəxslərin apardığı araşdırma zamanı Bakıda keçirilən Şopinq Festivalının disgər ölkələrdə təşkil olunan alış-veriş bayramı ilə müqayisədə daha üstün olduğu qeyd olunur.
Turizm eksperti, tanınmış ərəb bloqqeri, “Kunuz əs-Siyaha” turizm konsaltinq qrupunun təsisçi üzvü Ənvər Abdullah Əbu Nəcm öz açıqlamasında bildirib ki, Bakı Şopinq Festivalı unikal mövsümi hadisədir. Bu festival Azərbaycanın turizmin inkişafı sahəsində qısa vaxt ərzində böyük irəliləyişə nail olduğunu göstərir. Bakı Şopinq Festivalı dünyanın bir sıra analoji festivalları ilə rəqabət apara bilir, festival sosial şəbəkələrdə, yerli və dünya KİV-lərində geniş işıqlandırılır.
Həmçinin, Litvanın xəbər portalında (www.alkas.lt) Bakı Beynəlxalq Şopinq Festivalının üstünlükləri barədə məqalə dərc edilib. Məqalədə Azərbaycan paytaxtının festivala qoşulmuş mağazalarında qiymətlərin dollar və avro ilə ifadədə Dubay, İstanbul və Moskvadakından daha aşağı olması bildirilib.
Dünyada mövcüd olan şopinq festivalları ilə müqayisədə Bakıda keçirilən ticarət bayramının hansı üstünlükləri var?
Turizm sahəsi üzrə ekspert Çingiz İsmayılov “Bakı-Xəbər”ə açıqlamasında qeyd etdi ki, Bakıda keçirilən Şopinq Festivalı xarici ölkələrdə təşkil olunan alış-veriş bayramlarından bir çox cəhətləri ilə seçilir: “İlk növbədə “Tax Free” sistemini qeyd etmək lazımdır. Ticarət Festivalında ƏDV güzəşti həm qiymət rəqabətini gücləndirəcək, həm də şopinq turizmini dəstəkləyəcək. “Baku Shopping Festival–Tax Free” nişanı olan mağazalardan 100 manatdan çox alış-veriş edən zaman məhsulların əlavə dəyər vergisinin (ƏDV) müəyyən qismi müştərilərə geri qaytarılır. Bu ildən başlayaraq, paytaxtımızda təşkil edilən Şopinq Festivalı sayəsində ölkəmizdə “Tax Free” anlayışı xarici ölkələrlə müqayisədə daha cəlbedici olub”.
Həmsöhbətimiz Bakı Şopinq Festivalının üstünlüklərindən biri kimi məhsulların seçimini göstərdi. Onun sözlərinə görə, geyim, məişət, parfumeriya mağazalarında satılan məhsulların qiyməti digər ölkələrlə müqayisədə münasibdir: “Satışa çıxarılan məhsulların keyfiyyətinin yüksək olması da xüsusi olaraq vurğulanmalıdır. Həmçinin, təqdim olunan malların coğrafiyasının geniş olması da alıcıların diqqətini çəkir. Onu da deyim ki, bir neçə il öncə Türkiyədən qayıdarkən aeroportda aldığım əşyaların qəbzini “Tax Free”yə təqdim edəndə mənə möhürün lazım olduğunu dedilər. Bir saatdan sonra təyyarəyə minməli idim. O müddət ərzində geri qayıdıb möhürü almaq zaman tələb edirdi. Halbuki, dükanlardan alış-veriş edərkən mənə “Tax Free” üçün ayrıca qəbz vermişdilər. Ancaq “Tax Free”də həmin qəbzi qəbul etmədilər. Belə olan halda, Bakıda xarici turistlər üçün yaradılan şərait olduqca əlverişlidir. Bakıda “Tax Free” olan yerlərdən ödənişi əldə edirsən. Bu olduqca əlverişlidir və hər bir turistin ürəyincədir”.
Günel CƏLİLOVA
