Azər Əliyev: “Bakı-Tiflis-Qars dəmir yolu Gürcüstana səfər edən turistlərin sayına da təsir edəcək”
Bu günlərdə tarixi İpək Yolu Bakı-Tiflis-Qars dəmir yolunun açılışı ilə yenidən bərpa edilib. Bu yolun iqtisadi əhəmiyyəti olmaqla yanaşı, turizm sahəsinə də müsbət təsir göstərəcək. Qatarla səfər etməyi sevənlər Bakı-Tiflis-Qars dəmir yolunda yararlanacaq.
Bu layihə həm də Azərbaycandan Gürcüstana səfər edənlərin sayına da təsir edəcək. Nəzərə almaq lazımdır ki, azərbaycanlılar istirahət üçün ən çox Gürcüstana yollanırlar. Açıqlanan statistik rəqəmlərə əsasən, son 11 ayda Gürcüstana səfər edən turistlərin sayı artıb.
Ekspertlərin fikrincə, Bakı-Tiflis-Qars dəmir yolu sayəsində Gürcüstana səfər edən turistlərin sayı daha da artacaq.
Turizm sahəsi üzrə ekspert Azər Əliyev bizimlə söhbətində qeyd etdi ki, Bakı-Tiflis-Qars layihəsi Azərbaycan, Gürcüstan və Türkiyə arasında ticarət dövriyyəsinin artmasına də səbəb olacaq: “Bakı-Tiflis- Qars xətti ilə sərnişindaşımalara başlandıqdan sonra region ölkələrinə təhlükəsiz, sürətli və azbüdcəli sərnişin səfərləri mümkün olacaq. Bu da, təbii ki, Azərbaycana turist axınını artıracaq”.
Həmsöhbətimizin sözlərinə görə, Bakı-Tiflis-Qars ilk olaraq Azərbaycan, Türkiyə və Gürcüstan arasında turizmin inkişafına öz təsirini göstərəcək: “Türkiyə və Gürcüstandan Azərbaycana turist səfərlərinin artmasını şərtləndirəcək. Çünki əsas məsələ, sadəcə, orta və yüksək gəlirli insanlar deyil, eyni zamanda aşağı gəlirli – dünya əhalisinin 80-85 faizi bu kateqoriyaya daxildir – bu insanları turizm sektoruna cəlb etmək, onların imkanlarından yararlanmaqdır ki, burada da dəmir yolu aşağı xərcli yol olaraq ölkə turizmin cəlb edilməsində əhəmiyyətli rol oynaya bilər. Hazırda sektorun ölkə iqtisadiyyatında payı 2.4 faizə yüksəlib. Güman olunur ki, növbəti illərdə turizm sektoru ölkə iqtisadiyyatında 5 faizdən yuxarı pay alacaq”.
A.Əliyev onu da bildirdi ki. Bakı-Tiflis-Qars dəmir yolu Gürcüstana səfər edən turistlərin sayına da təsir edəcək.
Günel CƏLİLOVA
